ساياسي مالىمدەمە جاساعان سپورتشىلار جازاعا تارتىلادى - وليمپيادانى ۇيىمداستىرۋشىلار

نۇر-سۇلتان. قازاقپارات - بەيجىڭدەگى قىسقى وليمپيادا ويىندارىنىڭ رەسمي وكىلى وليمپيادا رۋحىن بۇزعان سپورتشىلار جازاعا تارتىلاتىنىن ايتتى، - دەپ حابارلايدى Reuters اگەنتتى.

بەيجىڭ حالىقارالىق بايلانىستار دەپارتامەنتى باس ديرەكتورىنىڭ ورىنباسارى يان شۋدىڭ ايتۋىنشا، وليمپيادا رۋحىنا، اتاپ ايتقاندا قىتاي زاڭىنا قايشى كەلەتىن كەز كەلگەن مىنەز-قۇلىق پەن قيسىنسىز ءسوز بەلگىلى ءبىر جازاعا اپارادى.

«وليمپيادا رۋحىنا جانە قىتاي زاڭدارىنا قايشى كەلەتىن كەز كەلگەن مىنەز-قۇلىق بەلگىلى ءبىر جازاعا اپارادى. وليمپيادا حارتياسىنىڭ 50-ەرەجەسىندە دەمونستراتسياعا جول بەرىلمەيتىنىن ايتادى. وليمپيادالىق نىسانداردا ەشقانداي دەمونستراتسيالارعا، ساياسي، ءدىني نەمەسە ناسىلدىك ناسيحاتقا جول بەرىلمەيدى»، - دەلىنگەن حابارلامادا.

حالىقارالىق وليمپيادا كوميتەتى (ح و ك) سپورتشىلار كەز كەلگەن ماسەلە بويىنشا ءوز پىكىرلەرىن باسپا ءسوز كونفەرەنتسيالارىندا جانە سۇحباتتاردا ەركىن بىلدىرە الاتىندىعىن ايتتى.

اگەنتتىكتىڭ حابارلاۋىنشا، اككرەديتاتسيادان باس تارتۋ ۇيىمداستىرۋشىلار نۇسقاۋلىعىندا كورسەتىلگەن نۇسقاۋلارعا سايكەس جازا بولادى.

ايتا كەتۋ كەرەك، وتكەن وليمپيادالاردا سپورتشىلاردىڭ وليمپيادا حارتياسىن بۇزۋ دەرەگى تەك ح و ك تاراپىنان قارالدى.

«حالىقارالىق وليمپيادا كوميتەتى وليمپيادالىق حارتيانىڭ نەگىزگى پرينتسيپتەرىندە دە، ەتيكا كودەكسىندە دە بەكىتىلگەن ادام قۇقىقتارىن مويىندايدى جانە قولدايدى»، - دەلىنگەن ح و ك مالىمدەمەسىندە.

بەيجىڭدە 2022-جىلعى قىسقى وليمپيادا ويىندارى 4-20- اقپان ارالىعىندا، ال قىسقى پاراليمپيادا ويىندارى 4-13- ناۋرىز ارالىعىندا وتەدى.