جاپپاي بۇلىك كەزىندە ۇرلانعان تاۋاردى ساتىپ العاندار جاۋاپكەرشىلىككە تارتىلادى

نۇر- سۇلتان. قازاقپارات - بۇزاقىلار توناعان دۇكەندەردىڭ رەسمي وكىلدەرى تەحنيكانى «قولدان» ساتىپ الماۋعا شاقىرادى.

سەبەبى ۇرلانعان مۇلىك تاركىلەنىپ، قاراجات قايتارىلمايدى. سونداي- اق ونى ساتىپ العان ازامات قىلمىستىق جاۋاپكەرشىلىككە تارتىلادى - دەيدى ماماندار.

ەلدەگى جاپپاي بۇلىك كەزىندە بۇزاقىلار ەلەكترونيكا جابدىقتارى مەن تۇرمىستىق تەحنيكا ساتاتىن 17 ءىرى دۇكەندى توناپ قيراتقان. ونىڭ 9-ى بۇگىن جۇمىسىن جانداندىردى. قازىر زارداپ شەككەن كومپانيالاردىڭ شىعىن كولەمى ەسەپتەلىپ جاتىر. ۇرلانعان مۇلىكتى قۇقىق قورعاۋ ورگاندارىنىڭ وكىلدەرى تىركەۋگە الادى.

كونستانتين كۋلاگين، ەلەكترونيكا جابدىقتارى مەن تۇرمىستىق تەحنيكا دۇكەنىنىڭ ايماقتىق ديرەكتورى:

- تەحنيكانى قولدان ساتىپ الماۋىڭىزدى سۇرايمىز. سەبەبى ۇرلانعان زات تاركىلەنىپ، قاراجات قايتارىلمايدى. وعان قوسا، ساتىپ الۋشى كۋاگەر رەتىندە سوتقا شاقىرىلادى. ءار تەلەفون، پلانشەت جانە تەلەديداردىڭ سەريالىق ءنومىرى بار. ول بازادا تىركەلەدى. قىلمىستىق جولمەن الىنعان تەحنيكانى پوليتسيا قىزمەتكەرلەرى ارنايى قوسىمشا ارقىلى تابادى. پلاتفورمانىڭ وكىلدەرى ۇرلانعان مۇلىكتى ساتقان نەمەسە ساتىپ العان ازاماتتار قىلمىستىق جاۋاپكەرشىلىككە تارتىلادى- دەيدى.

ستانيسلاۆ دۋبينشيك، ونلاين حابارلاندىرۋ پلاتفورماسىنىڭ باس ديرەكتورى:

- كەيىنگى كۇندەرى ديزاينەرلىك كيىمگە، قىمبات تەحنيكاعا جارنامالار كوبەيىپ كەتتى. ءبىزدىڭ مودەراتورلار تەكسەرىپ، سايتقا وتكىزبەيدى. بازاداعى دەرەكتەردى تەكسەرىپ، ءتارتىپ ساقشىلارى تەحنيكانىڭ ۇرلانعانىنا كوز جەتكىزەدى. سوسىن قۇرىلعىنى تىركەۋگە الادى. ىسكە قوسىلعان كەزدە سيگنال كەلىپ، تەلەفوننىڭ ورنالاسقان جەرى بەلگىلى بولادى.

سوڭعى مالىمەتتەر بويىنشا، ءبىر جارىم مىڭنان استام كاسىپكەر شىعىنعا باتتى. بۇلىكتەن بيزنەسكە كەلگەن زالال 100 ميلليارد تەڭگەدەن استى.