قازاقستان حالقىنا قورى: ەڭ العاشقى قايىرىمدىلىق كومەك كىمدەرگە كورسەتىلەدى

None
None
نۇر- سۇلتان. قازاقپارات - «قازاقستان حالقىنا» قورىنىڭ ءتوراعاسى بولات جامىشيەۆ قور جۇمىسى تۋرالى ايتا كەلە، ەڭ الدىمەن كىمدەرگە كومەك كورسەتىلەتىنىن ءمالىم ەتتى، دەپ حابارلايدى قازاقپارات ءتىلشىسى.

«ارينە، قور حالىقتىڭ الەۋمەتتىك جاعدايىن جاقسارتۋ جولىندا جۇمىس ىستەيدى. دەگەنمەن ءبىر قورعا سەنىم ارتىپ، سودان ەلدىڭ جاعدايى جاقسارىپ كەتەدى دەگەن قاتە تۇسىنىك. ءبىز مەملەكەتتىك ورگاندار ىسكە اسىرىپ جاتقان الەۋمەتتىك قولداۋ شارالارىن قايتالامايمىز. قازىر ءبىز ۇيىمداستىرۋ جۇمىسىمەن اينالىسىپ جاتىرمىز. سونىمەن قاتار العاشقى كومەك بەرۋ شاراسىن دا قولعا الدىق. ءبىزدىڭ العاشقى قايىرىمدىلىق جوبامىز - جاپپاي تارتىپسىزدىك كەزىندە قىزمەت بارىسىندا قازا بولعان قۇقىق قورعاۋ جانە اسكەريلەردىڭ وتباسىنا كومەك. جانە اۋىر دەرتكە شالدىققان بالالارعا كومەك كورسەتكىمىز كەلەدى. بۇگىندە جۇمىس وسى باعىتتا ءجۇرىپ جاتىر. ارينە، مەملەكەت تاراپىنان كومەك كورسەتىلىپ جاتىر، دەگەنمەن قولداۋ جاعى جەتپەي جاتقان جاندار دا بارشىلىق»، - دەدى بولات جامىشيەۆ «حابار 24» ارناسىنىڭ ەفيرىندە.

سونداي- اق، ەفير قوناعى قوردىڭ شتاتىنا قاتىستى تۇسىنىك بەردى.

«قوردىڭ شتاتى ۇلكەن ەمەس، بار- جوعى 25 ادام. ەسكەرەتىن جايت، قورعا كۇنىنە ەلدىڭ تۇكپىر- تۇكپىرىنەن قانشاما قاراجات ءتۇسىپ جاتىر. 25 ادام ونىڭ بارىنە ەسەپ جۇرگىزە المايدى. سوندىقتان ءبىز وڭىرلەر بويىنشا قوعامدىق قايىرىمدىلىق ۇيىمدارىمەن بىرىگىپ جۇمىس ىستەيتىن بولامىز. ءبىز ولاردى قارجىلاندىرمايمىز، تەك سەرىكتەس رەتىندە جۇمىس ىستەيمىز. ياعني اتالعان قوعامدىق ۇيىمدار بىزگە كومەككە مۇقتاج جاندار مەن ولاردىڭ قۇجاتتارىن راسىمدەپ بەرەدى. ال ءبىز ءبارىن تەكسەرىپ، قايىرىمدىلىق جاساۋ تۋرالى شەشىم قابىلدايمىز»، - دەيدى ول.

اۆتور: ءالي يبرايەۆ


سوڭعى جاڭالىقتار