كوروناۆيرۋس: قازاقستاندا كارانتين مەرزىمى قىسقارۋى مۇمكىن

نۇر-سۇلتان. قازاقپارات - ق ر د س م سانيتارلىق-ەپيدەميولوگيالىق باقىلاۋ كوميتەتىنىڭ ءتوراعاسى ايجان ەسماگامبەتوۆا كوروناۆيرۋسپەن اۋىراتىن ناۋقاستاردىڭ، سيمپتومسىز جانە بايلانىستا بولعانداردىڭ كارانتينىن قىسقارتۋ تۋرالى پىكىر ءبىلدىردى، دەپ حابارلايدى قازاقپارات.

«قازىرگى ۋاقىتتا رەسەي كارانتيندى 7 كۇنگە دەيىن قىسقارتاتىندارىن مالىمدەدى. قازاقستاندا مۇنداي ماسەلە قاراستىرىلىپ جاتىر ما؟»، - دەپ سۇراق قويدى جۋرناليست ورتالىق كوممۋنيكاتسيالار قىزمەتىندە.

«ءيا، ءبىز جۇما كۇنى ارىپتەستەرىمىزبەن ZOOM- كەزدەسۋ وتكىزدىك، حالىقارالىق تاجىريبەنى زەرتتەدىك. شىنىندا دا، الەمدە قازىر كارانتين مەرزىمى قىسقارىپ كەلەدى. ازىرگە ءبىز باس مەملەكەتتىك دارىگەردىڭ قاۋلى جوباسىنا بايلانىستا بولعان جانە سيمپتومسىز ادامدار 10 كۇنگە دەيىن كارانتيندە بولادى دەپ ەنگىزۋدى قاراستىرىپ وتىرمىز»، - دەدى ايجان ەسماعامبەتوۆا.

سپيكەر جەتىنشى تاۋلىكتە تەستىلەۋ وتكىزىپ، تەرىس ناتيجە بولعان جاعدايدا 7 كۇننەن كەيىن كارانتيندى اياقتاپ، جۇمىسقا شىعۋ قۇقىعى بەرىلەتىنىن ايتتى.

«ەگەر تەستىلەۋ قانداي دا ءبىر سەبەپتەرمەن وتكىزىلمەسە، ءتىپتى تەستىلەۋ جاساعىسى كەلمەيتىن ازاماتتار بار، ولار كارانتيننىڭ اياقتالۋىن كۇتەدى. ولار ءۇشىن كارانتين 10 كۇن بويى ساقتالادى. ياعني، 10 كۇننەن كەيىن ولار پ ت ر- تەست تاپسىرماي، كارانتيندى اياقتاپ، جۇمىسقا شىعا الادى»، - دەپ ناقتىلادى كوميتەت ءتوراعاسى.

ايتا كەتەيىك، قازىرگى ۋاقىتتا ناۋقاستار ءۇشىن كارانتين مەرزىمى 14 كۇندى قۇرايدى.