ق ر پرەزيدەنتى قورعانىس مينيسترلىگىنىڭ باسشىلىق قۇرامىمەن كەڭەس وتكىزدى
مەملەكەت باسشىسى قاسىم-جومارت توقايەۆ مۇرات بەكتانوۆتى قورعانىس ءمينيسترى لاۋازىمىنان بوساتىپ، بۇل قىزمەتكە رۋسلان جاقسىلىقوۆتى تاعايىنداۋ تۋرالى جارلىقتارعا قول قويعانىن حابارلادى.
قاسىم-جومارت توقايەۆ جاڭا ءمينيستردىڭ كادرلىق اسكەري قىزمەتكەر ەكەنىن، ارنايى ءبىلىمدى الماتى جوعارى جالپى اسكەري كوماندالىق ۋچيليشەسىندە وقىعانىن، كەيىن م. ۆ. فرۋنزە اتىنداعى اكادەميادا جانە رەسەي فەدەراتسياسى قارۋلى كۇشتەرى باس شتابىنىڭ اسكەري اكادەمياسىندا ءبىلىمىن جالعاستىرعانىن اتاپ ءوتتى.
«ونىڭ تاجىريبەسى مول. ىشكى اسكەردە 30 جىلدان استام قىزمەت ەتتى. ول قاتارداعى جاۋىنگەردەن باستاپ، ءارتۇرلى باسشىلىق قىزمەتتەردى اتقاردى. ىشكى ىستەر ءمينيسترىنىڭ ورىنباسارى - ۇلتتىق ۇلاننىڭ باس قولباسشىسىنا دەيىنگى اسكەري جولدان ءوتتى»، - دەدى پرەزيدەنت.
قاسىم-جومارت توقايەۆ قارۋلى كۇشتەرگە دەگەن تالاپتىڭ كۇشەيە تۇسكەنىنە توقتالدى.
«ارميا تاۋەلسىزدىگىمىزدىڭ تىرەگى بولىپ، مەملەكەت مۇددەلەرىن قورعاۋى ءتيىس. قاڭتار وقيعاسى كەزىندە قارۋلى كۇشتەر وزىنە سەنىمسىز ءارى قابىلەتسىز باسشىلىعىنىڭ كەسىرىنەن جۇكتەلگەن مىندەتتەردى ءتيىستى دەڭگەيدە اتقارا المادى. مينيستر بەكتانوۆ كومانديرلىك قابىلەتىن كورسەتە المادى. كوماندالىق-شتابتىق جانە اسكەري جاتتىعۋلار كەزىندە وڭ ناتيجە كورسەتكەن ارميامىز بولا تۇرا، سىن ساعاتتا ونىڭ الەۋەتىن پايدالانا المادىق. سىرتتان كومەك شاقىرۋعا ءماجبۇر بولدىق، - دەدى جوعارعى باس قولباسشى. سونىمەن قاتار پرەزيدەنت قازاقستانداعى بىتىمگەرلىك ميسسياسىن اياقتاعان ۇ ق ش ۇ كونتينگەنتىنىڭ جۇمىسىنا وڭ باعا بەردى.
«ۇ ق ش ۇ- نىڭ بىتىمگەرلىك كۇشتەرى قازاقستانعا قىسقا مەرزىمگە عانا كەلىپ، قورعاۋ قىزمەتىن اتقاردى. ۇجىمدىق كونتينگەنت وزدەرىنىڭ تيىمدىلىگىن جانە الەۋەتىن كورسەتتى»، - دەدى مەملەكەت باسشىسى.
پرەزيدەنت گەوساياسي جاعدايدى جانە ايماقتىق دەڭگەيدەگى وزەكتى سىن-قاتەرلەردى ەسكەرە وتىرىپ، قازاقستان قارۋلى كۇشتەرىنىڭ اسكەري دايىندىعىن تۇبەگەيلى ارتتىرۋدى تالاپ ەتتى.
