ەلوردا اۋەجايى قالىپتى رەجيمدە جۇمىس ىستەپ تۇر

نۇر-سۇلتان. قازاقپارات - ەلوردالىق نۇرسۇلتان نازاربايەۆ حالىقارالىق اۋەجايىنىڭ باسپا ءسوز قىزمەتى عيمارات جۇمىسى مەن شەتەلدىك رەيستەر تۋرالى اقپارات جاريالادى، دەپ حابارلايدى قازاقپارات.

«قازاقستان رەسپۋبليكاسىندا توتەنشە جاعداي باستالعاننان بەرى نۇرسۇلتان نازاربايەۆ حالىقارالىق اۋەجايى ءوز جۇمىسىن توقتاتقان جوق. ەلوردانىڭ اۋە ايلاعىنىڭ بارلىق قىزمەتتەرى كۇشەيتىلگەن جۇمىس رەجيمىنە اۋىستى. رەيستەر اۋە كومپانيالارىنىڭ شەشىمىمەن توقتاتىلىپ جاتىر. رەيستەردى كەشىكتىرۋ، توقتاتۋ، قايتا برونداۋ جونىندەگى بارلىق سۇراقتار بويىنشا اۆياكومپانيالاردىڭ بايلانىس ورتالىقتارىنا حابارلاسۋدى سۇرايمىز»، - دەپ حابارلادى اۋەجايدىڭ باسپا ءسوز قىزمەتى.

بۇگىن 2022-جىلدىڭ 8- قاڭتارىندا شەتەلدىك اۋە كومپانيالارى نۇر-سۇلتانعا جانە نۇر-سۇلتاننان دۋباي، مينسك، كالينينگراد قالالارىنا 6 حالىقارالىق رەيستى جوسپارلاپ وتىر. حالىقارالىق جانە ىشكى رەيستەر تۋرالى اقپارات كۇن سايىن جاڭارتىلىپ وتىرادى.