توي-جيىندى، نەگىزسىز باس قوسۋ مەن قىدىرۋدى ۋاقىتشا توقتاتۋ كەرەك - ەرالى توعجانوۆ

نۇر-سۇلتان. قازاقپارات - ق ر پرەمەر-ءمينيسترىنىڭ ورىنباسارى ەرالى توعجانوۆ كوروناۆيرۋستىڭ ورشۋىنە بايلانىستى توي-جيىندى، وتباسىلىق مەرەكەلەردى، نەگىزسىز باس قوسۋ مەن قىدىرۋدى ۋاقىتشا توقتاتۋعا شاقىردى، دەپ حابارلايدى قازاقپارات ءتىلشىسى.

«قۇرمەتتى ازاماتتار! بۇگىندە ەلدەگى قوعامدىق-ساياسي جاعداي تۇراقتالدى. قالپىنا كەلتىرۋ جۇمىستارى ءجۇرىپ جاتىر. الايدا كوروناۆيرۋس ىندەتى ءورشىپ بارادى. سوندىقتان ماسكا كيۋ، الەۋمەتتىك قاشىقتىقتى ساقتاۋ جانە ت. ب. الدىن الۋ شارالارىن قولدانۋ قاجەت. تويدى، جيىندى، وتباسىلىق مەرەكەلەردى، نەگىزسىز باس قوسۋدى، قىدىرۋدى ۋاقىتشا توقتاتۋ كەرەك. اۋرۋ ادامدار وقشاۋلانۋ كەرەك. بۇل - بۇگىنگى كۇننىڭ، بۇگىنگى جاعدايدىڭ تالابى. بۇل - اينالاداعى ءسىز جاقسى كورەتىن ادامدارعا قاۋىپ توندىرمەۋدىڭ جولى! بۇل - جالپى سانالى قوعامنىڭ ءار ازاماتىنىڭ موينىنا الاتىن جاۋاپكەرشىلىگى»، - دەدى ە. توعجانوۆ ورتالىق كوممۋنيكاتسيالار قىزمەتىندە.

پرەمەر-مينيستر ورىنباسارى سانالى قوعامنىڭ جاۋاپتى ادامداردان قۇرالاتىنىن اتاپ ءوتتى. الەۋمەتتىك جاۋاپكەرشىلىككە اكەلەتىن قوعامدىق سانا، سانالى قوعام قالىپتاستىرۋعا ءار ازامات ءوز ۇلەسىن قوسۋى كەرەك. «اۋىرىپ ەم ىزدەگەنشە، اۋىرمايتىن جول ىزدەيىك، اعايىن! وسى رەتتە ۇكىمەت تاراپىنان بيزنەس سۋبەكتىلەرىنىڭ جۇمىسىنا كەدەرگى كەلمەۋى ءۇشىن بارىنشا شارالار قابىلدانىپ وتىر. سوندىقتان Ashyq جوباسىن سىزدەر مەن بىزدەردىڭ اماندىعىمىز، ساۋلىعىمىز ءۇشىن ءارى قاراي دامىتا بەرۋىمىز كەرەك. بارلىق قولدانىلىپ جاتقان شارالار حالقىمىزدىڭ دەنساۋلىعىن قورعاۋعا باعىتتالعانىن تاعى دا اتاپ وتەمىن. ءبىزدىڭ باقىتىمىزدىڭ وننان توعىزى دەنساۋلىعىمىزعا بايلانىستى. سوندىقتان، قۇرمەتتى قازاقستاندىقتار، سىزدەرگە جانە جاقىندارىڭىزعا دەنساۋلىق تىلەيمىن»، - دەدى ە. توعجانوۆ.