ول ءۇشىن ءبىرقاتار مىندەتتى ورىنداۋ قاجەت. جوعارعى باس قولباسشىنىڭ پىكىرىنشە، ەڭ الدىمەن، ەل باسشىلىعىن سىرتقى جانە ىشكى قاۋىپ-قاتەرلەر تۋرالى ۋاقتىلى ءارى ناقتى اقپاراتتارمەن قامتاماسىز ەتۋگە ءتيىستى اسكەري بارلاۋ قىزمەتىن كۇشەيتۋ كەرەك. مەملەكەت باسشىسىنىڭ جارلىعىنا سايكەس قۇرىلاتىن ارناۋلى وپەراتسيالار جونىندەگى كۇشتەردىڭ باسشىلىعىنا ماڭىزدى ميسسيا جۇكتەلەدى. سونداي-اق ولارعا قىسقا مەرزىم ىشىندە باسقا كۇشتىك قۇرىلىمدارمەن بىرلەسىپ، بارلىق ۇيىمداستىرۋ شارالارىن قابىلداپ، ارناۋلى وپەراتسيالاردى ورىنداۋعا دايىندالۋ مىندەتى جۇكتەلەدى.
قاسىم-جومارت توقايەۆ قارۋ-جاراق ساقتايتىن نىسانداردا توتەنشە جاعدايلاردىڭ قايتالانۋىنا جول بەرمەۋ قاجەتتىگىن ەسكە سالدى. وسىعان بايلانىستى پرەزيدەنت قارۋ-جاراقتاردىڭ ساقتالۋ قاۋىپسىزدىگىن قامتاماسىز ەتۋ، پايدالانۋعا جارامسىز جانە ءارى قاراي ساقتاۋعا ءقاۋىپتى قارۋ- جاراقتاردى جويۋ شارالارىن جۇزەگە اسىرۋدى جالعاستىرۋ كەرەك ەكەنىن ايتتى.
سونىمەن قاتار مەملەكەت باسشىسى قازاقستان ارمياسىنىڭ تەحنيكالىق جانە جاۋىنگەرلىك جابدىقتارىن جاڭارتۋ مىندەتىن جۇكتەدى.
«اسكەردەگى قارۋ-جاراقتىڭ دەنى - 30-50 جىل بولعان كەڭەس داۋىرىندەگى تەحنيكا. ەسكىرگەن تەحنيكالاردىڭ مەرزىمىنىڭ وتكەنىنە بايلانىستى قارۋ-جاراق پاركىن جاڭارتۋ ءۇشىن شۇعىل شارالار قابىلداۋ قاجەت. قارۋلى كۇشتەر زاماناۋي ءارى جوعارى تەحنولوگيالىق قارۋ-جاراقپەن، اسكەري تەحنيكامەن جابدىقتالۋى ءتيىس. قابىلداناتىن شارالار جۇيەلى بولۋى كەرەك. قارۋ-جاراق پەن اسكەري تەحنيكانى جوندەيتىن، ولارعا قىزمەت كورسەتەتىن وتاندىق ءوندىرىستى دامىتۋ قاجەت»، - دەدى جوعارعى باس قولباسشى.
مەملەكەت باسشىسى اسكەردىڭ شۇعىل ارەكەت ەتۋ قابىلەتىن ارتىرىپ، اسكەري-ترانسپورتتىق اۆياتسيانىڭ الەۋەتىن كۇشەيتۋ قاجەت ەكەنىنە توقتالدى. ونىڭ ايتۋىنشا، اسكەري بورىشتى وتەۋ مىندەتىنىڭ بەدەلىن كوتەرىپ، ابىرويىن ارتتىرۋ قاجەت. سونىمەن قاتار قاسىم-جومارت توقايەۆ قاڭتار وقيعاسىنىڭ ساباقتارىن ەسكەرە وتىرىپ، قارۋ-جاراق جانە اسكەري تەحنيكا ساتىپ الۋ جونىندەگى 2022-جىلعا ارنالعان جوسپاردى قايتا قاراۋدى جانە قارۋلى كۇشتەردەگى كادرلىق الەۋەتتى ارتتىرۋ شارالارىن قابىلداۋدى تاپسىردى.
بۇدان كەيىن رۋسلان جاقسىلىقوۆ قازاقستان رەسپۋبليكاسىنىڭ قورعانىس ءمينيسترى رەتىندە انت قابىلدادى. جيىن سوڭىندا پرەزيدەنت جاڭا مينيسترگە جانە قورعانىس مينيسترلىگىنىڭ ۇجىمىنا ساتتىلىك تىلەدى.