الماتىدا جاپپاي ەرەۋىل كەزىندە ەلگە قارۋ تاراتقاندار ۇستالدى
جاپپاي ەرەۋىل كەزىندە كۇدىكتىلەر قارۋ- جاراق دۇكەنىنەن قارۋلاردى الىپ شىعىپ، رەسپۋبليكا الاڭىنا جينالعاندارعا تاراتا باستاعان. جەدەل ءىس- شارا بارىسىندا كريمينالدىق پوليتسيا باسقارماسىنىڭ قىزمەتكەرلەرى كۇدىكتىلەردىڭ جەكە باسىن انىقتادى.
«ولار قالاداعى بازارلاردىڭ ءبىرىنىڭ اۋماعىندا ۇستالدى. قازىرگى ۋاقىتتا ايىپتالۋشىلار قاماۋدا وتىر. ولاردىڭ باسقا دا قىلمىستارعا قاتىسى بار- جوعىن مىندەتتى تۇردە تەكسەرەمىز»، - دەدى الماتى قالالىق پوليتسيا دەپارتامەنتى باستىعىنىڭ ورىنباسارى بەرىك ابىلبەكوۆ.
ايتا كەتەيىك، بۇلىكشىلەرگە قارۋ تاراتىپ جاتقان ءسات كۋاگەرلەردىڭ كامەراسىنا تۇسكەن. كەيىننەن بۇل ۆيدەو الەۋمەتتىك جەلىلەردە تارادى.
«ءبىز قارۋ- جاراق دۇكەنىنە شابۋىل جاسادىق. ءبىزدى وسىلاي جاساۋعا ماجبۇرلەگەن ءبىر توپ ادام بولدى. سوسىن ءبىز ۇرلاعان قارۋ- جاراقتىڭ جارتىسىن وزدەرىنە الىپ الدى، اۆتوماتتارىن سىلكىپ تۇردى. مەن اق ءتۇستى Lexus كولىگىن جۇرگىزدىم»، - دەدى ءبىرىنشى كۇدىكتى.
«بۇلار - گازتۇمىلدىرىق كيگەن، اۆتومات، پىشاقپەن قارۋلانعان ادامدار. ولار بىزگە قارۋدى تەز الىپ شىعىپ، ونى اپارىپ بەرۋدى بۇيىردى. ءبىز ونى قورىققاننان ىستەدىك، بۇل ادامدار بىزگە قىسىم كورسەتتى. اۆتومات اسىنعان ادامداردان قالاي قورىقپايسىڭ»، - دەيدى ەكىنشىسى.
ءۇشىنشىنىڭ ايتۋىنشا، قالانى كولىكپەن ارالاپ ءجۇرىپ، قارۋ- جاراق دۇكەنىنە بارعاندارىندا ونى توناپ جاتقان. ولاردىڭ كولىكتەرىنە قارۋ تيەپ، الاڭعا الىپ بارۋ بۇيىرىلعان.
«پوليتسيا وسى توپتىڭ ۇيلەستىرۋشىسىنىڭ جەكە باسىن جانە ۇستالعانداردىڭ ارەكەتىنىڭ شىنايى سەبەبىن انىقتاۋعا كىرىستى. ەلىمىزدىڭ قىلمىستىق كودەكسىنىڭ بىردەن بىرنەشە بابى بويىنشا سوتقا دەيىنگى تەرگەۋ امالدارى جۇرگىزىلۋدە»، - دەدى پوليتسيادا.
اۆتور: دۋمان ارعىنگەلدى