مەنني پاكياونى نوكداۋنقا جىبەرگەن قازاقستاندىق بوكسشى كاسىپقوي رينگكە ورالۋى مۇمكىن
«جاقسى گانورار بولسا مەن رينگكە ورالۋعا كەلىسەم. الايدا قازىر قيىن، پاندەميا ءوز جوسپارىن ايقىنداپ تۇر. بۇنداي كەزدە ءبىر قولايلى ءساتتى كۇتكەن ءوز باسىم دۇرىس دەپ سانايمىن. ىندەت كەلمەي تۇرعاندا ارداگەرلەر اراسىندا جۇدىرىقتاسىپ تۇردىم. قۇر انشەيىن جەڭىپ قايتقان قىزىق ەمەس. سەن جۇلدىزسىن! - دەگەن سوزگە تويىپ قايتىپ شارشادىم»، - دەدى ەشماعامبەتوۆ.
سەرىكجان ەشماعامبەتوۆ ەلىمىز تاۋەلسىزدىك العاننان كەيىنگى جىلدارى كاسىپقوي بوكستا ونەر كورسەتۋگە بەل بۋعان قازاقستاندىق بوكسشىلاردىڭ ءبىرى. 37 جاسىنا دەيىن جۇدىرىقتاسقان وتانداسىمىز سوڭعى كەزدەسۋىن 2008-جىلدىڭ جەلتوقسان ايىندا وتكىزگەن. كاسىپقوي بوكستا 37 كەزدەسۋگە قاتىسىپ، 24 رەت جەڭىسكە جەتىپ، 1 رەت تەڭ تۇسكەن. 13 كەزدەسۋىندە قارسىلاسىن نوكاۋتپەن جەڭگەن. سونىمەن قاتار، مانساپ جولىندا پ ا ب ا (پان-ازيا بوكس قاۋىمداستىعى) چەمپيونى اتانعان.
سەرىكجان ەشماعامبەتوۆ پەن مەنني پاكياو 2003-جىلدىڭ ناۋرىز ايىندا جۇدىرىقتاسقان. قازاقستاندىق بوكسشى بۇگىندە الەم تانىعان فيليپپيندىك بوكسشىنىڭ كاسىپقوي رينگتەگى جەتىنشى قارسىلاسى بولعان ەكەن. فيليپپين استاناسى مانيلانىڭ كونە اۋداندارىنىڭ ءبىرى ينترامۋروستا وتكەن جەكپە-جەك بەس راۋندقا دەيىن سوزىلىپ، مەننيدىڭ مەرەيى ۇستەم بولعان.