شەتەل ۆاليۋتاسىن ساتىپ الۋ ءتارتىبى وزگەردى

None
None
نۇر-سۇلتان.قازاقپارات - ەلدە شەتەل ۆاليۋتاسىن ساتىپ الۋ ءتارتىبى وزگەردى. ۇلتتىق بانك ءتيىستى جوبانى دايىنداپ، قوعامدىق تالقىلاۋعا شىعارعان ەدى. جاڭا ەرەجەدە اقشا ايىرباستاۋ ورىندارىنىڭ يەلەرىنە تالاپ قاتاڭداتىلعان.

وسىلايشا كولەڭكەلى نارىقتا اقشا ايىرباستايتىندارمەن كۇرەس كۇشەيدى. ايتالىق، 500 مىڭ تەڭگەدەن اسا سومانى وزگە ۆاليۋتاعا اۋىستىراردا جەكە مالىمەتىڭىز ارنايى تىزىمگە ەنگىزىلەدى. بۇدان بولەك، قاۋلىدا وففشورلىق ايماقتاعى ازاماتتارعا ەلدەگى ۆاليۋتا پۋنكتتەرىنە كەلۋگە شەكتەۋ قويىلعان.

كرەديت الۋ قيىنداي ما؟

نەسيە الۋدىڭ ماشاقاتى كوبەيەتىن ءتۇرى بار. ۇكىمەت تە وسى ماسەلەگە نازار اۋداردى. قارجى نارىعىن رەتتەۋ جانە دامىتۋ اگەنتتىنىڭ ءتوراعاسى ءمادينا ءابىلقاسىموۆانىڭ ايتۋىنشا، ەندى نەسيە الۋشىنىڭ تۇراقتى تابىس كوزى تۋرالى اقپارات ءجىتى تەكسەرىلمەك. ال بانكتەر تەك ناقتى دەرەككە سۇيەنە وتىرىپ، قارىز بەرەدى. مۇنداي تالاپ تەك بانكتەرگە عانا ەمەس، ەلدەگى شاعىن قارجىلىق ۇيىمدارعا دا قاتىستى. سەبەبى تاۋەكەل ەتىپ، قارىز الاتىندار كەيىن ونىسىن قايتارا الماي جاتادى. پرەزيدەنت قاسىم- جومارت توقايەۆ ءماجىلىستىڭ جالپى وتىرىسىندا وسى ماسەلەگە ەرەكشە توقتالعان بولاتىن.

قاسىم- جومارت توقايەۆ قازاقستان رەسپۋبليكاسىنىڭ پرەزيدەنتى:

- قارجى جۇيەسىنىڭ تۇراقتىلىعى ەكونوميكانى ودان ءارى دامىتۋدىڭ كەپىلى ەكەنى بەلگىلى. ەكونوميكا ءوسىپ، حالىقتىڭ تابىسىندا الشاقتىق پايدا بولعاندىقتان تۇتىنۋ نەسيەلەرى ايتارلىقتاي ارتتى. ونىڭ مولشەرى بيزنەستى نەسيەلەۋ كولەمىنەن اسىپ كەتتى. حالىق قازىرگى ۋاقىتتا كوپ نەسيە الىپ جاتىر. وسىنى ەسكەرسەك، بۇل قارجى نارىعىن قۇبىلتىپ، الەۋمەتتىك تۇراقسىزدىق قاۋپىن تۋدىرۋى مۇمكىن. ۇكىمەت جەكە تۇلعالاردىڭ بانكروتتىعى تۋرالى زاڭ جوباسىن ازىرلەۋدى باستادى. ءبىراق بۇل تىعىرىقتان شىعاراتىن جول ەمەس. ەڭ الدىمەن شەكتەن تىس قارىزدىڭ كوبەيۋىن بولدىرماۋ كەرەك. سوندىقتان قارجى نارىعىن رەتتەۋ جانە دامىتۋ اگەنتتىگىنە ۇلتتىق بانكپەن پرۋدەنتسيالدى رەتتەۋ تەتىكتەرى ارقىلى ناقتى شەشىم قابىلداۋدى تاپسىرامىن. سونداي- اق قوماقتى سومانى وپ- وڭاي بەرىپ قويىپ، كەيىن ونى جوعارى ۇستەمە اقىمەن قايتارىپ الاتىن قارجىلىق ۇيىمدارعا باقىلاۋ كۇشەيەدى. بۇل رەتتە پايىزدىق مولشەرلەمە قايتا قارالماق.

