USD 425.02 EUR 450.1
RUB 7.17 CNY 63.75
جاڭالىقتار

قىسقى وليمپيادا ويىندارىنا قاتىساتىن شىڭجاڭدىق بەس سپورتشىنىڭ ەكەۋى قازاق - شەتەلدەگى قازاق ءتىلدى ب ا ق-قا شولۋ

16 قاڭتار 17:45
:ءبولىسۋ
قىسقى وليمپيادا ويىندارىنا قاتىساتىن شىڭجاڭدىق بەس سپورتشىنىڭ ەكەۋى قازاق - شەتەلدەگى قازاق ءتىلدى ب ا ق-قا شولۋ

نۇر-سۇلتان. قازاقپارات - «قازاقپارات» ح ا ا ادەتتەگىدەي شەتەلدەگى قازاق تىلىندە تارايتىن اقپارات كوزدەرىنە اپتالىق شولۋىن ۇسىنادى.

بەيجىڭدەگى قىسقى وليمپيادا ويىندارىنىڭ العاشقى التىن مەدالى قاي جوبادا بەرىلەدى؟ - «حالىق گازەتى»


قار جوباسىنىڭ نەگىزگى تارماعى رەتىندە شاڭعى جارىسى «قارداعى اتلەتيكا» دەپ دە اتالادى. اتالمىش جوباعا بەيجىڭدەگى قىسقى وليمپيادا ويىندارى كەزىندە 12 التىن مەدال بولىنگەن. بەيجىڭدەگى قىسقى وليمپيادا ويىندارى كەستەسىنىڭ سوڭعى نۇسقاسىنا سايكەس، ءبىرىنشى جانە سوڭعى التىن مەدالدار شاڭعى جارىسىنا بەرىلەدى. بۇل شاڭعى جارىسىنىڭ قىسقى وليمپيادا ساحناسىنداعى ورنى ەرەكشە ەكەنىن كورسەتەدى، دەپ حابارلايدى people.cn.

اتالعان ب ا ق- تىڭ دەرەگىنشە، بەيجىڭ قىسقى وليمپياداسىنىڭ شاڭعى جارىسىندا جالپى 12 شاعىن جارىس وتەدى: 6 ەرلەر جانە 6 ايەلدەر جارىسى. وسى جولعى قىسقى وليمپيادا ويىندارىندا شاڭعى جارىسى ءۇشىن جالپى 296 ورىن بار. ەر-ايەلدەر سانى جەكە العاندا 148-دەن. ءاربىر كوماندا ەڭ كوبى 8 ايەل، 8 ەر، جالپى 16 سپورتشى جىبەرە الادى.

«شاڭعى جارىسى سولتۇستىك ەۋروپادان شىققان جانە ول 1924 -جىلى العاشقى قىسقى وليمپيادا ويىندارىنا ەنگەن بولاتىن. ۇزاق ۋاقىتتان بەرى نورۆەگيا قىسقى وليمپيادا ويىندارىندا شاڭعى جارىسىنىڭ سەركەسى بولىپ كەلدى. الايدا شۆەتسيا، فينليانديا، شۆەيتساريا، ا ق ش، رەسەي، يتاليا سياقتى ەۋروپا مەن امەريكا ەلدەرىنىڭ شاڭعى جارىسىنىڭ الەۋەتى دە قالىسا قويمايدى»، دەپ تۇيىندەيدى «حالىق گازەتى».

قازاقستان ەلشىلىگى ەلدەگى جاعدايعا بايلانىستى بريفينگ وتكىزدى - «ءو ز ا»

وزبەكستان استاناسى تاشكەنت قالاسىنداعى قازاقستان رەسپۋبليكاسىنىڭ ەلشىلىگى قازاقستانداعى بولعان جاعدايلارعا بايلانىستى بريفينگ وتكىزدى، دەپ حابارلادى «ءو ز ا» مەملەكەتتىك اقپارات اگەنتتىگى.

