باس پروكۋراتۋرا تارتىپسىزدىكتەر مەن تەرروريستىك شابۋىلدان قازا بولعانداردىڭ جالپى سانىن اتادى

نۇر-سۇلتان. قازاقپارات - ەلىمىزدە ەنگىزىلگەن توتەنشە جاعداي كەزىندە قايتىس بولعانداردىڭ جالپى سانى بەلگىلى بولدى، دەپ حابارلايدى قازاقپارات ءتىلشىسى.

بۇل تۋرالى ق ر باس پروكۋراتۋراسى قىلمىستىق قۋدالاۋ قىزمەتىنىڭ باستىعى سەرىك شالابايەۆ ورتالىق كوممۋنيكاتسيالار قىزمەتىندە وتكەن بريفينگىدە ءمالىم ەتتى.

«ادام شىعىنى بولعان وقيعالاردى تەرگەپ، تەكسەرۋگە ەرەكشە نازار اۋدارىلۋدا. بۇگىنگى كۇنى 4578 جابىرلەنۋشى انىقتالدى. ونىڭ 4353 ءى جارالاندى. ونىڭ ىشىندە 3393 قۇقىق قورعاۋ ورگاندارىنىڭ قىزمەتكەرلەرى. توتەنشە جاعداي كەزىندە مورگتەرگە قازا تاپقان 225 ادام جەتكىزىلدى. ولاردىڭ ءبىر بولىگى تەرراكتىلەرگە قاتىسقان، عيمارتتار مەن قۇقىق قورعاۋ قىزمەتكەلەرىنە شابۋىل جاساعان قارۋلى بانديتتەر. قازا بولعانداردىڭ ىشىندە 19 پوليتسيا جانە اسكەر قىزمەتكەرلەرى دە بار.

اتالعان دەرەكتەر الدىن الا سيپاتتا. ولار ءالى ناقتىلانىپ جاتىر، وزگەرۋى دە مۇمكىن. دەگەنمەن، ءاربىر فاكت مۇقيات تەكسەرىلەدى، ناتيجەسى بويىنشا قۇقىقتىق باعا بەرىلەدى»، - دەدى باس پروكۋراتۋرا وكىلى.

ايتا كەتەيىك، بۇگىن پرەزيدەنت قاسىم-جومارت توقايەۆ كۇشتىك قۇرىلىمداردىڭ باسشىلارىمەن كەڭەس وتكىزىپ ، قازاقستاندا، سونىڭ ىشىندە الماتىدا بولعان قايعىلى جاعدايلاردى جان-جاقتى زەرتتەۋ قاجەتتىگىن ايتقان بولاتىن.