USD 429.57 EUR 447.35
RUB 6.94 CNY 63.23
جاڭالىقتار

قازاقستاندا وتە باي ادامدار پايدا بولدى، ولاردىڭ حالىققا كومەكتەسەتىن كەزى كەلدى - پرەزيدەنت

11 قاڭتار 14:55
:ءبولىسۋ
قازاقستاندا وتە باي ادامدار پايدا بولدى، ولاردىڭ حالىققا كومەكتەسەتىن كەزى كەلدى - پرەزيدەنت

نۇر-سۇلتان. قازاقپارات - مەملەكەت باسشىسى قاسىم-جومارت توقايەۆ ءماجىلىس وتىرىسىندا «قازاقستان حالقىنا» قوعامدىق الەمۋەتتىك قورىنا تۇراقتى جارنا اۋداراتىن ءىرى كومپانيالار ءتىزىمىن بەكىتۋدى تاپسىردى، دەپ حابارلايدى قازاقپارات.

«بۇل پرەزيدەنتتىڭ نەمەسە ۇكىمەتتىڭ نەمەسە باسقا مەملەكەتتىك ورگاننىڭ قورى ەمەس. بۇل بارلىق قازاقستاندىقتاردىڭ قورى، حالىقتىڭ قورى. ول اكىمشىلىكتىڭ نەمەسە ۇكىمەت جانىندا جۇمىس ىستەمەيدى. بەدەلدى باقىلاۋ كەڭەسى قۇرىلادى، ءادىل جاۋاپتى باسشىنى تاعايىندالادى، ونىڭ قىزمەتىنىڭ تولىق اشىقتىعىن، ەسەپتىلىگىن جانە قوعامنىڭ باقىلاۋىندا بولۋىن قامتاماسىز ەتەمىز. جوسپارلار، بيۋدجەت جانە جوبالار سايتتا جاريالانادى. بارلىق اقپارات اشىق بولادى. قوردى قارجىلاندىرۋ جەكە جانە مەملەكەتتىك كوزدەردەن جۇزەگە اسىرىلادى»، - دەدى مەملەكەت باسشىسى.

پرەزيدەنتتىڭ ايتۋىنشا، قورعا حالىقارالىق قايىرىمدىلىق ۇيىمدارىنىڭ كومەگىن تارتۋ دا جوسپارلانۋدا. «بۇل قورعا لوتورەيالىق قىزمەت وپەراتورىنىڭ، ستاۆكالاردى ەسەپكە الۋ ورتالىعىنىڭ جانە باسقا مونوپوليستەردىڭ مىندەتتى اۋدارىمدارى ءتۇسىپ وتىرادى. ارينە، ءبىز ءىرى بيزنەس تاراپىنان اۋقىمدى جانە تۇراقتى، استىن سىزىپ ايتايىن، تۇراقتى اۋدارىمداردى كۇتەمىز. تۇڭعىش پرەزيدەنت - ەلباسىنىڭ ارقاسىندا ەلىمىزدە وتە تابىستى كومپانيالار توبى جانە ءتىپتى حالىقارالىق ولشەمدەر بويىنشا دا وتە باي ادامدار پايدا بولدى. ەندى ولاردىڭ قازاقستان حالقىنا قۇرمەت كورسەتىپ، وعان جۇيەلى جانە تۇراقتى نەگىزدە كومەكتەسەتىن كەزى جەتتى دەپ سانايمىن. سوندىقتان ۇكىمەت كومپانيالار توبىن انىقتاپ، قورعا جىل سايىن اۋدارىلاتىن جارنالار مولشەرىن بەكىتۋى كەرەك. وعان قوسا، ۇلكەن قاراجاتقا يە بولىپ، كولەڭكەدە جۇرگەن تۇلعالاردىڭ دا بەلسەندى قاتىسۋىن كۇتەمىن. بۇل قور قوعامدى توپتاستىرۋدىڭ تاعى ءبىر قۇرالىنا اينالىپ، ازاماتتاردا الەۋمەتتىك ادىلەت سەزىمىن نىعايتا الاتىنىنا سەنىمدىمىن»، - دەپ تۇيىندەدى ق. توقايەۆ.

بۇعان دەيىن پرەزيدەنت «قازاقستان حالقىنا» قوعامدىق الەۋمەتتىك قورىندا قاي ساناتقا كومەك كورسەتىلەتىنىن ايتقان ەدى.

اۆتور: ايجان سەرىكجان قىزى


:ءبولىسۋ
سونداي-اق... وقىڭىز
پئكئر قالدئرؤ
+7
جئبةرؤ

مۇراعات