الماتى اكىمدىگىنىڭ عيماراتى قانشا ۋاقىتتا قالپىنا كەلەدى؟

الماتى. قازاقپارات - جايلى قالالىق ورتا باسقارماسىنىڭ باسشىسى ساپار نۇراشيەۆ ورتتەن زارداپ شەككەن قالالىق اكىمدىك عيماراتى قاشان قالىپقا كەلتىرىلەتىنىن ايتتى، دەپ حابارلايدى قازاقپارات ءتىلشىسى.

ونىڭ ايتۋىنشا، قازىرگى ۋاقىتتا عيمارات ىشىندە ءورت سالدارىنان تازارتۋ جۇمىستارى جۇرگىزىلىپ جاتىر. بۇعان شامامەن ەكى-ءۇش كۇن كەتەدى.

جۇمىسقا 20 عا جۋىق جەكە قۇرىلىس كومپانياسى تارتىلدى. عيماراتتىڭ جالپى اۋدانى 33 مىڭ شارشى مەتر.

«قالالىق اكىمدىك عيماراتى تارتىپسىزدىك كەزىندە ورتەنىپ، قيرادى. جۇمىس كولەمى وتە ۇلكەن. سوندىقتان ونى 100 پايىز قايتا قالپىنا كەلتىرەمىز. قازىر ءىشىن تازالاۋ جۇمىستارى ءجۇرىپ جاتىر. تەحنيكالىق تەكسەرۋ جۇرگىزۋ ءۇشىن بارلىق سالماق تۇسەتىن قۇرىلىمدار اشىق بولۋى ءتيىس»، - دەدى ساپار نۇراشيەۆ.

سپيكەردىڭ سوزىنشە، تەحنيكالىق تەكسەرۋ جۇرگىزۋگە تاعى 10 كۇن كەتەدى. وسىدان كەيىن ماماندار عيماراتتى قالپىنا كەلتىرۋ بويىنشا جوبالاۋ-سمەتا قۇجاتتاماسىن ازىرلەيدى. ساپار نۇراشيەۆ عيمارات بۇزىلماۋى مۇمكىن ەكەنىن تىلگە تيەك ەتتى.

«كەشە ءبىز تەكسەرىپ شىقتىق. عيمارات بۇزىلماۋى مۇمكىن. قالپىنا كەلتىرۋ جۇمىستارى شامامەن 5-6 ايعا سوزىلادى. بيۋجەت ءالى انىقتالعان جوق»، - دەدى باسقارما باسشىسى.