USD 434.34 EUR 491.93
RUB 5.56 CNY 68.67
جاڭالىقتار

انتقا دەگەن ادالدىق: اقتوبەدە اسكەريدىڭ ارەكەتى جۇرتتى ءتانتى ەتتى

14 قاڭتار 19:40
:ءبولىسۋ
انتقا دەگەن ادالدىق: اقتوبەدە اسكەريدىڭ ارەكەتى جۇرتتى ءتانتى ەتتى

نۇر-سۇلتان. قازاقپارات - الەۋمەتتىك جەلىدە جاپپاي تارتىپسىزدىكتەر بارىسىندا بەلسەندىلەردىڭ ءوز قىزمەتىن اتقارىپ تۇرعان ساربازدى ۇگىتتەپ جاتقانى تۋرالى ۆيدەو تارادى.

الگى ۆيدەودا ۇلتتىق ۇلان ساربازىنىڭ ۇگىتكە كونبەي، انتىنا بەرىك بولعانى كورسەتىلگەن.

جۇرتتى ءتانتى ەتكەن بۇل اسكەري - ق ر ۇلتتىق ۇلانى «باتىس» وڭىرلىك قولباسشىلىعى 6655-اسكەري بولىمىندە لەيتەنانت ۇلان مىرزاباي، دەپ حابارلايدى قازاقپارات ءتىلشىسى.

«باتىس» وڭىرلىك قولباسشىلىعى باسپا ءسوز قىزمەتىنىڭ جەتەكشىسى، پودپولكوۆنيك ەربولات سۇلتانوۆ ءمالىم ەتكەندەي، ۇلان مىرزابايعا قاتىستى وقيعا اقتوبە قالاسىندا بولدى.

الەۋمەتتىك جەلىدە تاراپ كەتكەن بەينەجازبانى 190 مىڭعا جۋىق ادام قاراپ، 700 دەيى اسكەري قىزمەتشىنى قولداپ، پىكىر جازعان.

انىقتالعانىنداي، بەينەجازبا 5 - قاڭتار كۇنى اقتوبەدە تۇسىرىلگەن بولىپ شىقتى.

الماتى وبلىسى قاپشاعاي قالاسىنىڭ تۋماسى ۇلان مىرزاباي ۇلتتىق ۇلاندا 2017-جىلدان قىزمەت ەتىپ كەلەدى ەكەن. سول كۇنى ولار زاڭسىز ميتينگى كەزىندە اقتوبە وبلىسى اكىمدىگى الدىنداعى الاڭدا الدىڭعى شەپتە تۇرعان.

ۇ. مىرزابايدىڭ سوزىنە قاراعاندا، باستاپقىدا ءبارى تىنىش بولعان. بۇلار ميتينگىگە قاتىسۋشىلاردىڭ ءوز تالاپ-تىلەكتەرىن بىلدىرۋىنە قارسىلىق ەتپەگەن، قايتا قورعاپ تۇرعان.

الايدا كەيبىرەۋلەرى ءتارتىپ بۇزا باستاعان.

«قولدارىندا تاس، تاياق، ارماتۋرا جانە مولوتوۆ كوكتەيلى بولدى. الدىڭعى شەپتە تۇرعان ماعان بىرنەشەۋى جاقىنداپ كەلىپ، ۆيدەوعا ءتۇسىرىپ، مەنى ءوز جاقتارىنا شىعۋعا ۇگىتتەدى. ءبىراق مەن بۇيرىقتىڭ اتى بۇيرىق ەكەندىگىن ايتىپ، اسكەري انتىما ادالدىقتان اينىعانىم جوق. ەلىمىز بىزگە سەندى. سول سەنىمنەن شىعۋدان، وتاندى قورعاۋدان ارتىق ابىروي جوق»، دەدى ۇلان مىرزاباي.


ەسكە سالا كەتەيىك، بۇدان بۇرىن قاقتىعىس كەزىندە جارالانعان جاۋىنگەردىڭ شەپتەن شىقپاعانىن جازعان بولاتىنبىز.


:ءبولىسۋ
سونداي-اق... وقىڭىز
پئكئر قالدئرؤ
+7
جئبةرؤ
ونلاين قىزمەتكەرلەر
رەداكتور
ريزابەك نۇسىپبەك
ريزابەك نۇسىپبەك
954-049

مۇراعات