USD 429.57 EUR 447.35
RUB 6.94 CNY 63.23
جاڭالىقتار

كولەڭكەدەن تۇسكەن كولەڭكە

18 قاڭتار 08:02
:ءبولىسۋ
كولەڭكەدەن تۇسكەن كولەڭكە

نۇر-سۇلتان.قازاقپارات - ءسىز قابىرعاداعى ساعاتقا ۋاقىتتىڭ نەشە بولعانىن ءبىلۋ ءۇشىن قارايتىن شىعارسىز، ال ول ونىڭ تىقىلىنان وتكەن كۇندەردىڭ جاڭعىرىعىن ىزدەيدى.

ۋاقىت ارتقا جىلجىمايدى، ۇنەمى العا ۇمتىلادى. ونىڭ ۇلىلىعى سوندا. ءسىزدىڭ عۇمىر ساعاتىڭىز توقتاعان ساتتە عانا، ول دا ماڭگىلىك تىنىستايدى. ۇرشىقتاي اينالعان دۇنيە ۋىسىڭىزدان سىرعىپ بارا جاتقان ساتتە قۇمساعات عۇمىرىڭىز قۇتىدا ونگەن گۇلدەي سولادى ەمەس پە!؟ ءومىردىڭ وزىندەي…

مارك شاگالدىڭ «ساعات» اتتى كارتيناسى - شەبەردىڭ ەڭ جۇمباق جانە كوزدىڭ جاۋىن الاتىن تۋىندىسىنىڭ ءبىرى. كەنەپتە نالا مەن مۇڭ، ەلەڭ- الاڭ ساتتەر، جالعاندىق بار، ءتىپتى جوعالعان ۋاقىت سەزىمىن سىيلايدى.

كارتينانىڭ كەڭىستىگىن تولىقتاي اعاش ساعاتتىڭ بەينەسى الىپ جاتىر. كومپوزيتسيادا اعاش قۇرىلىمىنا ءتان قوڭىر رەڭك باسىم. قارا جانە قوڭىر شتريحتار بولمەنىڭ اشىق سارى فونىمەن ماتاسىپ، قويۋ تۇستەردىڭ شەرۋىن تۇزەدى. بۇل ءتۇستى شەشىم كەنەپكە الاڭداۋشىلىق پەن بەيداۋا كوڭىلدىڭ اۋەنىن بەرەدى.

ۇزدىكسىز سوققان ساعات جۇرەگى ەرتەڭ ۇمىتپەن ويانىپ، تاعى ءبىر تاڭنىڭ الديىندە تەربەلۋگە جول اشادى. سەنىمگە باعىنبايتىن ويلاردىڭ قاقپانىنا ءتۇسىپ قالماڭىز. قۇستىڭ شيقىلىنا قاراپ، كۇننىڭ قوزعالىسىن انىقتاۋعا بولادى.

شىعارمانىڭ ماسسيۆتىلىگى تومەنگى سول جاق بولىگىندەگى جاساندى كىشكەنتاي تەرەزە ارقىلى ەرەكشەلەنەدى. اينەكتىڭ ارتىنداعى قارا جانە كوك تاڭبالار سارىعا كونتراست بولىپ تۇر. ءسال قيسىق سىزىلعان تەرەزەنىڭ ۇستىندە كىشكەنتاي اشەكەيلەرى بار سارى پەردە كورىنەدى. بۇل بولمەنىڭ بارلىق ەلەمەنتى كەڭىستىكتەن وقشاۋ، مونوتوندى جانە ۋاقىتتىڭ شاراسىزدىعىن بەينەلەۋ ءۇشىن ءبىر ءتۇستى سحەمادا جازىلعاندىعىن مەڭزەپ تۇرعانداي. شاراسىزدىقتان اۋىر نە بار؟ !

تەرەزەنىڭ جانىنان الىسقا ويلى كوزبەن قاراعان ادامنىڭ كۇڭگىرت كولەڭكەسى كورىنەدى. بۇل كەسكىن ۇلكەن الاڭداۋشىلىققا جەتەلەيدى. بۇل ادام نە ويلاۋى مۇمكىن؟ ! ول تۇڭعيىققا باتقان كەمەدەي وي يىرىمىنە باتىپ بارادى. قۇددى كولەڭكەدەن تۇسكەن كولەڭكە ىسپەتتى.

ۋاقىتتىڭ بۇلجىماس اعىمىن، ارتتا قالعان ساتتەردى ەسكە تۇسىرەتىن الىپ ساعات تىقىلداپ، جالعىز قالعانىن جاريالايدى. قاراپايىم ادام قىمبات ساتتەردى جوعالتقان بەيباق سەكىلدى بار نارسەنى بويىنا سىڭىرگەن تۇتاس ەلەمەنتتىڭ فونىندا ەلەۋسىز فيگۋراداي كورىنەدى. ال ءسىز نە ويلايسىز؟ !.

مۇحتار كۇمىسبەك

egemen.kz


:ءبولىسۋ
سونداي-اق... وقىڭىز
پئكئر قالدئرؤ
+7
جئبةرؤ

مۇراعات