USD 425.02 EUR 450.1
RUB 7.17 CNY 63.75
جاڭالىقتار

ەلدەگى ءمايىتحانالاردىڭ قاۋىپسىزدىگى كۇشەيتىلەدى

18 قاڭتار 21:41
:ءبولىسۋ
ەلدەگى ءمايىتحانالاردىڭ قاۋىپسىزدىگى كۇشەيتىلەدى

نۇر-سۇلتان. قازاقپارات - ق ر پرەمەر-ءمينيسترىنىڭ ورىنباسارى ەرالى توعجانوۆ ەلدەگى ءمايىتحانالاردىڭ قاۋىپسىزدىگى كۇشەيتىلەتىنىن ءمالىم ەتتى، دەپ حابارلايدى قازاقپارات ءتىلشىسى.

ورتالىق كوممۋنيكاتسيالار قىزمەتىندە وتكەن بريفينگىدە ب ا ق وكىلى ەلدەگى تارتىپسىزدىكتەر بارىسىندا ءمايىتحانالاردان مۇردەلەردىڭ ۇرلانعانىنا قاتىستى رەسمي مالىمەتتى ەسكە سالىپ، اتالمىش نىسانداردىڭ قاۋىپسىزدىگى بويىنشا ساۋال قويدى.

«ونىڭ بارىنە قازىر تاپسىرما بەرىلگەنىن بىلەسىزدەر. قاسىم-جومارت كەمەل ۇلى تىكەلەي تاپسىرما بەردى. وعان بايلانىستى مەملەكەتتىك ورگانداردىڭ ءبارى جوسپارىن جاساپ جاتىر. 51 دەن استام ناقتى تاپسىرما جۇكتەلدى. سونىڭ ىشىندە ءسىز كوتەرگەن ماسەلە دە بار. سوندىقتان ونىڭ ءبارى بولاشاقتا رەتتەلەدى. كەمشىلىكتەر بولمادى دەپ ايتا المايمىز. كەمشىلىكتەر بولعانىن دا جاقسى بىلەمىز. سونىڭ ءبارىن ەسكەرە وتىرىپ، بولاشاقتا قاۋىپسىزدىكتەرىن قامتاماسىز ەتۋگە بايلانىستى بۇكىل شارالاردىڭ قابىلداناتىنىنا ەشقانداي كۇمانىم جوق»، - دەدى پرەمەر-ءمينيستردىڭ ورىنباسارى.

اتالمىش بريفينگىدە ەرالى توعجانوۆ كوروناۆيرۋسقا قارسى قازاقستاندىق ۆاكسينانى تىركەۋ 2022-جىلدىڭ سوڭىنا قاراي باستالۋى مۇمكىن ەكەنىن اتادى.

«سىزدەر تۇسىنۋلەرىڭىز كەرەك. ناقتى ولشەمدەر بار. قازاقستان باسىندا ۇلتتىق رەتتەۋشىنىڭ ءبىرىنشى دەڭگەيىندە بولعان. سەگىز ايدىڭ ىشىندە ەكىنشى دەڭگەيگە شىقتىق. ەندى سونى 2022-جىلدىڭ اياعىنا قاراي ءۇشىنشى دەڭگەيگە جەتكىزۋ مىندەتى قويىلىپ وتىر. قازاقستان ۇلتتىق رەتتەۋشىنىڭ ءۇشىنشى دەڭگەيىنە جەتكەن كەزدە ءبىزدىڭ ۆاكسينانى دۇنيەجۇزىلىك دەنساۋلىق ساقتاۋ ۇيىمى رەسمي تۇردە قارايتىن بولادى. بۇل - حالىقارالىق ستاندارتتار، بۇل - تالاپ»، - دەدى ول ب ا ق وكىلىنىڭ ساۋالىنا بەرگەن جاۋابىندا.



:ءبولىسۋ
سونداي-اق... وقىڭىز
پئكئر قالدئرؤ
+7
جئبةرؤ

مۇراعات