USD 429.57 EUR 447.35
RUB 6.94 CNY 63.23
جاڭالىقتار

قىسقى وليمپياداعى ارنالعان قازاقستان كومانداسىنىڭ فورماسى قانداي

20 قاڭتار 16:40
:ءبولىسۋ
قىسقى وليمپياداعى ارنالعان قازاقستان كومانداسىنىڭ فورماسى قانداي

نۇر- سۇلتان. قازاقپارات - ۇلتتىق وليمپيادالىق كوميتەت 2022 -جىلعى بەيجىڭ ويىندارىنا ارنالعان قازاقستان كومانداسىنىڭ فورماسىن كوپشىلىك نازارىنا ۇسىندى.

بۇل تۋرالى قازاقپارات olympic.kz سايتىنا سىلتەمە جاساپ حابارلايدى.

قازىرگى قازاقستان تاريحىندا العاش رەت ەكيپيروۆكاداعى ەل اتاۋى قازاق تىلىندە «Qazaqstan» بولىپ جازىلادى. وليمپيادالىق كومانداعا ارنالعان سپورتتىق فورمانى قازاقستاندىق ZIBROO كومپانياسى شىعاردى. شەرۋگە ارنالعان كوللەكتسيانى رەسەيلىك ديزاينەر، SHISHKIN برەندىنىڭ نەگىزىن قالاۋشى دميتري شيشكين دايىنداعان. ەكى ءوندىرۋشى ەڭ جوعارى تالاپتارعا ساي كەلەتىن، وندىرىستەگى ەكو- شەشىمدى قولدايتىن جانە كيىم ديزاينىنىڭ الەمدىك ترەندىن قولداناتىن ورتاق وليمپيادالىق ەپيكيروۆكا كوللەكسياسىن ۇسىندى.


قازاقستان قۇراماسىنىڭ وليمپيادالىق ەكيپيروۆكاسىن دايىنداۋعا ءبىر جىلدان اسا ۋاقىت كەتتى. كيىمدى دايىنداۋ پروتسەسىنە اتلەتتەردىڭ وزدەرى قاتىستى. ولار فورمانىڭ ديزاينى، ساپاسى مەن فۋنكتسيونالىنا قاتىستى ءوز ۇسىنىستارىن بىلدىرگەن.

«ءبىر اپتادان سوڭ قازاقستاننىڭ وليمپيادالىق قۇراماسى قىتايعا ۇشىپ كەتەدى. ال 4- اقپان كۇنى ءتورتجىلدىقتىڭ باستى دوداسى - قىسقى وليمپيادا باستالادى. توكيو قارساڭىنداعى سەكىلدى، بۇل ويىن باستالاردان بۇرىن دا ءبىز وليمپيادالىق ەكيپيروۆكانى دايىنداۋ كەزىندە سپورتشىلاردىڭ ۇسىنىس- تىلەگىن ەسكەردىك. ءبىز ءۇشىن وليمپيادا ويىندارىندا سپورتشىلارعا وسى فورمانىڭ ىڭعايلى، قولايلى جانە ءساندى سەزىنگەندەرى ماڭىزدى. ال ماتا مەن تىگىستىڭ ەڭ جوعارعى تالاپقا ساي بولاتىنى ءسوزسىز»، - دەيدى ۇ و ك باس حاتشىسى اندرەي كريۋكوۆ.


قىسقى ويىندارعا ارنالعان وليمپيادالىق فورمانىڭ تانىستىرىلىمىنا جازعى سپورت تۇرلەرىنىڭ وكىلدەرى، اتاپ ايتار بولساق، توكيو وليمپياداسىنىڭ جۇلدەگەرلەرى قامشىبەك قوڭقابايەۆ، ساكەن بيبوسىنوۆ پەن سوفيا بەرۋلتسيەۆا قاتىستى. وسىلايشا، جازعى سپورت تۇرىندەگى اتلەتتەر قىسقى وليمپياداعا اتتاناتىن سپورتشىلارعا قولداۋ كورسەتىپ، وليمپيادالىق قۇرامانىڭ «ءبىر ەل - ءبىر كوماندا» ۇرانىن تاعى ءبىر ناقتىلاپ وتىر.

سونداي- اق، فوتوسەسسياعا دزيۋدوشىلار جانساي سماعۇلوۆ پەن اقمارال ناۋاتبەك، بوكستان ەرلەر كومانداسىنىڭ كاپيتانى ابىلايحان ءجۇسىپوۆ، گيمناست ارۋجان قاسەنوۆا مەن «بارىس» حوككەيشىسى سامات دانيار قاتىستى.


«ءبىزدىڭ كوماندامىزدىڭ وليمپيادالىق فورماسىنىڭ تانىستىرىلىمىنا قۋانا قاتىستىم. سپورتتىق كۇنتىزبەمىزدەگى ايىرماشىلىقتارعا بايلانىستى قىسقى سپورت تۇرىندەگى اتلەتتەرمەن ءجيى كەزدەسپەسەك تە، ولاردىڭ بىزگە كورسەتكەن قولداۋىن ۇمىتقان ەمەسپىز. تيىسىنشە، ءبىز دە وليمپيادا كەزىندە وتانداستارىمىزدىڭ باستى جانكۇيەرى بولامىز. ويتكەنى، ءبىز ءبىر كوماندانىڭ - قازاقستان قۇراماسىنىڭ نامىسىن قورعايمىز. فورماعا كەلەر بولساق، ساپاسى قاتتى ۇنادى. كۇرتەشەلەر جەڭىل ءارى جىلى، ديزاينى دا جيناقى. قازاقستان ءسوزىنىڭ «Q» ارقىلى، ياعني، قازاقشا جازىلعانى كوڭىلگە جىلى تيەدى ەكەن. بۇل فورما بەيجىڭگە اتتاناتىن بارلىق سپورتشىمىزعا دا ۇنايتىنىنا سەنىمدىمىن. وليمپيادا ويىندارىندا بارلىعىنا شىن جۇرەكتەن ساتتىلىك تىلەيمىن»، - دەدى بوكستان توكيو وليمپياداسىنىڭ جۇلدەگەرى، الەم چەمپيونى ساكەن بيبوسىنوۆ.


