جانۋارلار تۋرالى زاڭ زووباقتاردىڭ جۇمىسىنا دا وڭ اسەر ەتە مە
31 جەلتوقسان 13:46

جانۋارلار تۋرالى زاڭ زووباقتاردىڭ جۇمىسىنا دا وڭ اسەر ەتە مە

نۇر-سۇلتان. قازاقپارات - «الماتى» حايۋاناتتار باعىنىڭ» حالىقارالىق ءبولىمىنىڭ جەتەكشى مامانى ايمان ەگدەبايەۆا جانۋارلارعا جاۋاپكەرشىلىكپەن قاراۋ تۋرالى زاڭنىڭ زووباقتاردىڭ جۇمىسىنا قالاي اسەر ەتەتىنىن ايتتى، دەپ حابارلايدى قازاقپارات ءتىلشىسى.

«جانۋارلارعا قامقورلىقپەن قاراۋدى قامتاماسىز ەتەتىن زاڭنىڭ بولۋى ءبىزدىڭ زووباقتاردىڭ دا جۇمىسىنا وڭ اسەرى ەتەدى. ويتكەنى زووباقتىڭ اۋماعى شەكتەۋلى. اۋماعىن شەكسىز كەڭەيتە المايسىڭ. ونىڭ ۇستىنە ءار زووباقتا جانۋارلار كوللەكسياسىن تولىقتىرىپ، كۇتىپ ۇستاۋدىڭ جوسپارى بولادى. ال بىزگە كەيدە براكونەرلەردەن ازات ەتىلگەن، كەيدە قاراپايىم تۇرعىندار باسىندا قىزىعىپ اسىراپ الىپ، كەيىن باس تارتقان نەبىر ەكزوتيكالىق جانۋارلاردى اكەلىپ جاتادى. ءبىر جاعىنان ولاردى قابىلداماساق، وبال. ەكىنشى جاعىنان ولاردى قابىلداساق، ءوزىمىزدىڭ كوللەكتسيالىق جوسپارىمىز بۇزىلادى. وسى تۇرعىدان العاندا جانۋارلارعا جاۋاپكەرشىلىكپەن قاراۋ تۋرالى زاڭ قاجەت-اق»، - دەيدى مامان.

زووباق وكىلى كەيىنگى جىلدارى الەمنىڭ ءار تۇكپىرىنەن اكەلىنگەن جانۋارلار قاراۋسىز قالعاندا زووباقتارعا اكەلۋ ادەتكە اينالعانىن ايتادى. ونىڭ پىكىرىنشە، زاڭدا جابايى جانۋارلاردىڭ قاي تۇرلەرىن قاراپايىم تۇرعىندار ءۇي جاعدايىندا ۇستاي الاتىنىن ناقتىلاپ جازۋ قاجەت.

«2020 -جىلى عانا بىزگە بىرنەشە ارىستان الىپ كەلدى. ءبارىنىڭ جاسى 6 ايدان اسقان. ياعني، اگرەسسيا تانىتاتىن جاسقا جەتكەن. سونى بايقاپ، ونى ۇيىندە اسىراپ كەلگەن ادامدار زووباققا وتكىزىپ وتىر. مىسالى، ءبىز زووباقتىڭ كوللەكتسيالىق جوسپارى بويىنشا شەتەلدەن جانۋار اكەلسەك، ءتۇرلى قۇجاتتار راسىمدەيمىز. ءبىر جانۋاردى سىرتتان كىرگىزۋدىڭ ماشاقاتى كوپ. ارنايى ماماندانعان ۇيىم بولساق تا، ءبىراز ۋاقىتىمىز بەن ەنەرگيامىزدى شىعىندايمىز. ال جەكە ازاماتتاردىڭ سول قۇجاتتاردىڭ ءبارىن قالاي رەتتەپ، جانۋاردى الىپ وتەتىنىنى تۇسىنىكسىز. وسى جاعىنان دا زاڭ قاتاڭداتىلۋى كەرەك دەپ ويلايمىن»، - دەيدى ول. سونداي-اق، ايمان ەگدەبايەۆا زاڭسىز اينالىمنىڭ قۇربانى بولعان جانە يەسىز قالعان جانۋارلاردىڭ پروبلەماسىن زووباقتاردىڭ كۇشىمەن شەشۋ مۇمكىن ەمەس ەكەنىن ايتادى. سوندىقتان، جانۋارلاردى وڭالتۋ ورتالىقتارىن قۇرۋ قاجەت دەپ ەسەپتەيدى.

«بالكىم ول ءۇشىن زاڭعا وزگەرىس ەنگىزىپ تە كەرەگى جوق شىعار. ءبىراق جانۋارلاردىڭ بيوالۋاندىعىنا جاۋاپتى مەملەكەتتىك ورگانداردىڭ ساياسي شەشىمى كەرەك. قازىرگى تاڭدا جانۋارلاردى وڭالتۋ ورتالىعى اۋاداي قاجەت»، - دەدى «الماتى» حايۋاناتتار باعى حالىقارالىق ءبولىمىنىڭ جەتەكشى مامانى ايمان ەگدەبايەۆا.

اۆتور: ەسىمجان ناقتىباي

جاڭالىقتار