قازاق بالاسىنا گرەممي بۇيىرعان جىل - فوتو
قازاقپارات ونەر وكىلدەرىنىڭ جىل بويى قول جەتكىزگەن باستى جەڭىستەرىنە شولۋ ۇسىنادى. ايسۇلتان سەيىتوۆ - كانادانىڭ BooooooomTV Awards 2020 تۇعىرناماسىندا «جىلدىڭ ۇزدىك مۋزىكالىق ۆيدەوسى اتاندى («تىلسىم الەم» اتتى كومپوزيتسياعا تۇسىرگەن ۆيدەوروليگى ءۇشىن).
ايسۇلتان سەيىتوۆتىڭ اتى-ءجونى - ايدىن نۇرالين.
Imanbek - Grammy يەگەرى. (الەم مۋزىكاسىنىڭ جۇلدىزى SAINt JHN اتتى ءانشىنىڭ Roses انىنە جازىلعان رەميكسى ءۇشىن). امەريكانىڭ The New York Times گازەتىندە يمانبەك جايلى ماقالا دا جاريالاندى.
ايتۋلى ماراپات مۋزىكانتىتڭ قولىنا 7 ايدان سوڭ ءتيدى.
مايرا مۇحامەد قىزى - «BraVo» حالىقارالىق مۋزىكا سىيلىعىنىڭ لاۋرەاتى.
«BraVo» حالىقارالىق كاسىبي مۋزىكالىق سىيلىعى 2017 -جىلى Monte Carlo راديوسى مەن «رۋسسكايا مەدياگرۋپپانىڭ» قولداۋىمەن قۇرىلدى. جەڭىمپازداردى انىقتاۋدىڭ نەگىزگى كريتەريى - كلاسسيكالىق مۋزىكا سالاسىنداعى نومينانتتاردىڭ ورىنداۋشىلىق شەبەرلىگىن كورەرمەندەردىڭ باعالاۋى.
رۋحيا بايدۇكەنوۆا - بەلارۋس ەلىنىڭ ۆيتەبسك قالاسىندا وتكەن «سلاۆيان بازارى» بايقاۋىنىڭ جەڭىمپازى. 14 مەملەكەتتىڭ وكىلى قاتىسقان بايقاۋدا رۋحيا بايدۇكەنوۆا گران- پري يەگەرى اتانىپ، «التىن ليرا» مۇسىنشەسىمەن بىرگە 20 مىڭ دوللار الدى.
«ۇلىتاۋ» ەتنو- روك توبى - DJOOKY Music Awards اتتى حالىقارالىق بايقاۋدىڭ جەڭىمپازى.
«ۇلىتاۋ» ەتنو- روك توبى ا ق ش-تىڭ لوس- اندجەلەس قالاسىندا وتكەن DJOOKY Music Awards حالىقارالىق مۋزىكالىق بايقاۋىندا روك/مەتالل ساناتى بويىنشا جەڭىسكە جەتتى. بايقاۋدا ۇجىم ماحامبەت وتەمىس ۇلىنىڭ «جۇمىر قىلىش» كۇيىن ورىندادى. مۋزىكا باسەكەسىنە 83 ەلدەن 13 مۋزىكالىق باعىت بويىنشا مىڭداعان مۋزىكانت قاتىسقان بولاتىن.
ديماش قۇدايبەرگەن دە جىل بويى وتانداستارىن جاعىمدى جاڭالىقتارىمەن قۋانتىپ وتىردى. جىل باسىندا ول ا ق ش پرەزيدەنتىن ۇلىقتاۋ اپتالىعىنىڭ اشىلۋ سالتاناتىندا ءان شىرقادى. ءانشى شارادا قازاقتىڭ «سامالتاۋ» حالىق ءانىن ورىندادى.
ال قاراشا ايىندا ديماش الەم بويىنشا الەۋمەتتىك جەلىدە ەڭ تانىمال 10 ءانشىنىڭ قاتارىنا كىردى.
امەريكانىڭ NetBase Quid اتتى تاۋەلسىز زەرتتەۋ كومپانياسى الەۋمەتتىك جەلىدە اتتارى ءجيى اتالعان الەمگە تانىمال انشىلەردىڭ ءتىزىمىن جاساعان بولاتىن. ديماش قۇدايبەرگەن سول تىزىمدە 9 ورىنعا شىقتى. ءبىرىنشى ورىندا امەريكالىق ءانشى تەيلور سۆيفت، ەكىنشى ورىندا كورەيالىق BTS توبىنىڭ مۇشەسى JIN جانە ءۇشىنشى ورىندا وڭتۇستىك كورەيالىق ءانشى Lisa (Blackpink توبىنىڭ ەكس- مۇشەسى). سونداي-اق، انشىلەر رەيتينگىنە كوپكە تانىمال Adele، دجاستين بيبەر جانە اريانا گراندە سەكىلدى ونەر جۇلدىزدارى بار.
اۆتور: ەسىمجان ناقتىباي