توتەنشە جاعداي: ەلوردادا قازىرگى جاعداي قالاي - فوتورەپورتاج

None
None
نۇر-سۇلتان. قازاقپارات - كەشە ەلوردادا توتەنشە جاعداي ەنگىزىلدى. وسى ورايدا قازاقپارات ءتىلشىسى نۇر-سۇلتان قالاسىنداعى قازىرگى جاعدايدى باقىلاپ قايتقان ەدى.

جالپى قالا بويىنشا جاعداي تۇراقتى ءارى قالىپتى. الەۋمەتتىك نىساندار جۇمىس ىستەپ تۇر. دەگەنمەن، كەدەرگىلەر جوق ەمەس. ايتار بولساق، بانكتەر ۋاقىتشا جۇمىس ىستەمەي تۇرعاندىقتان بانكوماتتاردا اقشانىڭ جوقتىعى بايقالادى جانە بانكوماتتار الدىندا ادامدار كەزەكتە تۇر.


سونداي-اق، قالاداعى كەيبىر ءىرى سۋپەرماركەتتەر جۇمىسىن ۋاقىتشا توقتاتقان.

«كەشە جۇمىس ىستەگەنبىز، بۇگىن جابىلدىق. جۇمىستى قاشان جالعاستىراتىنىمىز ازىرگە بەلگىسىز. قالا بويىنشا ءبىزدىڭ سۋپەرماركەتتىڭ بىرنەشە فيليالى بار، ولاردىڭ ءبارى جابىلدى»، - دەدى ەلورداداعى «Galmart» سۋپەرماركەتىنىڭ قىزمەتكەرى.

ءبىراق ازىق-تۇلىك دۇكەندەرى قىزمەتىن ادەتىنشە جالعاستىرىپ جاتىر، وسى تۇستا ايتا كەتەتىن ءبىر جايت تولەم تەك قولما-قول اقشامەن قابىلدانادى. ءدارىحاناداعى جاعداي دا ءدال سولاي.


حالىق ءۇشىن تاعى ءبىر ماڭىزدى نىسان تاماقتانۋ ورىندارى دا جۇمىسىن كەستەگە ساي جالعاستىرىپ جاتىر.

ودان بولەك، تىلشىلەر مەملەكەتتىك قۇزىرلى ورگان عيماراتتارى ورنالاسقان مينيسترلىكتەر ءۇيى ماڭىندا بولىپ قايتتى. ول اۋماقتا دا جاعداي قالىپتى، دەگەنمەن قاۋىپسىزدىك شاراسى بارىنشا قامتاماسىز ەتىلگەن. ياعني مينيسترلىك ءۇيى اۋماعىن ارنايى كۇزەت قاراۋىلداپ تۇر.

سول سياقتى ەلوردادا قاۋىپسىزدىكتى قامتۋ ەرەكشە قولعا الىنعانى بايقالادى، قالانىڭ ءار اۋدانىندا ءتارتىپ ساقشىلارى قوعام تىنىشتىعىن كۇزەتىپ تۇر. قوعامدىق كولىك تە كەستەگە ساي ءجۇرىپ جاتىر.

جالپى قالا تۇرعىندارى قالىپتى تىرشىلىگىن بۇرىنعىشا جالعاستىرۋدا، تەك حالىق قوزعالىسى سايابىرسىعان.

ايتا كەتسەك، كەشە ەلوردادا توتەنشە جاعداي ەنگىزىلدى. بيىل 19- قاڭتارعا دەيىن استانالىقتار ءۇشىن كەشكى ساعات 23:00 دەن تاڭعى ساعات 07:00 دە دەيىن كوممەندانتتىق ساعات جۇمىس ىستەيدى.



سوڭعى جاڭالىقتار