بۇگىننەن باستاپ الماتى اۋەجايى شتاتتىق رەجيمدە جۇمىس ىستەيدى

الماتى. قازاقپارات - الماتى اۋەجايى شتاتتىق رەجيمدە جۇمىس ىستەيدى. بۇل تۋرالى اۋەجايدىڭ باسپا ءسوز قىزمەتى ءمالىم ەتتى، دەپ حابارلايدى قازاقپارات ءتىلشىسى.

«الماتىدا توتەنشە جاعداي رەجيمى جانە كومەندانتتىق ساعاتتىڭ اياقتالۋىنا بايلانىستى 19-قاڭتاردان باستاپ الماتى حالىقارالىق اۋەجايى شتاتتىق رەجيمدە جۇمىسىن جۇرگىزەدى»، - دەلىنگەن حابارلامادا.

ەسكە سالا كەتەيىك، 5-قاڭتاردان 19-قاڭتارعا دەيىن پرەزيدەنت قاسىم- جومارت توقايەۆتىڭ جارلىعىمەن ەلدەگى قيىن جاعدايعا بايلانىستى توتەنشە جاعداي جاريالانىپ، تۇنگى ساعات 23:00 دەن تاڭعى 7:00 گە دەيىن كومەندانتتىق ساعات ەنگىزىلگەن بولاتىن.