نۇرتورە ءجۇسىپ: ءتالىم ت ۆ مەن «ەل ارنانى» جاسوسپىرىمدەر ارناسىنا اينالدىرۋ كەرەك
بۇل جايىندا بۇگىن سەناتتىڭ جالپى وتىرىسىندا ق ر ۇكىمەت باسشىسىنا ساۋال جولداعان دەپۋتات نۇرتورە ءجۇسىپ ايتتى، دەپ حابارلايدى قازاقپارات ءتىلشىسى.
ونىڭ ايتۋىنشا، ۇلتتىق يدەولوگيا مەن ۇلتتىق تاربيەنى دامىتۋدا ايتارلىقتاي الشاقتىق بولدى. دەگەنمەن سەناتورلار بۇل ماسەلەنى ۇكىمەت الدىندا بىرنەشە رەت كوتەرىپ، ءتىپتى وسى سالاداعى جاعدايدى جاقسارتۋ بويىنشا ناقتى ۇسىنىستار جىبەرگەن. ماسەلەن، وتكەن جىلى سەناتتا ۇلتتىق قۇندىلىقتاردى ساقتاۋ جانە ودان ءارى ىلگەرىلەتۋ ماسەلەلەرىنە ارنالعان پارلامەنتتىك تىڭداۋ ءوتتى. تىڭداۋعا قاتىسۋشىلار كوپتەگەن پروبلەمالىق ماسەلەلەردى كوتەرىپ، جۇمىس قورىتىندىسى بويىنشا ۇكىمەتكە ۇسىنىستار بەرگەن.
«سىزدەن سول ۇسىنىمدارعا قايتا نازار اۋدارۋدى، پارلامەنتتىك تىڭداۋ ماتەريالدارىن ۇكىمەت مۇشەلەرىنىڭ بارىنە تانىستىرۋدى جانە سولاردى جۇزەگە اسىرۋ ءۇشىن شۇعىل ارەكەت ەتۋدى تالاپ ەتەمىن! سەنات بەس قۇندىلىقتى - اتاپ ايتقاندا، تاۋەلسىزدىك جانە تاريحي تانىم، ەل مەن جەر، ءتىل مەن يماندىلىق، ۇلتتىق ءداستۇر جانە وتباسىلىق تاربيە، ءبىلىم مەن بىلىكتىلىك ماسەلەسىن قازاق قوعامىنىڭ باستى قاعيداتتارى رەتىندە كۇن تارتىبىنە شىعاردى. سونىڭ بىردە بىرەۋى نازارعا الىنبادى. ايتىلعان ءسوز ايتىلعان جەردە قالدى»، - دەپ اتاپ ءوتتى نۇرتورە ءجۇسىپ.
دەپۋتات سونداي- اق ءوزىنىڭ ساۋالىندا قوعامدى تولعاندىراتىن ءبىرقاتار ماسەلەلەردى دە ايتتى. مۇنىڭ ءىشىندى تەلەارنالاردىڭ نەگىزگى باعدارى دا بار. ەلدەگى جەتەكشى ارنالاردىڭ كوپشىلىگى مەملەكەتتىك تاپسىرىس ەسەبىنەن بيۋدجەتتەن قارجىلاندىرىلادى. ولارعا «رەيتينگ» نە ءۇشىن كەرەك دەپ سۇراق قويعان دەپۋتات، «ەل ارنا» جانە «ءتالىم ت ۆ» ارنالارىن جاسوسپىرىمدەر ارناسىنا اينالدىرۋدى ۇسىندى.
مۇنداي كونتەنتتى جاساۋ قاجەتتىلىگىنىڭ ماڭىزدىلىعىن ەكى اي بۇرىن ەل پرەزيدەنتى اتاپ وتكەن بولاتىن. سونداي- اق، دەپۋتات ءبىلىم بەرۋ، جاستاردى رۋحاني تاربيەلەۋ، جاسوسپىرىمدەر ءۇشىن سيفرلىق جوبالار جاساۋ جانە جۇمىسسىزدىق ماسەلەلەرىن شەشۋ سالالارىندا ءبىرقاتار ناقتى ماسەلەلەردى كوتەردى.
«ۇكىمەت باسشىسىنان وسى ايتىلعانداردى جانە سەنات قابىلداعان ۇلتتىق قۇندىلىقتار تۋرالى ۇسىنىمدار مەن الەۋمەتتىك جەلىدەگى پايدالى ۇسىنىستاردى تەزىرەك ەلەككە سالىپ، ناقتى ءىس- قيمىل جوسپارىن جاساۋدى سۇرايمىن. ەشكىم بىزگە جاڭا مەملەكەت قۇرىپ بەرمەيدى. بىزگە ىرگەسى بەرىك قوعام كەرەك. جاڭارعان قازاق ەلى كەرەك! وسىنى كۇن سايىن ەستە ۇستاۋ كەرەك»، - دەدى سەناتور.
اۆتور: مارلان جيەمباي