«بولاشاق» ستيپەندياسى يەگەرلەرىنىڭ ءتىزىمى جاريالاندى

نۇر-سۇلتان. قازاقپارات - «بولاشاق» حالىقارالىق ستيپەندياسى يەگەرلەرىنىڭ ءتىزىمى جاريالاندى.

بۇل تۋرالى قازاقپارات ءبىلىم جانە عىلىم مينيسترلىگىنە سىلتەمە جاساپ حابارلايدى.

رەسپۋبليكالىق كوميسسيانىڭ شەشىمىمەن وسى جىلعى ىرىكتەۋدىڭ ءۇشىنشى لەگىندە ستيپەنديا 569 قازاقستاندىققا تاعايىندالدى. ونىڭ ىشىندە 163 ادام ماگيستراتۋراعا، 4 ادام الەمنىڭ ۇزدىك جوعارى وقۋ ورىندارىنىڭ دوكتورانتۋراسىنا ءتۇستى.

«تاعىلىمداما» باعدارلاماسى بويىنشا 37 ستيپەنديات ءبىلىم الادى. تاعى 365 عالىم شەتەلدىك عىلىمي-زەرتتەۋ ورتالىقتارىندا تاعىلىمدامادان وتەدى.

ەستەرىڭىزگە سالا كەتەيىك، «عالىمدار» ساناتى بيىل مەملەكەت باسشىسىنىڭ تاپسىرماسى بويىنشا العاش رەت بەكىتىلدى. بۇل شەشىم قازاقستاندىق عالىمدارعا جەتەكشى ۋنيۆەرسيتەتتەردە، عىلىمي جانە سالالىق ورتالىقتاردا ءبىلىم الۋعا، سول ارقىلى ەلدىڭ عىلىمي الەۋەتىن ارتتىرۋعا مۇمكىندىك بەرەدى.

«بولاشاق» حالىقارالىق ستيپەندياسىنىڭ يەگەرلەرى اكادەميالىق وقۋدان جانە الەمنىڭ 27 ەلىنىڭ جەتەكشى ۋنيۆەرسيتەتتەرى مەن عىلىمي جانە سالالالىق ورتالىقتارىندا تاعىلىمدامادان وتەدى.

220 - ادام ا ق ش، 136 - ۇلى بريتانيا، 57 - رەسەي فەدەراتسياسى 13 - اۆستراليا، 14 - گەرمانيا، 3 - جاپونيا ت. ب. مەملەكەتتەردىڭ جوعارى وقۋ ورىندارىندا ءبىلىم الادى.

بيىلعى جىلى تاعىلىمدامالار مەن وقىتۋ باعدارلامالارى شەڭبەرىندە «قاشىقتان وقىتۋدىڭ ادىستەرى مەن قۇرالدارى»، «پەداگوگيكالىق پلاتفورمالاردى ازىرلەۋ»، «STEM پاندەرىن وقىتۋ ادىستەمەسى»، «جوعارى ءبىلىم بەرۋدەگى ستراتەگيالىق مەنەدجمەنت جانە كوشباسشىلىق»، «پەداگوگيكالىق يننوۆاتسيالار»، «بيولوگيا، مولەكۋلالىق بيولوگيا، بيوحيميا»، «ۆيرۋسولوگيا. جۇقپالى اۋرۋلار. ەپيدەميولوگيا»، «سيفرلىق ەكونوميكا. ساندىق ماركەتينگ» سىندى باعىتتار سۇرانىسقا يە بولدى.

«بولاشاق» حالىقارالىق ستيپەندياسى يەگەرلەرىنىڭ ءتىزىمىن مىنا جەردەن كورۋگە بولادى.