قولدان قۇراستىرعان تراكتور

None
None
نۇر -سۇلتان. قازاقپارات - قوستاناي قالاسىنىڭ 62 جاستاعى تۇرعىنى اسىلبەك ەسماعامبەتوۆ ۇيدەگى شارۋاسىنىڭ ءبىرازىن ءارتۇرلى تەحنيكانىڭ بولشەكتەرىنەن ءوز قولىمەن قۇراستىرىپ العان تراكتوردىڭ كومەگىمەن تىندىرادى.

شاعىن تراكتورعا قۋاتى 13 ات كۇشىنە تەڭ قىتايلىق Lifan كولىگىنىڭ قوزعالتقىشى قوندىرىلعان. اۋلانىڭ قارىن كۇرەپ، شاعىن تىركەمەگە جۇك تيەپ تاسۋعا وسى شاعىن موتوردىڭ ءوزى-اق جەتىپ جاتىر.

كاسىبى مەحانيك بولعاندىقتان، تەمىردىڭ ءتىلىن جاقسى بىلەتىن اۋەسقوي ونەرتاپقىش ءۇي شارۋاسىنا جارايتىن شاعىن تراكتور قۇراستىرىپ الۋدى بۇرىننان ويلاستىرىپ جۇرسە دە، بۇل ويىن جۇزەگە اسىرۋدى وسىدان بەس اي بۇرىن عانا ىسكە اسىرا باستاعان. ەڭ اۋەلى كۇش اگرەگاتتارى قاجەت بولدى. بەلدەمە مەن ترانسميسسيالىق جۇيەنىڭ جاڭاسىن ساتىپ الۋ اسا قىمباتقا تۇسەدى. اسىلبەك ەسماعامبەتوۆ بۇل بولشەكتەردى مەتالل سىنىعىن قابىلدايتىن ورىنداردان ىزدەپ تاپقانىن ايتادى.

- قاجەت بولشەكتەردى ىزدەپ تابۋ ءۇشىن ءبىراز تەر توگۋگە تۋرا كەلدى. بىردە مەتالل قابىلداۋ پۋنكتتەرىن ارالاپ ءجۇرىپ كەڭەس زامانىنان قالعان اۋىر جۇك كوتەرەتىن ەسكى كاردىڭ بولشەكتەرىن كورىپ قالدىم. ونىڭ بەلدەمەسى مەن اممورتيزاتورلارى عانا جارامدى بولىپ شىقتى. سونىڭ ءوزىن قايتا جاراتۋ ءۇشىن كوپ ەڭبەكتەندىم. تراكتوردىڭ قاڭقاسىن اگرەگاتتارعا لايىقتاپ شاعىنداپ قانا جاسادىم. ال باسقارۋ جۇيەسىن ايگىلى Mercedes كولىگىنىڭ رۋل تارتقىشى مەن «موسكۆيچتىڭ» باسقارۋ باعاناسىنان جاسادىم. باستى ماقساتىم شاعىن عانا بيۋدجەتتىك تراكتور جاساۋ بولدى. ونىڭ سىرتقى ادەمىلىگىنە اسا ءمان بەرگەن جوقپىن، پارادقا ايداپ شىقپايمىن عوي، اۋلاداعى شارۋانى تىندىرىپ السام دا جاراپ جاتىر، - دەيدى ا. ەسماعامبەتوۆ.

اسەكەڭنىڭ تراكتور قۇراستىرۋ بارىسىندا قولدا بار دۇنيەسىن قيۋلاستىرىپ، جوقتان جونىپ بار جاساعانى كورىنىپ تۇر. مىسالى، جىلدامدىق اۋىستىراتىن ءتورت ساتىلى قوراپ بۇرىن ەسكى «گاز-51» كولىگىندە تۇرىپتى. اجىراتقىشتى قولدان جاساۋعا تۋرا كەلگەن. تەجەگىش جۇيەسى دە قىرىق جىلعى قىزىل كومبايننان الىنعان.

- باستان- اياق قۇراستىرىپ شىعۋعا ءتورت اي ۋاقىت كەتتى. قولىم بوساي قالسا بولدى، وسىمەن الدانامىن. كەيدە كۇيەۋ بالام مەن ىنىلەرىم كەلىپ كومەكتەستى. ويتكەنى جالعىز ادامعا كەيبىر اۋىر بولشەكتەردى ورنىنا قويىپ، بەكىتۋ قيىنعا سوعادى، - دەدى ونەرتاپقىش.

تراكتوردىڭ تۇمسىعىنا شەبەردىڭ ءوزى جاساعان ەنى ءبىر مەتردەن ءسال عانا اساتىن قىستا قار ارشۋعا قولايلى كۇرەك تىركەلىپتى. كوكتەمدە كۇرەكتىڭ ورنىنا سوقا تىركەلىپ، شاعىن تراكتور باقشادا جەر جىرتۋعا پايدالانىلادى. قاجەت بولعان جاعدايدا تەلەشكى تىركەپ، جۇك تاسۋعا دا بولادى.

قوستاناي وبلىسى

egemen.kz

سوڭعى جاڭالىقتار