كوروناۆيرۋس قاي وڭىرلەردە ءورشىپ تۇر؟

نۇر-سۇلتان. قازاقپارات - ق ر پرەمەر-ءمينيسترىنىڭ ورىنباسارى ەرالى توعجانوۆ كوروناۆيرۋس ينفەكتسياسى قاي وڭىرلەردە ءورشىپ تۇرعانىن باياندادى، دەپ حابارلايدى قازاقپارات ءتىلشىسى.

تۇركىستان وبلىسىن قوسپاعاندا، ەلىمىزدىڭ بارلىق ءوڭىرى قىزىل ايماققا ەندى. اۋرۋشاڭدىق دەڭگەيى بويىنشا نۇر-سۇلتان، الماتى قالالارى، قاراعاندى جانە اتىراۋ وبلىستارى كوش باستاپ تۇر. جەلتوقسان ايىنىڭ سوڭىندا ستاتسيونارلاردا 3 مىڭنان از ادام ەم السا، بۇگىندە ناۋقاستار سانى 7 مىڭنان استى. ەمحانالار دەڭگەيىندە ەمدەلەتىن ناۋقاستار سانى دا 4,8 ەسەگە ارتتى»، - دەدى ە. توعجانوۆ ورتالىق كوممۋنيكاتسيالار قىزمەتىندە.

ءبىر عانا نۇر-سۇلتان قالاسى بويىنشا ستاتسيونارلاردا ەم الاتىن ادامداردىڭ سانى 200 ادامنان 1000 عا دەيىن، ياعني 5 ەسەگە وسكەن. بۇل جاعداي دەنساۋلىق ساقتاۋ جۇيەسىنە ۇلكەن جۇكتەمە ارتىپ وتىر.

وسىعان بايلانىستى ۆەدومستۆوارالىق كوميسسيا قوسىمشا شەكتەۋ شارالارىن قابىلدادى.

«ياعني ۆاكسينالاۋ مارتەبەسىنە قاراماستان، شەتەلدەن كەلگەندەردىڭ بارلىعىندا تەرىس پ ت ر تەستىنىڭ بولۋى مىندەتتەلدى. Ashyq باعدارلاماسى بويىنشا «جاسىل» مارتەبە بولعاندا عانا جۇمىس ىستەۋگە رۇقسات ەتىلگەن وبەكتىلەر تىزبەسى كەڭەيتىلدى. وڭىرلەردەگى ەپيدەميولوگيالىق احۋالعا بايلانىستى وقۋشىلاردى، ستۋدەنتتەردى وقىتۋعا ديففەرەنتسيالدى ءتاسىل قولدانىلادى. حالىق كوپ جينالاتىن ورىندارعا قوسىمشا شەكتەۋلەر ەنگىزىلدى. بۇل ءماجبۇرلى شارالار، ەڭ الدىمەن، ازاماتتارىمىزدى قورعاۋعا باعىتتالعان»، - دەپ ءتۇسىندىردى ە. توعجانوۆ.