الەم ەلدەرىندە قىس قاھارىنا ءمىندى

None
None
نۇر-سۇلتان.قازاقپارات - گرەكيانىڭ ساموتراكي ارالى قالىڭ قار قۇرساۋىندا قالدى. مامانداردىڭ ايتۋىنشا، جاۋعان اق ۇلپانىڭ قالىڭدىعى بىرنەشە مەتردەن اسادى. تابيعاتتىڭ توسىن مىنەزىنەن شالعايداعى ەلدى مەكەن تۇرعىندارى ۇيلەرىندە قامالىپ وتىر.

تاس جولداردا كولىك قاتىناسى تەجەلگەن. اپاتتان جەرگىلىكتى حالىق جارىقسىز قالدى. كوممۋنالدىق قىزمەت پەن قۇتقارۋشىلار ءوڭىردى تازارتۋ جۇمىستارىنا كىرىسكەن.

گيورگوس ۆاسيلۋكاس، ءورت ءسوندىرۋشى:

- قيىن جاعدايعا تاپ بولعاندارعا قولدان كەلگەنشە كومەك كورسەتىپ جاتىرمىز. قاجەت بولسا، دىمكاس جاندارعا دارىگەرلەردى جەتكىزەمىز. كەي جەرلەردە جاۋعان قاردىڭ قالىڭدىعى 3 مەتردەن اسادى. ونىڭ ۇستىنە ايماقتا قاتتى جەل سوعىپ، قۇتقارۋ وپەراتسياسىنا كەدەرگى كەلتىرىپ تۇر.

قالىڭ قاردان گرۋزيا دا زارداپ شەكتى. ايماقتا داۋىل مەن كوكتايعاقتان تاس جولدار جابىلعان. باتۋميدەگى قارا تەڭىز جاعالاۋىنداعى كۋرورتقا ايتارلىقتاي شىعىن كەلدى. كەي جەرلەردە ەلەكتر ەنەرگياسى تورابى بۇلىنگەن. مامانداردىڭ بولجاۋىنشا، قولايسىز اۋا رايى اپتا سوڭىنا دەيىن جالعاسۋى مۇمكىن.

گەورگي سەرەتەلي، گرۋزيا اۆتوموبيل جولدارى دەپارتامەنتىنىڭ باسشىسى:

- ءىرى تاس جولداردا قوزعالىس قيىنداپ، جۇك كولىكتەرىنىڭ ءجۇرۋى شەكتەلگەن بولاتىن. قازىر جولدارداعى قار كۇرەلىپ، بىرتە- بىرتە اشىلىپ جاتىر. جۇرگىزۋشىلەرگە جىلدامدىقتى اسىرماي بارىنشا ابايلاپ ءجۇرۋدى ەسكەرتەمىز.

تونگو ارال- مەملەكەتىنىڭ جاعالاۋىندا جانارتاۋ وياندى. تابيعاتتىڭ توسىن مىنەزىنەن تىنىق مۇحيتىندا تسۋنامي باستالىپ پەرۋدىڭ بىرنەشە قالاسى سۋ استىندا قالدى. سالدارىنان كەي جەرلەردە سۋ دەڭگەيى بەلۋاردان اسادى. قازىر ايماقتاعى كەمەجايلار جۇمىسىن توقتاتتى. پەرۋدە اپاتتان 2 ادام وپات بولعان. سۋنامي قاۋپى كانادا، ا ق ش، جاپونيا، اۆستراليا مەن جاڭا زەلانديادا دا جاريالاندى.

تابيعات اپاتىنان ا ق ش- تىڭ بىرنەشە ەلدى مەكەنى شىعىنعا باتتى. ماسەلەن، قاتتى بوراننان اعاشتار قۇلاپ، دجوردجيا، فلوريدا، وڭتۇستىك جانە سولتۇستىك كارولينا شتاتتارىندا ەلەكتر جەلىلەرى ۇزىلگەن. فلوريدا شتاتىندا 50 گە جۋىق باسپانا قيراپ، جول اپاتى جيىلەدى. قاۋىپتى وڭىرلەردەن تۇرعىندار ەۆاكۋاتسيالانىپ جاتىر.

ال شارلوتت/دۋگلاس حالىقارالىق اۋەجايىندا 1200 رەيس ساپارعا شىعا الماي قالدى.

رەي كۋپەر، سولتۇستىك كارولينا شتاتىنىڭ گۋبەرناتورى:

- شتاتتا 4100-دەن استام ءۇي مەن جەكە نىسان جارىقسىز وتىر. جىلۋ دا ءوشتى. وكىنىشكە وراي، ەلەكتر جەلىلەرىن قالپىنا كەلتىرىپ ۇلگىرە الماي جاتىرمىز. كەرىسىنشە جارىق ءجيى ءسونۋى مۇمكىن. جارىقسىز جانە جىلۋسىز قالعان تۇرعىندارعا شۇعىل ارنايى ورتالىقتار ازىرلەۋگە كىرىستىك.

ءيزرايلدىڭ بىرنەشە قالاسى دا سۋ تاسقىنىنان زارداپ شەكتى. كوشەدە كولىك قوزعالىسى تەجەلگەندىكتەن حالىق قايىقپەن قاتىناۋعا ءماجبۇر. ءقازىر قار ارالاس جاۋىن جاۋىپ تۇر. سينوپتيكتەردىڭ ايتۋىنشا، نوسەر جاۋىننان كەيىن ايماقتا اۋا تەمپەراتۋراسى كۇرت تومەندەۋى مۇمكىن. جەلدىڭ ەكپىنى دە كۇشەيەدى دەلىنگەن.

www.24.kz

سوڭعى جاڭالىقتار