اۋىل كاسىپكەرلەرىنە كرەديتپەن بىرگە ءونىمىن ساتىپ الۋ كەپىلدىگى بەرىلەدى - ەڭبەك ءمينيسترى

نۇر-سۇلتان. قازاقپارات - اۋىلداعى كاسىپكەرلىكتى دامىتۋ ءۇشىن تۇرعىندارعا كرەديتپەن بىرگە شىعارعان ءونىمىن ساتىپ الۋ تۋرالى كەپىلدىكتەر بەرىلمەك.

بۇل تۋرالى ق ر ەڭبەك جانە حالىقتى الەۋمەتتىك قورعاۋ ءمينيسترى سەرىك شاپكەنوۆ ۇكىمەت وتىرىسىندا ايتتى، دەپ حابارلادى قازاقپارات ءتىلشىسى.

«اتامەكەن» ۇلتتىق كاسىپكەرلەر پالاتاسىمەن بىرلەسىپ، اۋىل كاسىپكەرلىگىن دامىتۋ بويىنشا شارالار كەشەنى ازىرلەنۋدە. بۇل شارالار اۋىلداردىڭ ماستەر-جوسپارلارىن قالىپتاستىرۋدى، كاسىپكەرلىككە وقىتۋدى، ونىمدەر مەن قىزمەتتەردى ساتىپ الۋعا كەپىلدىك بەرە وتىرىپ، جەڭىلدەتىلگەن كرەديتتەر مەن گرانتتاردى قامتيتىن بولادى»، - دەدى سەرىك شاپكەنوۆ.

مينيستر جاستاردىڭ جۇمىسپەن قامتىلۋىنا ەرەكشە كوڭىل بولىنەتىنىن اتادى.

«قازىرگى ۋاقىتتا مينيسترلىك جاستاردى جۇمىسپەن قامتۋعا باعىتتالعان شارالاردى جۇزەگە اسىرۋدا - بۇل «جاستار پراكتيكاسى» جانە «العاشقى جۇمىس ورنى» جوبالارى. اتالعان جوبالاردى كۇشەيتۋ ءۇشىن جاستاردىڭ قاتىسۋ مەرزىمى مەن جالاقى مولشەرى ۇلعايتىلادى»، - دەدى سەرىك شاپكەنوۆ.

ءسوز سوڭىندا ول تۇراقتى جۇمىس ورىندارىن قۇرۋ شارتتارىنىڭ ءبىرى - كاسىپكەرلىكتى دامىتۋ ەكەنىن ەسكە سالدى.

«مەملەكەت باسشىسىنىڭ تاپسىرماسى بويىنشا جەكە ءىسىن دامىتۋعا ارنالعان گرانت مولشەرى 200-دەن 400-ايلىق ەسەپتىك كورسەتكىشكە دەيىن (612,6 مىڭنان 1,2 ميلليون تەڭگەگە دەيىن) ۇلعايتىلادى، سونداي-اق قارجىلاندىرۋعا ۇمىتكەر بيزنەس-جوبالاردىڭ اتاۋلىلىعىن جانە باعالانۋىن كۇشەيتۋ بويىنشا شارالار كەشەنى قابىلدانادى»، - دەپ تۇيىندەدى مينيستر.

اۆتور: ەسىمجان ناقتىباي