اتالعان ب ا ق- تىڭ كەلتىرگەن دەرەگىنە سۇيەنسەك، بۇل بريفينگكە قازاقستان رەسپۋبليكاسىنىڭ وزبەكستانداعى توتەنشە جانە وكىلەتتى ەلشىسى دارحان ساتىبالدى قاتىسىپ، جۋرناليستەرگە قازاقستانداعى بولىپ جاتقان جاعدايدى شەتەلدىك ب ا ق-تاردا جاريالانعان كەيبىر جالعان اقپاراتقا سەنىپ قالماي رەسمي مالىمەتتەرگە نازار اۋدارۋعا شاقىرىپ، بۇگىنگى احۋال تۋرالى اقپارات بەرگەن. سونداي-اق، جاڭالىقتاردى باقىلاي وتىرىپ، كەيبىر شەتەلدىك ب ا ق قازاقستانداعى بولىپ جاتقان جاعدايدى ءبىر جاقتى جاريالاپ وتىر. ۇ ق ش ۇ كۇشتەرىن قولدانۋ جانە بيلىكتىڭ بولىپ جاتقان وقيعالارعا رەاكسياسى تۋرالى قاتە تۇسىنىك بار ەكەنى ايتىلدى.

«بولعان وقيعالار جان-جاقتى سيپاتتا بولدى. تازا ەكونوميكالىق تالاپتاردان باستالعان نارازىلىق اكسيالارىن تەرروريستىك توپتار ەلدىڭ كونستيتۋتسيالىق قۇرىلىسىنا نۇقسان كەلتىرۋ ءۇشىن پايدالاندى...»، دەپ جازدى وزبەكستاندىق ب ا ق.

حالىق ءانى قانات بىتىرگەن قازاق جىگىتى - «حالىق گازەتى»


قىتايدىڭ ىلە ايماعى، تەكەس اۋدانىندا تۇراتىن باقتاشى قازاق جىگىتى ءىزباسار بەيسەنجان ۇلى ۇنەمى تاۋ بوكتەرىن انمەن جاڭعىرتىپ جۇرەدى. ول قازاقتىڭ حالىق اندەرىن ۇناتادى، بالا كەزىنەن انگە قۇمارتىپ وسكەن. ءىزباساردىڭ بۇكىل ءومىرى انمەن تەربەلىپ تۇراتىن سياقتى، دەپ حابارلايدى kaz.people.cn اقپاراتتىق پورتالى.


«ول دالادا ءيتىن ەرتە ءجۇرىپ تە، ۇيدە بالاسىن الديلەپ وتىرىپ تا، جارىنىڭ ىستەگەن تاماعىنىڭ وتتان ءتۇسۋىن كۇتىپ وتىرىپ تا اۋەلەتىپ ءان سالۋمەن بولادى. «ءان - مەنىڭ ءومىرىمنىڭ ءبىر بولشەگى»، - دەيدى ءىزباسار. اقجارقىن جىگىتتىڭ عۇمىرىنىڭ ءمانى دە، ءسانى دە اۋەنمەن ورنەكتەلىپ جاتقانداي»، دەپ جازادى «حالىق گازەتى». ​

«قازاقستان مەن شىڭجاڭنىڭ بارىس- كەلىسى زور ىقپالعا ۇشىرامادى» - CNR


بۇل اپتادا قىتايلىق ب ا ق-تا وسىنداي تاقىرىپتاعى اقپارات جارىق كوردى.

«سوڭعى كەزدەرى قازاقستانداعى جاعداي الەمدەگى ءار ەلدىڭ نازارىن اۋدارىپ وتىر. بۇل جاعداي شىڭجاڭعا اسەر ەتتى مە؟»، دەگەن سۇراققا 13-قاڭتاردا بەيجىڭدە وتكەن شىڭجاڭ- ۇيعىر اۆتونوميالىق ولكەسىندەگى شىڭجاڭعا قاتىستى ماسەلەلەر تۋرالى باسپا ءسوز ءماسليحاتىندا شىڭجاڭ- ۇيعىر اۆتونوميالىق ولكەسى حالىق ۇكىمەتىنىڭ باسپا ءسوز حاتشىسى يليجان انايات جاۋاپ بەردى. «قازاقستانداعى اۋقىمدى تارتىپسىزدىكتەردى بايقاعان سوڭ، اتالعان ەلدەگى جاعداي تەز باقىلاۋعا الىنعانىن جانە قازاقستان مەن شىڭجاڭ ايماعى اراسىنداعى قارىم-قاتىناسقا كۇردەلى اسەر ەتپەگەنىن بايقادىق. قىتاي مەن قازاقستان دوس كورشى ەل. اتالعان ەل ماڭگىلىك ستراتەگيالىق سەرىكتەسىمىز. سوندىقتان ءبىز قازاقستانداعى جاعدايدىڭ تۇراقتالعانىن كۇتەمىز جانە ەكونوميكالىق-ساۋدا ىنتىماقتاستىعى مەن كادر الماسۋ ءۇشىن قولايلى جاعداي جاسايمىز»، دەدى يليجان انايات.

