اندرادە بەلبەۋدەن باس تارتسا ءالىمحان ۇلى الەم چەمپيونى بولا ما؟
مۇنداي جاعدايدا ۇيىم بۇل بەلبەۋگە مىندەتتى قارسىلاستار اراسىنداعى ايقاستى ۇيىمداستىرۋ كەرەك. ال بەلبەۋگە باستى ۇمىتكەر - وتانداسىمىز جانىبەك ءالىمحان ۇلى (11-0، 7 ك و). ونىڭ قارسىلاسى برازيليالىق ەسكيۆا فالكاو (29-0، 20 ك و) بولۋى مۇمكىن، دەپ جازادى Vesti.kz ءتىلشىسى.
مىندەتتى قارسىلاستىڭ ءبىرى فالكاو دەپ Lukie Boxing پورتالىنىڭ اۆتورى ايتتى. ول ءالىمحان ۇلى مەن ەسكيۆا اراسىنداعى ايقاس كوپشىلىكتىڭ نازارىن اۋداراتىنى تۋرالى ايتتى.
«شىنىندا ءبىز جانىبەك ءالىمحان ۇلى مەن ەسكيۆا فالكاو اراسىنداعى بوس قالعان WBO بەلبەۋىنە ايقاستى كورۋىمىز مۇمكىن. ءبىرتۇرلى، ءبىراق قىزىق ايقاس بولادى»، - دەپ جازدى اۆتور.
ءالىمحان ۇلى ءۇشىن برازيليالىق بوكسشى قيىن قارسىلاس بولا ما؟ ءسىرا، جوق. نەگىزى فالكاو گەننادي گولوۆكينگە تيەسىلى IBF بەلبەۋىنىڭ مىندەتتى قارسىلاسى ەدى. مۇنداي اتاققا ول كانادالىق پاتريس ۆولنيدى جەڭىپ، قول جەتكىزدى.
دەگەنمەن لاس-ۆەگاستاعى سول ايقاستى ەسكيۆا ناشار وتكىزدى. ونىڭ ۇستىنە التىنشى راۋدتا بوكسشىلار باسپەن قاعىسىپ، ايقاس توقتاتىلدى. ايتپەسە، پاتريس ەندى عانا اشىلىپ كەلە جاتىر ەدى.
ۆولني بولسا ءالىمحان ۇلىنان دەڭگەيى الدەقايدا تومەن بوكسشى. سوققىسى دا قاتتى مىقتى ەمەس. سوندىقتان فالكاو مەن پاتريس جانىبەككە قاۋىپتى ەمەس.
WBO رەيتينگىنگى ەكىنشى ساتىدا حايمە مۋنگيا تۇر. 25 جاستاعى مەكسيكانىڭ مىقتىسى 38 ايقاس وتكىزىپ، بارلىعىندا جەڭىسكە جەتكەن. قازاقستاندىق بوكسشىعا قاۋىپ توندىرسە، وسى مۋنگيا توندىرەر.
ءبىراق تا ول WBO بەلبەۋىنە اسا قىزىعىپ جۇرگەن جوق. ونىڭ باستى ماقساتى - ەكىنشى وتانداسىمىز گولوۆكينمەن كەزدەسۋ.
ودان كەيىن تىزىمدە دەنني ديگنام، كريس يۋبەنك، كارلوس ادامەس، ليام ۋيليامس سەكىلدى بوكسشىلار بار. مىنە جانىبەك وسى بوكسشىلاردىڭ بىرىمەن كەزدەسۋى ابدەن مۇمكىن.
دەگەنمەن دە ۋاقىتتىڭ الدىنا ءتۇسىپ جۇگىرمەيىك. وسى قاڭتار ايىندا Top Rank باسشىسى بوب ارۋم اندرادەنىڭ كومانداسىمەن كەلىسسوز وتكىزەدى. ەگەر دەمەتريۋس راسىندا بەلبەۋدەن باس تارتسا، ءالىمحان ۇلىنا باسقا قارسىلاستار ىزدەستىرىلەدى.
ازىرگە ءالىپتىڭ ارتىن باعايىق...