قازاقستاندىقتار شەتەلگە ءجيى اقشا جىبەرە باستادى - زەرتتەۋ

نۇر-سۇلتان. قازاقپارات - قازاقستاندىقتار 2021-جىلى 11 ايدا شەتەلگە 921,3 ميلليارد تەڭگە اۋداردى، - دەپ حابارلايدى Ranking.kz سايتى.

قازاقستان ەكونوميكاسىن باقىلاۋ جونىندەگى جوبا دەرەكتەرى بويىنشا، قاڭتاردان قاراشاعا دەيىنگى كەزەڭدە قازاقستاندىقتاردىڭ شەتەلدەن العان قاراجات كولەمى وزگەرمەگەن جانە 256,2 ميلليارد تەڭگە بولعان. بۇل 2020-جىلدىڭ وسى كەزەڭىنە قاراعاندا 0,8 پايىزعا از.

«2021-جىلى قاڭتار-قاراشادا جەكە تۇلعالاردىڭ شەتەلگە جىبەرگەن اقشا اۋدارىمدارى 921,3 ميلليارد تەڭگە بولدى. بۇل 2020-جىلدىڭ وسى كەزەڭىمەن سالىستىرعاندا 29,2 پايىزعا ارتىق»، - دەلىنگەن حابارلامادا.

شەتەلگە جىبەرىلگەن جانە شەتەلدەن الىنعان قاراجات كولەمى اراسىنداعى ايىرماشىلىق ءبىر جىل ىشىندە قازاقستاننان جىبەرىلگەن اۋدارىمدار پايداسىنا 2,8 ەسەدەن 3,6 ەسەگە دەيىن ءوستى.

«ەلدەن جىبەرىلگەن اقشا اۋدارىمدارىنىڭ كولەمى بويىنشا 2021-جىلدىڭ قاڭتارىنان قاراشاسىنا دەيىن وزبەكستان (278,5 ميلليارد تەڭگە)، تۇركيا (189,2 ميلليارد تەڭگە) جانە رەسەي (162,1 ميلليارد تەڭگە) كوش باستاپ تۇر، ولارعا جالپى كولەمنىڭ ۇشتەن ەكىدەن استامى تيەسىلى»، - دەلىنگەن Ranking.kz حابارلاماسىندا.