ادىراسپان كوروناۆيرۋستان قورعاي ما؟

نۇر-سۇلتان.قازاقپارات - ادىراسپاننىڭ ءتۇتىنى مەن ارانىڭ ۋى سان اۋرۋعا ەم. وزبەكستاندىق دارىگەرلەرلەر وسىلاي دەيدى. وسىلاي دەپ قانا قويماي، ءداستۇرلى مەديتسينا ادىستەرىن زاماناۋي ەمدەۋ پروتسەستەرىنە ەنگىزىپ جاتىر. ەندى مۇنىڭ زاماناۋي مەديتسيناعا پايداسى قانداي؟

كورشى ەل كوروناۆيرۋسپەن كۇرەستە تاعى قانداي قارەكەت قىلىپ جاتىر؟ وزبەك حالىقتىق مەديتسيناسىندا بۇل وسىمدىك ەرەكشە ماڭىزعا يە. قازاقشا ادىراسپان باۋىرلاس ەلدىڭ تىلىندە ىسرىق دەپ اتالادى. قوعامدىق جەر، اسىرەسە دۇكەن، بازارلاردا ونى جاعىپ، تۇتىنىمەن اۋماقتى زالالسىزداندىرىپ جاتقان جاعدايلاردى ءجيى كەزدەستىرەسىز. ءتىپتى، كەي مەديتسينا مەكەمەلەرىندە بۇل ەمدىك ءتاسىل رەتىندە قولدانىلادى. ادەتتە زاماناۋي جانە ءداستۇرلى مەديتسينانىڭ قاراما- قايشى تۇستارى كوپ. ءبىراق بۇل جەردە ەكى تاراپتىڭ دا ويى ءبىر- بىرىنە ۇشتاس.

ادىراسپان ەلدەگى بارلىق ەمحانادا ۆيرۋستى ينفەكتسيالاردىڭ الدىن الۋعا قولدانىلادى. ءداستۇرلى ەمشىلەر مۇنى كادىمگى ەم- دومعا قولدانادى.

روزمۇحاماد حولنازاروۆ، وزبەكستان حالىق مەديتسيناسى قاۋىمداستىعىنىڭ ءتوراعاسى:

- ءبىزدىڭ حالىق ىسرىقتى ءتۇرلى اۋرۋعا ەم سانايدى. ءاربىر ۇيدە كۇنىنە كەمىندە 1 مارتە تۇتاتىلىپ تۇرادى. ەكىنشىدەن، ونىڭ ءتۇتىنى تىنىس الۋ جولدارىنداعى ۆيرۋستاردى جويادى. جانە تۇقىمىنان ءتۇرلى ءدارى- دارمەك جاساۋعا بولادى. تەرى اۋرۋلارىن ەمدەيتىن قابىلەتى دە بار.

«حالىقتىق مەديتسينا وكىلدەرى كوروناۆيرۋسپەن اۋىرعانداردى ارانىڭ ۋىمەن دە ەمدەيمىز»، - دەيدى. مۇنى دا دارىگەرلەر پايدالى ءادىس دەپ ەسەپتەيدى. ءبىراق كوروناۆيرۋستىڭ جاڭا شتامدارىنا كەلگەندە جاعداي قيىن.

«دەنساۋلىق ساقتاۋ سالاسى بەكىتكەن ورتاق ەرەجەلەردى قولدانعان ءجون»، - دەيدى ماماندار. ونىڭ ۇستىنە، قازىر وزبەكستاندا كوروناۆيرۋستىڭ وميكرون جانە دەلتا تۇرلەرى كوبەيىپ بارادى. ۇكىمەت حالىقتى جاپپاي ۆاكتسينا سالدىرۋعا بارىنشا ۇگىتتەپ جاتىر. دارىگەرلەردىڭ ايتۋىنشا، ۇجىمدىق يممۋنيتەت ءالى تولىق قالىپتاسقان جوق. وزبەكستان حالقىنىڭ ازىرگە تەك ۇشتەن ءبىر بولىگى تولىق ۆاكتسينالاۋ كۋرسىنان وتكەن. ريەۆاكتسينالاۋ بولسا، باياۋ ءجۇرىپ جاتىر.

ناديرا احمەتجانوۆا، پۋلمونولوگ دارىگەر:

- بيىل بالالار كوپ سىرقاتتانىپ جاتىر. كوبىنە كىشكەنتايلاردىڭ وكپەسى زاقىمدانادى. ولاردى تەك ارنايى ستاندارتتارمەن ەمدەيمىز. تاياۋدا ەل بيلىگى ۆاكسينا سالدىرۋ مىندەتتى بولۋى مۇمكىن ەكەنىن ەسكەرتتى. ءبىراق حالىقتىڭ كوبى وعان قارسى. جاڭا تالاپتىڭ جاپپاي يممۋنداۋ ۇدەرىسىنە قانشالىقتى اسەر ەتەرى بەلگىسىز. ەلدە جالعان ۆاكتسينا پاسپورتىن جاساۋشىلار دا ازايماي وتىر.

www.24.kz