كوروناۆيرۋس: الماتىدا وقۋشىلار ونلاين وقۋعا كوشەدى

الماتى. قازاقپارات- كانيكۋل اياقتالعان سوڭ الماتىلىق وقۋشىلار ونلاين وقۋعا كوشەدى، دەپ حابارلايدى قازاقپارات ءتىلشىسى.

الماتىدا ەپيدەميولوگيالىق اۋحۋال ۋشىقتى. وسىعان بايلانىستى وقۋشىلار ونلاين فورماتتا وقيتىن بولادى.

«الماتىدا 31 - قاڭتارعا دەيىن مەكتەپ وقۋشىلارى قاشىقتان وقيدى. ال ستۋدەنتتەر 6 - اقپانعا دەيىن ونلاين فورماتتا ءبىلىم الادى»، - دەدى الماتى قالاسىنىڭ باس سانيتارلىق دارىگەرىنىڭ مىندەتىن اتقارۋشى ءسادۋاقاس بايعابىلوۆ.

بۇعان دەيىن ول الماتى قالاسى «قىزىل» ايماققا كىرگەنى تۋرالى ايتقان بولاتىن.

«ق ر باس مەملەكەتتىك سانيتارلىق دارىگەرىنىڭ قاۋلىسىنا سايكەس، الماتى قالاسىندا شەكتەۋ شارالارىن قاتاڭداتۋ 5 كۇن ىشىندە، مۇمكىن ودان بۇرىن قابىلداناتىن بولادى. ارينە، بۇل الماتى قالاسىنداعى سوڭعى وقيعالار اياسىندا كاسىپكەرلەر مەن قالا تۇرعىندارىنا قوسىمشا سالماق. ءبىراق، كوروناۆيرۋس «ەشقايدا كەتكەن جوق»، ۆاكسينالانباعان حالىق ونى وتە كوپ جۇقتىرپ جاتىر»، - دەدى ول.