USD 422.01 EUR 452.06
RUB 6.75 CNY 62.72
جاڭالىقتار

مارستا كومىرتەگىنىڭ ەرەكشە ءتۇرى تابىلدى

18 قاڭتار 22:30
:ءبولىسۋ
مارستا كومىرتەگىنىڭ ەرەكشە ءتۇرى تابىلدى

نۇر-سۇلتان. قازاقپارات - NASA- نىڭ Curiosity روۆەرى قىزىل پلانەتادا كومىرتەگىنىڭ ەرەكشە ءتۇرىن تاپتى. بۇل تۋرالى NASA جازدى.

روۆەر مارس تاۋ جىنىستارىنىڭ ۇلگىلەرىنەن الىنعان مارس مەتان مولەكۋلالارىنداعى كومىرتەگى يزوتوپتارىنىڭ ۇلەسىن تالدادى. زەرتتەۋ ناتيجەلەرى مەتاننىڭ يزوتوپتىق قۇرامى جەردەگى باكتەريالار تۇزەتىن گازعا جاقىن ەكەنىن كورسەتتى.

كومىرتەكتىڭ 12 جانە 13 دەپ اتالاتىن تۇراقتى يزوتوپى بار. عالىمدار ۇلگىلەردەگى ءارقايسىسىنىڭ سالىستىرمالى مولشەرىن تۇسىنۋگە تىرىسىپ جاتىر.

«ۇلگىلەردە 13 كومىرتەگىسى جوقتىڭ قاسى. بۇل قازىرگى اۋستراليانىڭ ورنىندا 2,7 ميلليارد جىل بۇرىن پايدا بولعان باكتەريالىق تەكتى ەڭ كونە تاۋ جىنىستارىنىڭ شوگىندىلەرىنە ۇقسايدى»، - دەدى پەنسيلۆانيا ۋنيۆەرسيتەتىنىڭ پروفەسسورى (ا ق ش) كريستوفەر حاۋس.

بۇل رەتتە عالىم ازىرگە بۇل كەن ورىندارى ءتىرى اعزالاردىڭ قاتىسۋىنسىز پايدا بولۋى مۇمكىن ەكەنىن جوققا شىعارۋعا بولمايتىنىن باسا ايتتى. سوندىقتان زەرتتەۋشىلەر روۆەر قىزىل عالامشاردا ەجەلگى تىرشىلىكتىڭ ىزدەرىن تاۋىپ، دەرەكتەر جيناۋدى جالعاستىرادى دەپ ۇمىتتەنىپ وتىر.

عالىمدار تۇسىندىرمەسى قانداي بولسا دا، بۇل پروتسەستەر ادەتتە جەردە بولاتىن كەز كەلگەن نارسەگە ۇقسامايدى.

بۇعان دەيىن عالىمدار مارستىڭ ىشكى بولىگى ميكروبتاردىڭ ءومىر سۇرۋىنە قولايلى جاعداي جاراتا الاتىنىن انىقتادى. قىزىل عالامشاردىڭ ىشكى بولىگى ميكروبتاردى ەنەرگيامەن جانە بارلىق قاجەتتى زاتتارمەن قامتاماسىز ەتەدى.

ايتا كەتەيىك، بىلتىر جىل سوڭىندا بولونيا ۇلتتىق استروفيزيكا ينستيتۋتىنىڭ عالىمدارى مارستا شىنىندا سۋ بار ەكەنىن دالەلدەيتىن مالىمەتتەردى جاريالاعان بولاتىن. رەسەيلىك جانە نيدەرلاندىق عالىمدار ExoMars-TGO زوندى ارقىلى مارستاعى مارينەر اڭعارىنداعى ءىرى مۇز شوگىندىلەرىن انىقتادى.

«TGO زوندى مارستاعى شاڭ مەن توپىراق استىندا بۇرىن انىقتالماعان سۋ قورىن تاپتى. اتاپ ايتقاندا، زوندتاعى FREND قۇرىلعىسى مارينەر القابىنىڭ كانوندىق جۇيەسىندە بەتىنىڭ %40 مۇزبەن جابىلعان اۋماقتى انىقتادى»، - دەلىنگەن حابارلامادا.

مۇز تابىلعان اۋماق لادوگا كولىنەن شامامەن 2,5 ەسە ۇلكەن. مارينەر القابى - قىزىل پلانەتانىڭ وڭتۇستىك جارتى شارىندا ورنالاسقان الىپ كانوندار جۇيەسى. ونىڭ ۇزىندىعى - 4,5 مىڭ ك م، تەرەڭدىگى - 11 ك م.

زەرتتەۋشىلەر مۇنداي قورىتىندىعا 2012-جىلعى مامىر مەن 2015-جىلعى جەلتوقسان ارالىعىنداعى «Mars Express» وربيتالىق زوندىمەن جاسالىنعان وڭتۇستىكتەگى مارس ماسساسىنىڭ 29 راديولوكاتسيالىق بەينەسىن تالداعاننان كەيىن كەلىپ وتىر.

عالامشاردىڭ وڭتۇستىك پوليۋسىندەگى -68 گرادۋس تەمپەراتۋراداعى مۇزدىڭ تەرەڭدىگى 1,5 شاقىرىم. ءدال وسى مۇز استىندا زەرتتەۋشىلەر كىشىگىرىم كول بار دەپ وتىر.

massaget.kz


#الةم  
:ءبولىسۋ
سونداي-اق... وقىڭىز
پئكئر قالدئرؤ
+7
جئبةرؤ

مۇراعات