دەپۋتاتتار اۆتوكولىكتەردىڭ مىندەتتى تەحنيكالىق بايقاۋىن الىپ تاستاۋدى ۇسىندى

نۇر- سۇلتان. قازاقپارات - اۆتوكولىكتى تەحنيكالىق بايقاۋدان وتكىزۋ ءراسىمى فورمالدى تۇردە اتقارىلىپ، سىبايلاس جەمقورلىققا اينالىپ وتىر.

بۇل تۋرالى ءماجىلىستىڭ جالپى وتىرىسىندا دەپۋتات ايقىن قوڭىروۆ ايتتى، دەپ حابارلايدى قازاقپارات ءتىلشىسى.

قازىرگى قوعامدا مەملەكەت قابىلدانعان شەشىمدەر مەن جاسالعان ءىس- ارەكەت ءۇشىن جەكە جاۋاپكەرشىلىك ساياساتىن بەلسەندى جۇرگىزىپ جاتىر. ازاماتتاردىڭ، بيزنەستىڭ جانە مەملەكەت قىزمەتىنىڭ ءتۇرلى باعىتتارى بويىنشا ازاماتتىق- قۇقىقتىق جاۋاپكەرشىلىكتى ساقتاندىرۋ ينستيتۋتى قالىپتاسۋدا.

«قازاقستان حالىق پارتياسى» فراكسياسى ۇكىمەتتىڭ نازارىن ازاماتتاردىڭ جەكە مۇلكىنىڭ قاۋىپسىزدىگىنە قاتىستى جاۋاپكەرشىلىگىن باقىلاۋدىڭ قولدانىستاعى تەتىگىنە اۋدارادى. اتاپ ايتقاندا، جەكە تۇلعالاردىڭ جەكە ماقساتتارى ءۇشىن پايدالانىلاتىن كولىك قۇرالىن مىندەتتى تەحنيكالىق بايقاۋدان وتكىزۋدى تالاپ ەتۋ تۋرالى ماسەلە كوتەرىلىپ وتىر.

2021 -جىلعى 1- قاراشاداعى جاعداي بويىنشا، قازاقستاندا جىل سايىنعى تەحنيكالىق بايقاۋدان وتۋگە مىندەتتى 2,7 ميلليون كولىك قۇرالى (جالپى كولىك سانىنىڭ % 72) بار. اۆتوكولىك يەلەرىنىڭ باسىم بولىگى زاڭعا باعىناتىن ازاماتتار. ولار 2-5 مىڭ تەڭگە ارالىعىندا ءتيىستى تولەمدى تولەيدى جانە تەحنيكالىق بايقاۋدان وتكەنى تۋرالى اكت الادى»، - دەپ توقتالدى ا. قوڭىروۆ.

ونىڭ ايتۋىنشا، وسى سالانىڭ باسەكەلى ورتاعا بەرىلگەنىنە جانە تەحنيكالىق بايقاۋ وتكىزەتىن جەكە ستانسيالار جەلىسىنىڭ قۇرىلعانىنا قاراماستان، تەحنيكالىق بايقاۋدان ءوتۋ ءراسىمى فورمالدى تۇردە اتقارىلىپ، سىبايلاس جەمقورلىققا اينالىپ وتىر.

«2021 -جىلى كولىك كوميتەتىنىڭ قىزمەتكەرلەرى قۇرعان ۇيىمداسقان قىلمىستىق توپتىڭ (ۇ ق ت) جولى كەسىلدى. 2017-2021 -جىلدار ارالىعىندا ۇ ق ت ناقتى تەحنيكالىق بايقاۋسىز 260 مىڭنان استام دياگنوستيكالىق كارتا جاساعان. بۇل ءىستى ەل بويىنشا جالعان تۇلعالارعا تەك «قاعاز جۇزىندە» راسىمدەلگەن 28 كومپانيا جۇزەگە اسىرعان. تىركەلگەن مەكەنجايلاردا تەحنيكالىق بايقاۋ ورتالىقتارى، قولدانىستاعى زاڭناماعا سايكەس، قاجەتتى تەحنيكالىق جابدىق، تەحنيكالىق بايقاۋ وتكىزەتىن جەر جانە مامان بولماعان.

«تەحنيكالىق بايقاۋ فورمالدى شاراعا اينالىپ، سىبايلاس جەمقورلىق تاۋەكەلىن تۋعىزعان جانە كولىك قۇرالى يەسى مەن جول قوزعالىسىنىڭ باسقا قاتىسۋشىلارىنىڭ قاۋىپسىزدىگىن قامتاماسىز ەتۋگە ىقپال ەتپەگەن. «قازاقستان حالىق پارتياسى» فراكسياسى ەلىمىزدەگى اۆتوبۋستاردان، جۇك كولىكتەرىنەن جانە تاكسي رەتىندە كوممەرتسيالىق ماقساتتا پايدالانىلاتىن كولىك قۇرالدارىنان باسقا اۆتوكولىكتەردىڭ مىندەتتى تەحنيكالىق بايقاۋىن جانە كولىك يەلەرىن اكىمشىلىك جاۋاپكەرشىلىككە تارتۋدى الىپ تاستاۋ ورىندى دەپ سانايدى»، - دەدى ا. قوڭىروۆ.

اۆتور: رۋسلان عابباسوۆ