ماقسات حالىق، ەكونوميست:

- ماسەلەنى شەشۋدىڭ ەڭ نەگىزگى جولى، جەكە تۇلعانىڭ بانكروتتىعى تۋرالى زاڭ قابىلدانۋى كەرەك. بايقاعانىمىزداي، بانكتەر قازىر كوپ ويلانبايدى. بورىشكەر تۋرالى اقپاراتتى بىردەن كوللەكتورلىق ۇيىمعا بەرە سالادى. كوللەكتورلار، سوت ورىنداۋشىلار ازاماتتاردىڭ بۇكىل شوتىن بۇعاتتاپ تاستايدى. سونىڭ سالدارىنان وتە ۇلكەن الەۋمەتتىك شيەلەنىستەر تۋىنداپ جاتىر.. ءبىرىنشى كەزەكتە، وسى زاڭدى قابىلداۋ كەرەك. ەكىنشى كەزەكتە، حالىقتىڭ تابىسىن ارتتىرۋ ماسەلەسى تۇر. حالىقتىڭ تابىسىن ارتتىرۋ، جۇمىسپەن قامتاماسىز ەتۋ - قازىرگى كۇننىڭ نەگىزگى تالابى. ال ءۇشىنشى ماسەلە - بانكتەردەگى نەسيە پايىزىن ءتۇسىرۋ. بۇل باعىتتا ناقتى جۇمىس جۇرگىزىلۋى كەرەك دەپ ەسەپتەيمىن. ويتكەنى بىزدەگى نەسيەلەردىڭ پايىزى الدەقايدا جوعارى.

نارىق ك ز سايتىنىڭ حابارلاۋىنشا، قازىرگى تاڭدا جەكە تۇلعالاردىڭ بانككە بەرەشەگى 10 تريلليون تەڭگەدەن اسقان. وتكەن ايدا شەتەل ۆاليۋتاسىنداعى نەسيە 3,9 پايىزعا، ۇلتتىق ۆاليۋتاداعى كرەديت 3,7 پايىزعا ۇلعايدى. قارىزدىڭ كوبى ۇزاق مەرزىمگە الىنعان.

ماقسات حالىق، ەكونوميست:

- قازىر زاڭسىز جۇمىس ىستەپ جاتقان قارجىلىق ۇيىمدار بار. ياعني، قارجىلىق قاداعالاۋ اگەنتتىگىنەن رۇقسات الماي، نەسيەلىك وپەراتسيالاردى جۇرگىزە بەرەدى. مىنە، سولاردى اشكەرەلەپ، قىزمەتىنە تىيىم سالاتىن ۋاقىت جەتتى. بانكتەردىڭ شىرماۋىنا ءتۇسىپ قالماۋعا ازاماتتار دا مۇددەلى بولۋعا ءتيىس. ياعني، نەسيە الاردا قارجىلىق جاعدايىڭىزدى جان- جاقتى سارالاپ بارىپ، شەشىم قابىلداڭىز. سەبەبى قارىز قاشان دا كۇلىپ كەلىپ، جىلاپ قايتادى، دەيدى ەكونوميست ماقسات حالىق.

بيزنەسكە 93 ميلليارد تەڭگەدەن اسا شىعىن كەلدى ال كەشەگى بۇلىكتەن ەلدەگى بيزنەسكە 93 ميلليارد تەڭگە شىعىن كەلگەن. «اتامەكەن» ۇلتتىق كاسىپكەرلەر پالاتاسى وسىنداي دەرەك كەلتىردى. بۇدان بىرەر كۇن بۇرىن شىعىن سوماسى 100 ميلليارد تەڭگەدەن اسقانى ايتىلعان ەدى. الايدا كەي بيزنەسمەندەر مەملەكەتتەن كومەك الۋدان باس تارتقان. زارداپ شەككەن بيزنەس وكىلدەرىنە كومەك كورسەتۋ ءۇشىن «كۇشىمىز بىرلىكتە» قورى اشىلعانىن ەسكە سالايىق.

بۇگىندە ونىڭ ەسەپشوتىنا 1 ميلليارد تەڭگە جيناقتالدى. قورداعى اقشانىڭ ءتۇسۋى جانە ءبولىنۋى اشىق بولاتىنىنا كەپىلدىك بەرىلەدى. جينالعان قاراجات الماتى قالاسى مەن وزگە دە ايماقتا زارداپ شەككەن كاسىپكەرلەرگە ارنايى كوميسسيانىڭ شەشىمىنەن كەيىن بولىنەدى.

ناريمان ءابىلشايىقوۆ، «اتامەكەن» ۇ ك پ باسقارما ءتوراعاسىنىڭ ءبىرىنشى ورىنباسارى

- ەڭ باستىسى، كوميسسيا مۇنى بەكىتۋ قاجەت. ءيا، زارداپ شەكتى، وسىنشاما سوماعا، ودان باسقا قۇقىقتىق ورگانداردىڭ جۇرگىزەتىن جۇمىسى بار. وسى جۇمىستار جاسالمايىنشا، ءوز جۇمىسىن باستاۋعا بولمايدى. ال ءوز جۇمىسىن باستاپ كەتكەن كاسىپكەرلەرگە مەملەكەت تاراپىنان كومەك كورسەتۋگە مۇمكىندىك بولمايدى. بۇل زاڭعا قاراما- قايشى بولىپ تۇر.

www.24.kz

سوڭعى جاڭالىقتار