الماتىلىق ەكى پوليتسەي ايەل ەرلەرمەن تەڭ دارەجەدە باسقارما عيماراتىن قورعاعان

الماتى. قازاقپارات - ايەل-پوليتسەيلەر تارتىپسىزدىكتەر مەن قارۋلى شابۋىلدار كەزىندە قالاي قىزمەت ەتكەندەرىن ايتىپ بەردى، حابارلايدى قازاقپارات ءتىلشىسى.

مەدەۋ اۋداندىق پوليتسيا باسقارماسىنىڭ ەكى ينسپەكتورى - قارلىعاش كوپبايەۆا مەن ەۆگەنيا كالنىشيەۆا انتىنا ادال، سەرتىنە بەرىك ماماندار.

«ايەل قىزمەتكەرلەردى ۇيلەرىنە قايتارۋ ۇسىنىلعاندا، ءبىزدىڭ ارىپتەستەرىمىز ەۆگەنيا كالنىشيەۆا مەن قارلىعاش كوپبايەۆا ەكى كۇن بويى ەرلەرمەن تەڭ دارەجەدە پوليتسيا باسقارماسىنىڭ عيماراتىن قورعادى، قۇداي ساقتاسىن، ءبىراق وقيعا جامان جاعىنان دامىعان كەزدە ولار بىزبەن بىرگە قارۋلى قىلمىسكەرلەرگە قارسى تۇرۋعا دايىن بولدى. بۇل جانقيارلىق ءىس قۇرمەتكە لايىق جانە وتانعا لايىقتى قىزمەت ەتۋدىڭ جارقىن ۇلگىسىنە اينالارى ءسوزسىز»، - دەدى مەدەۋ اۋداندىق پوليتسيا باسقارماسىنىڭ باستىعى داۋرەن وتەبايەۆ.

مايور ەۆگەنيا كالنىشيەۆانىڭ ايتۋىنشا، بۇل كۇندەرى كەزەكشى بولىمگە تۇسكەن قوڭىراۋ سانى ءۇش ەسەگە ارتقان.

«قايعىلى وقيعا ورىن العان كۇنى پوليتسيا باسقارماسىنا قوعامدىق ءتارتىپتى قورعاۋعا كەلۋ تۋرالى بۇيرىق الدىم. 200 دەن استام قوڭىراۋ كەلىپ ءتۇستى. قىزمەت وتە قيىن بولدى. بۇل كۇنى ءبىزدىڭ كوپتەگەن قىزمەتكەرلەر زارداپ شەكتى، قازا تاپتى. بۇل جەردە، ومىرلەرىن قاتەرگە تىككەن مەنىڭ ارىپتەستەرىم، دوستارىم بولدى، مەن ولاردى تاستاپ كەتە المادىم. بۇل مەنىڭ مىندەتىم. ەگەر مەن وسىنداي ساتتە ارىپتەستەرىمدى تاستاپ كەتسەم، تۋىستارىم دا مەنى تۇسىنبەس ەدى. ونىڭ ۇستىنە پوليتسيا قىزمەتكەرلەرىنىڭ كومەگىنە ءۇمىت ارتقاندار ءۇشىن بۇل وپاسىزدىق بولار ەدى»، - دەدى ەۆگەنيا كالنىشيەۆا.

ەكى پوليتسەيدى دە ۇيدە بالالارى مەن تۋىستارى كۇتىپ وتىردى. ءبىراق ولار ازاماتتاردىڭ قاۋىپسىزدىگىن جانە انتپەن بەرىلگەن وزدەرىنىڭ قىزمەتتىك مىندەتتەرىن ويلادى. «قازاقستان رەسپۋبليكاسىنىڭ كەز كەلگەن پاتريوتى سياقتى مەن دە قىزمەتتىك بورىشىمدى ادال اتقارامىن. ءبىز بولاشاق ۇرپاققا بەيبىتشىلىك پەن مەيىرىم، تىنىشتىق ورناعان تاۋەلسىز، گۇلدەنگەن ەلدى مۇرا رەتىندە قالدىرۋعا مىندەتتىمىز»، - دەدى قارلىعاش كوپبايەۆا.