قورداعى ءار تەڭگەنىڭ قايدا جۇمسالعانىن ەل كورىپ وتىرادى - بولات جامىشيەۆ

نۇر- سۇلتان. قازاقپارات - «قازاقستان حالقىنا» قورىنىڭ ءوز سايتى بولادى. سايتتا جينالعان جانە جۇمسالعان قارجىعا قاتىستى دەرەكتەر اشىق كورسەتىلەدى. بۇل تۋرالى قور ءتوراعاسى بولات جامىشيەۆ ءمالىم ەتتى، دەپ حابارلايدى قازاقپارات ءتىلشىسى.

«قوردىڭ قامقورشىلىق كەڭەسىنە قاتىستى دا كوپ سۇراق تۋىنداپ جاتىر. كەڭەس مۇشەلەرىن كىم سايلادى، نەگە حالىق تالقىسىنا سالمادى دەگەن سەكىلدى. قور مەملەكەت باسشىسىنىڭ باستاماسىمەن قۇرىلدى. ارينە، قورعا قارجى اۋدارعان قوعامدىق ۇيىم نەمەسە جەكە تۇلعا ونىڭ قايدا جۇمسالىپ جاتقانىن بىلۋگە قۇقىلى. جينالعان قاراجاتتىڭ ءتيىمدى جۇمسالۋىنا قاتىسى ۇكىمەتكە دە الەۋمەتتىك جاۋاپكەرشىلىك جۇگى ارتىلادى. سوندىقتان كەڭەس مۇشەلەرىن ۇكىمەت بەكىتىپ، بىزگە ۇسىندى. ءوز باسىما كەلسەم، قور ءتوراعاسى رەتىندە قامقورشىلىق كەڭەس قۇرامىندا مەن دە بارمىن. ماعان قور جۇمىسىن ۇيىمداستىرۋ، جۇرگىزۋ مىندەتى جۇكتەلگەن»، - دەدى بولات جامىشيەۆ «حابار 24» ارناسىنىڭ ەفيرىندە.

ونىڭ ايتۋىنشا، قوعامدىق جۇمىس حالىق ءۇشىن اشىق تۇردە جۇزەگە اسۋى ءتيىس.

«ءوز سايتىمىزدى ازىرلەيمىز. قورعا تۇسكەن ءار تەڭگە جانە ونىڭ قايدا جۇمسالعانى تۋرالى ەسەپ بەرىلەدى. ول ەسەپ سايتقا جاريالانادى. قازىر وسى جۇمىستى ۇيىمداستىرۋمەن اينالىسىپ جاتىرمىز»، - دەيدى ول.

بۇعان دەيىن «قازاقستان حالقىنا» قورىنىڭ قۇرىلتايشىلارىنا قاتىستى مالىمەت بەرىلدى.

اۆتور: ءالي يبرايەۆ