قازاقستاندا قانشا وقۋشى كوروناۆيرۋسقا قارسى ۆاكسينا الدى؟
«بۇگىندە 353,5 مىڭ وقۋشى (12 مەن 18 جاس ارالىعى) كوروناۆيرۋسقا قارسى ۆاكسينانىڭ ءبىرىنشى كومپونەنتىن الدى. بۇل ەلىمىز بويىنشا ەكپە الۋعا رۇقسات ەتىلگەن جاس وسپىرىمدەردىڭ 27,7 پايىزىن قۇرايدى. ەكىنشى كومپونەنتتى 182257 وقۋشى الدى. پايىزبەن شاققاندا 14,5 قۇرايدى. جاس وسپىرىمدەر اراسىندا ۆاكسينا الۋ جاعىنان كوشتى تۇركىستان وبلىسى باستاپ تۇر. ونداعى وقۋشىلاردىڭ 90 پايىزى ەكپەنىڭ ءبىرىنشى كومپونەنتىن الدى. ودان كەيىن ش ق و تۇر. اتالعان وبلىستا جاس وسپىرىمدەردىڭ 82 پايىزى ۆاكسينا سالدىردى»، - دەدى ق ر دەنساۋلىق ساقتاۋ مينيسترلىگى تاماقتانۋ، تاربيە جانە ءبىلىم بەرۋ وبەكتىلەرىن باقىلاۋ جانە قاداعالاۋ باسقارماسىنىڭ باسشىسى مارال راحىمجانوۆا ورتالىق كوممۋنيكاتسيالار قىزمەتىندە وتكەن باسپا ءسوز ءماسليحاتىندا.
ونىڭ ايتۋىنشا، وقۋشىلار اراسىندا ۆاكسينا الۋ پروتسەسى قارقىندى ءجۇرىپ جاتقانىنا قاراماستان مەكتەپتە كارانتين تالاپتارى ساقتالۋى ءتيىس.
«مەكتەپ جانە مەكتەپكە دەيىنگى ءبىلىم بەرۋ مەكەمەلەرىندە ساقتىق شارالارىن ەستەن شىعارماۋ كەرەك. تازالىق جۇمىستارى، ماسكا تاعۋ جانە اراقاشىقتى ساقتاۋدى ۇمىتپاعان ءجون. سونداي-اق ەلدەگى ەپيدجاعدايعا بايلانىستى مەكتەپ قابىرعاسىندا كوپشىلىكتىڭ قاتىسۋىمەن وتەتىن ءىس-شارالار وتكىزۋگە تىيىم سالىنادى»، - دەيدى ول.
اتالعان بريفينگىدە ءبىلىم مينيسترلىگى 3-توقساندا وقۋشىلاردىڭ ءبىلىم الۋ فورماتىنا قاتىستى تۇسىنىك بەردى. سونداي-اق مينيسترلىك 1-2- سىنىپ وقۋشىلارىن ءداستۇرلى فورماتتا وقىتۋدى ۇسىندى. ودان بولەك، «ەلدە بولعان جاپپاي تارتىپسىزدىكتەرگە بايلانىستى مەكتەپتە وقۋ جىلى سوزىلۋى مۇمكىن بە؟» دەگەن ساۋالعا جاۋاپ بەرىلدى.