مەملەكەتتىك ورگاندار بارلىق اقپاراتتى اشىق ءبولىسىپ وتىر - ەرلان قارين

نۇر- سۇلتان. قازاقپارات - مەملەكەتتىك ورگاندار بارلىق اقپاراتتى اشىق ءبولىسىپ وتىر.

بۇل تۋرالى ق ر مەملەكەتتىك حاتشىسى ەرلان قارين ءمالىم ەتتى، دەپ حابارلايدى قازاقپارات ءتىلشىسى.

«بيلىك العاشقى كۇننەن- اق قارقىندى، اشىق اقپاراتتىق ساياسات جۇرگىزدى. وكىنىشكە وراي، ەڭ العاشقى كۇندەرى اشىق اقپاراتتىق شابۋىلمەن بەتپە- بەت كەلدى. تەرىس حابارلاردىڭ، جالعان اقپاراتتاردىڭ ۇلكەن لەگى جالعاسىپ جاتىر. مەملەكەتتىك ورگاندارعا، قۇقىق قورعاۋ ورگاندارىنا احۋالدى تۇراقتاندىرۋ ءىس- شارالارىن قابىلداۋدان بولەك اقپاراتتىق شابۋىلعادا الاڭداپ، ولارعا تويتارىس بەرۋگەتۋرا كەلدى. وكىنىشكە وراي، ولار ۇيىمدسقان تۇردە جان- جاقتان جۇزەگە اسىرىلىپ جاتىر تەرىس اقپاراتتىق شابۋىلدىڭ ىشكى دە، سىرتقى دا كوزدەرى بار. سوندىقتان الۋان ءتۇرلى كۇش- جىگەردى قولدانۋعا تۋرا كەلدى. مەنىڭشە، ءبىز احۋالدى شىن مانىندە جەڭە الدىق»، - دەدى مەملەكەتتىك حاتشى «حابار 24» تەلەارناسىنا بەرگەن سۇحباتىندا.

ونىڭ اتاپ وتۋىنشە، مەملەكەتتىك ورگاندار بۇقارالىق اقپارات قۇرالدارىنا تىكەلەي شىعۋ ادىسىنە كوشىپ، بارلىق اقپاراتتى اشىق ءبولىسىپ وتىر.

«ماسەلەن، وتكەن اپتادا باس پروكۋراتۋرا توتەنشە جاعداي ارەكەت ەتكەن ۋاقىتتا جانە وزگە دە وقيعالار كەزىندە ۇستالعان ادامداردىڭ سانى تۋرالى اقپارات تاراتتى. بۇل اتالعان ماسەلە توڭىرەگىندەگى احۋالدى بىردەن اشىپ بەردى. ەستەرىڭىزدە بولسا، ءتىپتى امەريكالىق جاڭالىق ارنالارى، ونىڭ ىشىندە CNN قازاقستاندا 10 مىڭداي ادامنىڭ ۇستالعانى تۋرالى حابار جاريالادى. ءبىراق، باس پروكۋراتۋرا بارلىق ءمان- جايدى ۇسىنىپ، اقپارات تاراتتى. وندا اكىمشىلىك قۇقىق بۇزعانى ءۇشىن جالپى شامامەن 2 مىڭ ادامنىڭ ۇستالعانى كورسەتىلگەن. وسىدان كەيىن بىردەن پرەزيدەنتتىڭ ءاربىر ءىستىڭ ءمان- جايىن انىقتاپ، اۋىرلاتاتىن ساتتەر بولماعان جاعدايدا جازانى جەڭىلدەتۋ ءىس- شارالارىن قابىلداۋ تاپسىرماسى شىقتى. بۇگىندە باس پروكۋراتۋرا 1400 تۇلعاعا قاتىستى جازانى جەڭىلدەتۋ تۋرالى ءوتىنىش بەرىپ، قازىردىڭ وزىندە 400 ادام بوساتىلدى»، - دەدى ەرلان قارين.

سونىمەن قاتار ول جوسپارلى جۇمىستىڭ جۇرگىزىلىپ جاتقانىن باسا ايتتى.

«ەستەرىڭىزدە بولسا، باس پروكۋراتۋرانىڭ دەنساۋلىق ساقتاۋ مينيسترلىگىنىڭ وكىلىمەن بىرگە قازا تاپقان ازاماتتاردىڭ سانىنا قاتىستى بىرلەسكەن بريفينگى بولدى. بۇل دا اتالعان تاقىرىپتاعى ءتۇرلى ساۋالداردى جويدى. ىشكى ىستەر مينيسترلىگى وقيعالاردىڭ جالپى تىزبەگىن ۇسىندى. بۇل دا ازاماتتارعا سول كۇندەردەگى وقيعالارعا قاتىستى جالپى ءمان- جايدى ۇعىنۋ ءۇشىن مۇمكىندىك بەردى. ءاربىر باعىتتا ناتيجەلەر بار»، - دەدى ەرلان قارين.

اۆتور: مارلان جيەمباي