قانداستار ەلىمىزدىڭ ج و و-لارىنا ۇلتتىق ءبىرىڭعاي تەست تاپسىرماي تۇسە الادى

نۇر-سۇلتان. قازاقپارات - قانداستار ەلىمىزدىڭ جوعارى وقۋ ورىندارىنا ۇلتتىق ءبىرىڭعاي تەست تاپسىرماي تۇسە الادى.

بۇل جايىندا ق ر پرەمەر-ءمينيسترىنىڭ ورىنباسارى ەرالى توعجانوۆتىڭ ءماجىلىس دەپۋتاتتارى ساۋالىنا بەرگەن جاۋابىندا ايتىلعان، دەپ حابارلايدى قازاقپارات ءتىلشىسى.

«زاڭناماعا سايكەس ءبىلىم بەرۋ گرانتتارى ۇلتتىق ءبىرىڭعاي تەستىلەۋدىڭ (بۇدان ءارى - ۇ ب ت) ناتيجەلەرىنە سايكەس ءبىلىم بەرۋ باعدارلامالارىنىڭ ناقتى توپتارى بويىنشا كونكۋرس نەگىزىندە بەرىلەدى. بۇگىنگى كۇنى قانداستار ءۇشىن مەملەكەتتىك ءبىلىم بەرۋ تاپسىرىسىنىڭ جالپى كولەمىنىڭ 4 پايىزىى (2265 گرانت) مولشەرىندە جوعارى وقۋ ورىندارىنا ءتۇسۋ ءۇشىن قابىلداۋ كۆوتاسى كوزدەلگەن. وسى كۆوتا اياسىندا 2012 -جىلدان باستاپ 2021 -جىلعا دەيىن 8000-نان استام قانداس قابىلداندى. 2020 -جىلدان باستاپ جوعارى بىلىمگە قولجەتىمدىلىكتى كەڭەيتۋ ماقساتىندا قانداستار ءۇشىن ۇ ب ت العاش رەت ەلەكتروندى فورماتتا ۇيىمداستىرىلدى. ول تەستىلەۋدى قاشىقتان شەتەلدە تاپسىرۋعا مۇمكىندىك بەردى»، - دەپ اتاپ وتەدى ۆيتسە-پرەمەر جاۋابىندا.

ونىڭ دەرەگىنشە، بيىل ونلاين تەستىلەۋگە 1143 قانداس قاتىستى، 796 قانداس نەمەسە ۇ ب ت- عا قاتىسۋشىلاردىڭ جالپى سانىنىڭ 69 پايىزى ءبىلىم گرانتىن الدى. وتكەن جىلى بۇل كورسەتكىش 76 پايىز دەڭگەيىندە بولدى.

«2020 -جىلدان باستاپ SAT، ا س ت جانە IB حالىقارالىق ستاندارتتالعان تەستىلەرىنىڭ بالدارىن ۇ ب ت بالدارىنا اۋىستىرۋ ەنگىزىلدى. اتالعان سەرتيفيكاتتارى بار ادامدار ۇ ب ت تاپسىرۋدان بوساتىلادى. تيىسىنشە، ستاندارتتالعان تەست سەرتيفيكاتتارى بولعان جاعدايدا قانداستار ج و و- عا ۇ ب ت- سىز تۇسۋگە مۇمكىندىگى بار»، - دەدى ول.

ەرالى توعجانوۆ 2020 -جىلدان باستاپ دياسپورا وكىلدەرى ۇ ب ت تاپسىرماي ج و و- عا دايىندىق بولىمدەرىنە قابىلداۋدىڭ بەكىتىلگەن قاعيدالارىنا سايكەس اڭگىمەلەسۋ ناتيجەلەرى بويىنشا قابىلداناتىندىعىن اتاپ وتەدى.

«جىل سايىن جوعارى وقۋ ورىندارىنىڭ دايىندىق بولىمدەرىنە مەملەكەتتىك ستيپەنديامەن جانە جاتاقحانالارداعى ورىندارمەن قامتاماسىز ەتە وتىرىپ، قىتاي، وزبەكستان، موڭعوليا، رەسەي، تاجىكستان جانە تۇركىمەنستاننان 1000-نان استام قانداس قابىلدانادى. دايىندىق ءبولىمىنىڭ باعدارلاماسى بويىنشا قانداستار قازاق ءتىلىن، جالپى ءبىلىم بەرۋ پاندەرىن وقيدى، ۇ ب ت- عا تولىققاندى دايىندىق كۋرسىنان وتەدى»، - دەدى ۇكىمەت باسشىسىنىڭ ورىنباسارى.

اۆتور: مارلان جيەمباي