تۇركيا ۇلى ۇلتتىق ءماجىلىسى جالپى كەڭەسى قازاقستانعا قولداۋ بەرۋ ۇندەۋىن جاريالادى - TRT

تۇركيا ۇلى ۇلتتىق ءماجىلىسى جالپى كەڭەسى قازاقستانداعى كۇش قولدانۋ ەرەۋىلدەرىنە بايلانىستى مالىمدەمەنى قابىلدادى.

تۇركيا ۇلى ۇلتتىق ءماجىلىسى ءتوراعاسى مۇستافا شەنتوپ پەن ادىلەت جانە دامۋ پارتياسى، رەسپۋبليكا حالىق پارتياسى، ۇلتشىل قوزعالىس پارتياسى مەن جاقسى پارتيا تاراپىنان قازاقستانعا قولداۋ بەرۋ ۇندەۋى جاريالاندى، دەپ حابارلايدى تۇركيا راديو تەلەۆيزيا پورتالى.

تۇركيا ۇلى ۇلتتىق ءماجىلىسى جالپى كەڭەسىندە وقىلعان ورتاق مالىمدەمەدە باۋىرلاس قازاقستاندا سوڭعى كەزدە بولعان وقيعالاردىڭ الاڭداتقانى ايتىلدى. قازاقستاننىڭ تۇراقتىلىعى مەن تىنىشتىعى تۇركيانىڭ بەيبىتشىلىك پەن تىنىشتىعىنداي ماڭىزدى ەكەنى ايتىلعان مالىمدەمەدە.

«قازاقستان حالقىنىڭ پاراساتتىلىعى مەن باسشىلىقتىڭ قىراعىلىعى ارقاسىندا وقيعالاردىڭ تىنىشتالىپ، ەلدەگى جاعدايدىڭ قالىپقا تۇسە باستاعانىنا ريزا بولدىق. وقيعالاردا قازا تاپقان قازاق باۋىرلارىمىزعا اللادان يمان، قايعىلى جاقىندارىنا سابىر، جارالىلارعا شيپا تىلەيمىز. ادامداردىڭ ومىرىنە ءقاۋىپ توندىرگەن، مەملەكەتتىك ءتارتىپتى بۇزعان جانە مال- مۇلىكتى زاقىمداعان كۇش قولدانۋشىلاردى ايىپتايمىز. قازاقستان اكىمشىلىگىنىڭ حالىقتىڭ اماندىعى مەن بايلىعىن ارتتىرۋعا باعىتتالعان رەفورما كۇن ءتارتىبىن قولدايمىز. ءماجىلىسىمىز 2016 -جىلى 15-شىلدەدە فەتۋللاحشى تەررور ۇيىمىنىڭ وپاسىز توڭكەرىس تالپىنىسى كەزىندە قازاقستان ۇيىمدارى كورسەتكەن ۇيىمشىلدىق ۇمىتىلمايدى. تاۋەلسىزدىگىنىڭ العاشقى كۇنىنەن بەرى قازاقستاننىڭ قاسىندا بولعان تۇركيا بۇدان بىلاي دا قازاقستان مەن جالپى ايماق ءۇشىن ماڭىزدى بولعان بەيبىتشىلىك پەن تۇراقتىلىققا دەگەن قولداۋىن بارلىق سالادا جالعاستىرادى»، دەگەن مالىمدەمە جازعان ۇلى ۇلتتىق ءماجىلىسى جالپى كەڭەسى.

«قازاقستانداعى تىنىشتىق يران ءۇشىن اسا ماڭىزدى» - Parstoday


يران مەن قازاقستان پارلامەنتارالىق دوستىق توبىنىڭ باسشىسى ايماقتاعى كەز كەلگەن تەكەتىرەستى ايىپتاپ: «قازاقستانداعى تىنىشتىق پەن تۇراقتىلىق يران ءۇشىن اسا ماڭىزدى»، - دەدى، دەپ حابارلايدى يراندىق Parstoday اقپارات اگەنتتىگى.

