شىنجاڭ قازاقتارى قارىم- قاتىناسقا جەڭىل، سىپايى، تۇرمىستا تازالىقتى سۇيەدى دەپ كورسەتىلگەن - ا ق ش بارلاۋ قىزمەتى
CREST (CIA Records Search Tool,) مۇراعاتىندا قىرعي- قاباق سوعىس كەزىندەگى و ب ب قىزمەتى جايلى اقپاراتتار جانە بىرنەشە بەتتەن تۇراتىن ساراپتامالار، عىلىمي زەرتتەۋلەر بار.
«قازاقپارات» ح ا ا قازاقستانعا قاتىسى بار 6100 CREST ماتەريالىنا شولۋ جاساپ شىقتى.
ولاردىڭ باسىم بولىگى كەڭەستىك عالىمداردىڭ عىلىمي رەفەراتتارىنىڭ، قازاق مەملەكەتتىك ساۋلەت- قۇرىلىس اكادەمياسىنىڭ، س. م. كيروۆ اتىنداعى قازاق مەملەكەتتىك ۋنيۆەرسيتەتىنىڭ، اۋىل شارۋاشىلىعى، ەنەرگەتيكا جانە ت. ب. ارنايى ماماندانعان قاز ك س ر ينستيتۋتتارىنىڭ ەڭبەكتەرىنىڭ اۋدارماسى. قازاق ك س ر عىلىم اكادەمياسىنىڭ قىزمەتىنە ەرەكشە نازار اۋدارىلعان: كادرلىق اۋىس- تۇيىستەر مەن «قازاق ك س ر عىلىم اكادەمياسىنىڭ حابارشىسىندا» جارىق كورگەن سيمپوزيۋمدار مەن جاريالانىمدار باقىلانىپ وتىرعان. مۇراعات مازمۇنىنا قاراپ، ا ق ش بارلاۋ باسقارماسىنىڭ ك س ر و سەكىلدى قاز ك س ر- عا دا اسقان قىزىعۋشىلىق تانىتقانىن كورەمىز. مۇراعاتتا ەكولوگيا، مال شارۋاشىلىعى، ەتنوپسيحولوگيا، گەوگرافيا، گەوفيزيكا، گەولوگيا، مەديتسينا، يادرولىق فيزيكا، مەتاللۋرگيا، لينگۆيستيكا، گيدرومەتەورولوگيا جانە وزگە سالالار بويىنشا عىلىمي زەرتتەۋلەردىڭ اننوتاتسيالارى بار. كوپتەگەن گازەت قيىندىلارى، كسرو كىتاپتارىنىڭ اۋدارمالارى (ماسەلەن، «نەكە جانە وتباسى قارىم- قاتىناستارى»)، «عىلىم جانە ءومىر» جۋرنالىنىڭ ۇزىندىلەرى جانە راديوباعدارلامالاردىڭ ستەنوگرامماسى - كەڭەس وداعى رەسپۋبليكالارى جايلى اقپاراتتىڭ تىرنەكتەپ جينالعانىن دالەلدەيدى.
مۇراعاتتا ساقتالعان شىنجاڭ قازاقتارىنىڭ ءومىر سالتى جانە تيبەتكە اۋعان قازاقتار جايلى ماعلۇماتتار قازاق تاريحشىلارى مەن زەرتتەۋشىلەرىنىڭ قىزىعۋشىلىعىن تۋدىرارى ءسوزسىز. ماسەلەن، شىنجاڭ قازاقتارى قارىم- قاتىناسقا جەڭىل، سىپايى، قوناقجاي جانە تۇرمىستا تازالىقتى سۇيەتىن حالىق دەپ كورسەتىلگەن. جاعىمسىز قىلىقتارى - جالقاۋلىق، جىگىتتەردىڭ ورىنسىز باتىرسىناتىنى تۋرالى جازىلعان. سونداي-اق، مۇراعاتتاعى دەرەكتەردە كوشپەندىلەر تاعامىنىڭ %50 سۇتتەن، %40 - ەتتەن جانە %10 - جارمادان تۇراتىنى ايتىلعان.
«ولار كوكونىس مۇلدەم جەمەيدى، ەسەسىنە، ەتتى سۇيسىنە جەيدى. جاقسى كورەتىن دەليكاتەستەرى - جىلقى ەتىنەن جاسالعان شۇجىق. قوي ەتىنە قول جەتىمسىز كەدەي ادامدار نەگىزىنەن، سۇتپەن جانە ىرىمشىكپەن تاماقتانادى، ال بايلار قوي ەتىنە باسىمدىق بەرەدى. جىلقىلار قازاق اۋىز ادەبيەتىندە اسەم، باتىل جانە سوعىستا سەنىمدى سەرىك رەتىندە ايتىلىپ كەلگەن. جىلقىلار اراسىندا اق اتتىڭ ەتى دەليكاتەس سانالادى، ال قويلاردىڭ ىشىنەن سارى باستىلاردى ۇناتادى. قازاقتار قىمىزدى جاقسى كورەدى... ولار وتە مىقتى كوشپەندىلەر»، - دەلىنگەن بارلاۋشىلاردىڭ حابارلاماسىندا.