ءماجىلىس دەپۋتاتى پرەزيدەنتتىڭ ۇ ق ش ۇ كومەگىنە جۇگىنۋ شەشىمىنە پىكىر ءبىلدىردى

نۇر-سۇلتان. قازاقپارات – ق ر پارلامەنتى ءماجىلىسىنىڭ دەپۋتاتى مۇحتار ەرمان مەملەكەت باسشىسىنىڭ ۇجىمدىق قاۋىپسىزدىك شارت ۇيىمى كومەگىنە جۇگىنۋ تۋرالى شەشىمىنە پىكىر ءبىلدىردى، دەپ حابارلايدى قازاقپارات ءتىلشىسى.

«مەملەكەت باسشىسى قاسىم-جومارت كەمەل ۇلى توقايەۆ قازاقستاننىڭ وڭىرلەرىندە، اسىرەسە الماتىدا باسسىزدىققا بارعان تەررورلىق باندىلاردىڭ تاراپىنان تۋىنداعان ءقاۋىپ- قاتەردەن ەلىمىزدى قورعاۋ ءۇشىن بارلىق ءىس-شارالاردى قابىلداۋدا. جاپپاي قيراتۋ، توناۋ، قۇقىق قورعاۋ كۇشتەرىمەن قارۋلى قاقتىعىستار - مۇنىڭ بارلىعى جەدەل جانە تاباندى ءىس-ارەكەتتى تالاپ ەتەدى»، - دەدى مۇحتار ەرمان.

وسى رەتتە ول ەلىمىزدە تەررورعا قارسى وپەراتسيا جۇرگىزىلىپ جاتقانىن اتاپ ءوتتى.

«مەملەكەت باسشىسى قاۋىپسىزدىك كەڭەسىنىڭ وتىرىسىندا ۇ ق ش ۇ-داعى سەرىكتەستەردەن كومەك سۇراپ جۇگىنۋ شەشىمىن تۇسىندىرگەنى انىق. قازاقستان پرەزيدەنتى ەڭ الدىمەن ازاماتتاردىڭ قاۋىپسىزدىگى مەن تىنىشتىعى مۇددەسى ءۇشىن مۇنداي شەشىم قابىلدادى. قازىرگى ۋاقىتتاعى باستى ماقسات - تىنىشتىق ساقتاپ، ازاماتتىق جاۋاپكەرشىلىك تانىتۋ»، - دەدى ءماجىلىس دەپۋتاتى.

ەسكە سالساق، ق ر پرەزيدەنتى قاسىم-جومارت توقايەۆ ۇجىمدىق قاۋىپسىزدىك شارت ۇيىمىنا مۇشە ەلدەردىڭ باسشىلارىنان تەررورلىق سىن- قاتەردى ەڭسەرۋدە كومەك سۇراعان ەدى.

اۆتور: مارلان جيەمباي