يراندىق ب ا ق-تىڭ دەرەگىنشە، عۇلامرەزا نۋري قەزەلچە جەكسەنبى كۇنى تىلشىلەرگە بەرگەن سۇحباتىندا ورتالىق ازياداعى تۇراقسىزدىق پەن تىنىشسىزدىقتىڭ لاڭكەستىك توپتاردىڭ بەلسەندىگىنە جاعداي جاساپ جاتقانىن ايتادى. يران مەن قازاقستان پارلامەنتارالىق دوستىق توبىنىڭ باسشىسى قازاقستانداعى قازىرگى جاعداي تۋرالى ءوز پىكىرىن بىلدىرگەن.

«قازاقستان ۇكىمەتى مەن حالقى تىنىشسىزدىق پەن تۇراقسىزدىق سالدارىنان وسىنداي تاكفىرلىك اعىمداردىڭ بەلسەندىلىگىنە جاعداي تۋدىرىپ الماۋلارى كەرەك.. . قازاقستان ۇكىمەتى مەن حالقى ماڭىزدى وقيعالاردا يران حالقىمەن بىرگە بولدى. بۇل ەلدەگى تىنىشتىق پەن تۇراقتىلىق يران ءۇشىن ماڭىزدى دا قۇندى جانە ەكى جاقتىڭ قارىم- قاتىناسىنا اسەرلى. سول سەبەپتى يران بۇل ەلدە ءاردايىم تىنىشتىق بولۋىن قولدايدى»، دەگەن يران مەن قازاقستان پارلامەنتارالىق دوستىق توبىنىڭ باسشىسى عۇلامرەزا نۋري قەزەلچە.

موڭعوليالىق قازاق مال دارىگەرى مەملەكەتتىك ماراپاتقا يە بولدى - Kaznews


الدىمەن ايتا كەتكەن ءجون، وسى اپتادا موڭعوليالىق kaznews.mn اقپاراتتىق پورتالىندا ق ر پرەزيدەنتى قاسىم-جومارت توقايەۆتىڭ 2022 -جىلى 7-قاڭتار كۇنگى قازاقستان حالقىنا ۇندەۋى جانە قازاقستان رەسپۋبليكاسى سىرتقى ىستەر مينيسترلىگىنىڭ ق ر پرەزيدەنتى قاسىم-جومارت توقايەۆتىڭ جارلىقتارىمەن ەلدىڭ بۇكىل اۋماعىندا توتەنشە جاعداي رەجيمى تۋرالى مالىمدەمەسى جاريالاندى.

ق ر س ءى م-نىڭ بۇل مالىمدەمەسى قازاق جانە اعىلشىن تىلدەرىندە جازىلعان. سونداي-اق، اپتا سوڭىندا وسى ب ا ق-تا «سەيىتمۇرات جاپارحان ۇلى «ەڭبەك سىڭىرگەن مال دارىگەرى» اتاعىمەن ماراپاتتالدى» دەگەن اقپارات جارىق كورگەن بولاتىن.

عۇن يمپەرياسىنا 2231 جىل، ۇلى موڭعول مەملەكەتىنە 816 جىل، ۇلت ازاتتىق قوزعالىسىنا 111 جىل، موڭعول حالىق ريەۆوليۋتسياسىنىڭ توڭكەرىسىنە 101 جىل، دەموكراتيالىق جاڭا «نەگىزگى زاڭ» بەكىتىلگەنىنە 30 جىل تولۋىنا وراي موڭعوليا پرەزيدەنتى ۋ. ءحۇرەلسۇح جارلىق شىعارىپ ءبىرقاتار ازاماتتارعا مەملەكەتتىك جوعارعى اتاق، وردەن، مەدال تابىستادى، دەپ جازادى kaznews.mn.

وسى شارالارعا سايكەس، بايان- ولگيي ايماعىنىڭ بۋگات سۇمىنىنان 1990 -جىلعى حالىق ۇلى قۇرىلتايىنا سايلانىپ، موڭعوليانىڭ دەموكراتيالىق جاڭا «نەگىزگى زاڭىن» بەكىتۋگە اتسالىسقان سەيىتمۇرات جاپارحان ۇلىنا «موڭعوليانىڭ ەڭبەك سىڭىرگەن مال دارىگەرى» اتاعى بەرىلدى.

