تارتىپسىزدىك كەزىندە كولىگى ورتەنگەن الماتىلىقتاردىڭ شىعىنى وتەلۋى مۇمكىن
بۇل تۋرالى الماتى اكىمىنىڭ ورىنباسارى ءىلياس وسەروۆ ايتتى، دەپ حابارلايدى قازاقپارات ءتىلشىسى.
وڭىرلىك كوممۋنيكاتسيالار قىزمەتىندە وتكەن ونلاين بريفينگ بارىسىندا جۋرناليستەر اكىمدىك وكىلدەرىنە قالاداعى تارتىپسىزدىك كەزىندە بۇلىنگەن كولىك پەن پاتەر يەلەرىنە مەملەكەت شىعىندى وتەي مە دەگەن سۇراق قويدى. اكىم ورىنباسارى ءىلياس وسەروۆ زارداپ شەككەن كاسىپكەرلەر مەن جەكە تۇلعالارعا وتەماقى تولەۋ ءالى باستالماعانىن جەتكىزدى. سەبەبى، وتەماقى تولەۋ ەرەجەلەرى جاقىندا عانا ازىرلەندى. بۇل ەرەجەلەردى ۇكىمەتتىك كوميسسيا اكىمدىككە جەتكىزگەن كەزدە تۇرعىندار نازارىنا ۇسىنىلادى.
«تۇرعىنداردىڭ تىكەلەي جەكە مۇلكىنە كەلەتىن بولساق، بۇل ماسەلەلەردى دە پىسىقتايمىز. كوپ جەكە اۆتوكولىك زارداپ شەككەنى تۇسىنىكتى، جاي زاقىمدانعانى، ورتەنىپ كەتكەندەرى بار. بۇل ماسەلەنى دە قاراستىرىپ جاتىرمىز، زارداپ شەككەن حالىق مۇمكىن پوليتسياعا ارىز بەرۋى كەرەك شىعار. ەگەر ولاردىڭ كولىگى قاڭتار وقيعاسى كەزىندە بۇلىنگەنى راستالسا، ونى وتەۋ ماسەلەسىن قاراستىرامىز. ونىڭ ىشىندە جەكە تۇلعالارعا دا»، - دەدى اكىم ورىنباسارى ءىلياس وسەروۆ.
ەسكە سالايىق، الماتىدا ورتەنگەن جانە وق تيگەن 140 كولىك ايىپ تۇراعىنا قويىلدى.
اۆتور: الما مۇقانوۆا