«فورمانىڭ تانىستىرىلىمىنا شاقىرتۋ العانىمدا تاڭ قالدىم ءارى قۋاندىم. ويتكەنى، قىسقى سپورتتاعى اتلەتتەرىمىزدىڭ ناتيجەسىن ۇنەمى قاداعالاپ جۇرەمىن. ءبىر كۇن بويى ءوزىمىزدى مودەل سەزىندىك. مۇنداي قىزىق جوباعا قاتىسۋ مەن ءۇشىن ۇلكەن تاجىريبە. فورما قاتتى ۇنادى، ءتۇسى دە، ەپيكيروۆكانىڭ ساپاسى دا قۋانتادى. وتە جىلى ءارى دەنەگە جاقسى تۇرادى. سپورتشىلار جابىق عيماراتتاردا دا، ۇلكەن ستاديونداردا دا وزدەرىن ىڭعايلى سەزىنەتىنى انىق. ايتپاقشى، ولاردىڭ ەڭ ءستيلدى بولاتىنىنا دا كۇمانىم جوق. الداعى ەڭ ماڭىزدى جارىستا قازاقستاندىق كومانداعا ساتتىلىك تىلەيمىن. العا!»، - دەدى توكيو وليمپياداسىنىڭ جۇلدەگەرى، كاراتەشى سوفيا بەرۋلتسيەۆا.


پاندەميا كەزىندە جەڭىل ونەركاسىپ باسقا دا سالالار سەكىلدى بۇكىل الەم بويىنشا كەدەرگىلەرگە تاپ بولدى. تاۋاردى جەتكىزۋ لوگيستيكاسى بۇزىلدى، ءتىپتى، الەمدەگى ەڭ ۇلكەن برەندتەردىڭ ءوزى كيىمدى بۇرىنعىداي مەرزىمدە، بۇرىنعىداي كولەمدە شىعارا المايدى. سوندىقتان، جەتكىزۋشىنى تاڭداۋ كەزىندەگى باستى تالاپ - سەنىمدىلىك، تىگىن ونەركاسىبىندەگى الدىڭعى تەحنولوگيالاردى پايدالانۋ، ودان بولەك، كيىمدى دايىنداۋداعى تولىق وندىرىستىك سيكل بولاتىن. شەرۋگە ارنالعان فورمانى تىگۋ كوپتەگەن جىلدار بويى ءىرى كومپانيالارمەن، فۋتبول جانە حوككەي كلۋبتارىمەن جۇمىس ىستەيتىن، سونداي- اق، FISCHER كومپانياسىنا ارناپ ەۋروپاعا تاۋ شاڭعىسى ەكيپيروۆكاسىن ەكسپورتتايتىن «SHISHKIN تىگىن مانۋفاكتۋراسىنا» سەنىپ تاپسىرىلدى.


ديزاينەرلەر بۇل جوباعا تولىققاندى دايىندالدى، قازاقستاننىڭ مادەني ەرەكشەلىكتەرى مەن الەمدىك ءسان ترەندىندەگى ماڭىزدى جايتتاردى ساراپتادى. كيىمدەگى جازۋعا بىرەگەي شريفت تاڭدالدى. جارىستى قابىلداۋشى ەلدىڭ داستۇرلەرى دە نازاردان تىس قالعان جوق. وليمپيادا وتەتىن جىل سۋ جولبارىسى جىلىمەن سايكەس كەلەدى، ال شىعىس كۇنتىزبەسى بويىنشا 2022 -جىلعى ءتۇس «تالاپتارىنا» اسپان كوك، قارا جانە اق ءتۇس سايكەس كەلەدى. بەيجىڭدە قازاقستان كومانداسى ءبىرتۇتاس ويلاستىرىلعان جيىنتىققا يە بولادى.


كيىم قىتايداعى قىسقى كليماتقا ارنايى ويلاستىرىلعان. مۇندا تەمپەراتۋرا كەي كەزدەرى 20 گرادۋستان دا تومەندەيدى. سوندىقتان، سىرتقى كيىم تابيعي قازدىڭ جۇنىمەن تولىقتىرىلعان، جىلۋدى ساقتاپ، سۋىقتى وتكىزبەيتىن زاماناۋي جارعاقتىق ماتەريالدار قولدانىلعان. كولەمىنە قاراماستان، كيىمنىڭ سالماعى از، وتە ءيىلىمدى جانە ەركىن قوزعالۋعا ىڭعايلى. ديزاينەرلەردىڭ پايىمىنشا، وليمپياداشىلار بۇل فورمانى سپورتتتىق ارەنادان باسقا جەرلەرگە دە كيە الادى. قىسقى وليمپيادا ويىندارى 4- اقپان كۇنى بەيجىڭدە باستالىپ، 20- اقپانعا دەيىن سوزىلادى. قازاقستان كومانداسى سپورتتىڭ سەگىز تۇرىنەن باق سىنايدى.



:ءبولىسۋ
سونداي-اق... وقىڭىز
پئكئر قالدئرؤ
+7
جئبةرؤ

مۇراعات