USD 433.3 EUR 464.19
RUB 6.48 CNY 64.56
جاڭالىقتار

الماتىدا جاپپاي تارتىپسىزدىك كەزىندە زارداپ شەككەن كاسىپكەرلەردىڭ شىعىنى قالاي وتەلەدى؟

19 قاڭتار 19:16
:ءبولىسۋ
الماتىدا جاپپاي تارتىپسىزدىك كەزىندە زارداپ شەككەن كاسىپكەرلەردىڭ شىعىنى قالاي وتەلەدى؟

الماتى. قازاقپارات - الماتىدا جاپپاي تارتىپسىزدىك كەزىندە كەلتىرىلگەن شىعىننىڭ جالپى سوماسى 95 ميلليارد تەڭگەدەن اسادى.

1600 كاسىپكەرلىك سۋبەكتى زارداپ شەكتى. ونىڭ 96 پايىزى شاعىن جانە ورتا بيزنەس وكىلدەرى.

بۇل تۋرالى بريفينگ بارىسىندا قالا اكىمىنىڭ ورىنباسارى ءىلياس وسەروۆ ءمالىم ەتتى، دەپ حابارلايدى قازاقپارات ءتىلشىسى.

ونىڭ ايتۋىنشا، زارداپ شەككەن شاعىن جانە ورتا بيزنەسكە وتەماقى تولەۋ مەحانيزمى ازىرلەنگەن. بۇل باعىتتا مەملەكەتتىك ورگانداردىڭ قاتىسۋىمەن ارنايى كوميسسيا جۇمىس ىستەيدى. ونىڭ قۇرامىنا دەپۋتاتتار مەن قوعامدىق بىرلەستىكتەر، «اتامەكەن» ۇ ك پ- نىڭ قىزمەتكەرلەرى كىردى.

«بيزنەس سۋبەكتىلەرىنىڭ ءوتىنىشى ەلەكتروندى تۇردە Infokazakhstan.kz سايتىندا قابىلدانادى. وندا جەكە كاسىپكەر مەن زاڭدى تۇلعالار وزدەرىنىڭ كاسىپكەر ەكەنىن راستايتىن جانە كەلتىرىلگەن شىعىننىڭ فوتو، ۆيدەوسىن كورسەتەدى. سودان سوڭ ونى وڭىرلىك جانە قور كوميسسياسى 5 كۇن ىشىندە قارايدى. قازىر الماتىدا اكىمىنىڭ تاپسىرماسىمەن قۇرىلعان وڭىرلىك كوميسسيا جاپپاي تارتىپسىزدىكتەن قالاعا كەلتىرىلگەن شىعىندى ءالى ەسەپتەپ جاتىر. بۇگىنگى كۇنى الدىن الا بولجام بويىنشا جالپى شىعىن 95 ميلليارد تەڭگەدەن استى. ونىڭ ىشىندە 54 اكىمشىلىك نىسان زاقىمدانعان. قۇقىققورعاۋ جانە كوممۋنالدىق قىزمەتتىڭ 260 كولىگى، ودان بولەك جەكە تۇلعالاردىڭ 150 اۆتوكولىگى ورتەنگەن، ياعني 2 ميلليارد تەڭگەدەن استام شىعىن كەلدى»، - دەيدى ءىلياس وسەروۆ.

سپيكەردىڭ سوزىنشە، قالادا 1600 گە جۋىق بيزنەس سۋبەكتىسى زارداپ شەكتى. وعان كەلتىرىلگەن شىعىن 66,5 ميلليارد تەڭگە كولەمىندە. ونىڭ 96 پايىزى شاعىن جانە ورتا بيزنەس وكىلدەرىنە تيەسىلى. بۇدان بولەك، الماتى قالاسىنىڭ اكىمدىگى قارجىلىق جانە قارجىلىق ەمەس قولداۋ شارالارىن ازىرلەپ جاتىر.


:ءبولىسۋ
سونداي-اق... وقىڭىز
پئكئر قالدئرؤ
+7
جئبةرؤ

مۇراعات