قىسقى وليمپيادا ويىندارىنا قاتىساتىن شىڭجاڭدىق بەس سپورتشىنىڭ ەكەۋى قازاق - CNR

بەيجىڭدەگى قىسقى وليمپيادا ويىندارىنا شىڭجاڭنىڭ بەس سپورتشىسى قاتىسادى، دەپ حابارلايدىڭ قىتايدىڭ «ورتالىق حالىق راديوسى».

اتالعان ب ا ق-تىڭ كەلتىرگەن دەرەكتەرىنە سۇيەنسەك، بەيجىڭدەگى قىسقى وليمپيادا ويىندارىنا قاتىسىپ باق سىنايتىن شىڭجاڭدىق بەس سپورتشىنىڭ ەكەۋى قازاق ەكەن. ولار - بايان جالىن قىزى مەن قاناعات مۇقامەت ۇلى.

ايتا كەتەيىك، قانداسىمىز بايان جالىن قىزى (شاڭعى جارىسى) 1999 -جىلى 17-جەلتوقساندا التايدىڭ جەمەنەي اۋدانىندا دۇنيەگە كەلگەن. 2017 -جىلى قىتاي حالىق رەسپۋبليكاسىنىڭ سپورت باس باسقارماسى تاڭداعان شەكارالىق شاڭعىشى اتاندى جانە سپورتپەن اينالىسا باستادى. ول ەندى بەيجىڭ قالاسىندا وتەتىن 2022 -جىلعى XXIV قىسقى وليمپيادا ويىندارىندا تاۋ شاڭعىسى سپورتىنان ونەر كورسەتەدى. بايان 2018 -جىلدان باستاپ نورۆەگيا ەلىندە 3 جىل بويى تاۋ شاڭعىسى سپورتى بويىنشا دايىندالىپ، بىلىكتىلىگىن شىڭداعان. ءتورت جىلدىڭ ىشىندە ب. جالىن قىزى ۇلتتىق قۇرامانىڭ ايەلدەر ەستافەتالىق كومانداسىنا نولدىك نەگىزدەن باستاپ كىردى.


ال قاناعات مۇقامەت ۇلى (كونكيمەن جۇگىرۋ) ەسىمدى قانداسىمىز 1999 -جىلى التاي قالاسىندا تۋعان. 2013 -جىلى ول شىڭجاڭ ولكەلىك سپورت اكادەمياسىنا قابىلدانىپ، شورت-ترەكتەن جاتتىعۋدى باستادى. 2019 -جىلى كونكيمەن جۇگىرۋدەن ورتا جانە ۇزاق قاشىقتىققا ۇلتتىق قۇراما ساناتىنا ەنىپ، الەم چەمپيوناتىندا العاش رەت ءوز ەلىنىڭ اتىنان شىعىپ، ەرلەر اراسىنداعى كوماندالىق جارىستا سەگىزىنشى ورىندى جەڭىپ الدى. 2021 -جىلدىڭ قىركۇيەك ايىنان قازان ايىنا دەيىن شىڭجاڭدا وتكەن ەكى الەم چەمپيوناتىندا 4 ءبىرىنشى ورىنعا قول جەتكىزىپ، ۇلتتىق رەكوردتى جاڭارتتى.


تيان رۋينينگ ەسىمدى مۇزدا تەز سىرعاناۋ شەبەرى (ايەل، ۇلتى قىتاي) 1997 -جىلى 17-قاڭتاردا قاراماي قالاسىندا دۇنيەگە كەلگەن. ول ۇلتتىقتان ازيا چەمپيوناتىنا دەيىن ءتۇرلى جارىستارعا قاتىسقان.


تاعى ءبىر سپورتشى دىلنيگار ءىلھامجان (ايەل، ۇلتى ۇيعىر)، دالالىق قار شاڭعى شەبەرى 2001 -جىلى 3-مامىردا التاي قالاسىندا دۇنيەگە كەلگەن. شاڭعى جارىسى بويىنشا ۇلتتىق قۇرامانىڭ مۇشەسى.



الماس قاعانباي (كونكيمەن جۇگىرۋ) ەسىمدى سپورتشى (ۇلتى قىرعىز) 1997 -جىلى 14-قاراشادا تارباعاتايدىڭ شاۋەشەك قالاسىندا دۇنيەگە كەلگەن.

اۆتور: بەيسەن سۇلتان ۇلى



:ءبولىسۋ
سونداي-اق... وقىڭىز
پئكئر قالدئرؤ
+7
جئبةرؤ

مۇراعات