USD 425.02 EUR 450.1
RUB 7.17 CNY 63.75
جاڭالىقتار

الماتىدا وتاندىق تاريحي سەريالدار تانىستىرىلدى

27 جەلتوقسان 19:38
:ءبولىسۋ
الماتىدا وتاندىق تاريحي سەريالدار تانىستىرىلدى

الماتى. قازاقپارات - الماتىدا تاۋەلسىزدىكتىڭ 30 جىلدىعىنا وراي 9 تاريحي تەلەحيكايانىڭ تانىستىرىلىمى ءوتتى، دەپ حابارلايدى قازاقپارات ءتىلشىسى.

تاۋەلسىزدىك مەرەكەسى قارساڭىندا «Qazaqstan» تەلەارناسىنان ۇلت قايراتكەرلەرى احمەت بايتۇرسىن ۇلى، جۇمابەك تاشەنەۆ، قانىش ساتبايەۆ، مۇقاعالي ماقاتايەۆ، جاڭگىر حان مەن دومالاق انانىڭ ومىرىنە ارنالعان 6 تاريحي تۋىندى كورسەتىلە باستادى.

ال اتى اڭىزعا اينالعان ك س ر و حالىق ءارتىسى جانە حالىق قاھارمانى روزا باعلانوۆا تۋرالى «بۇلبۇل» تەلەحيكاياسىن كورەرمەندەر «حابار» ارناسىنىڭ ەفيرىنەن كورە الادى. سونداي-اق، «Almaty TV» تەلەارناسى ەلىم-جەرىم دەپ وتكەن تۇرار رىسقۇلوۆتىڭ ءومىر جولىن باياندايتىن «قىزىل جەبە» تەلەسەريالىن تۇسىرسە، «31 - تەلەارنا» ۇلى اقىن جامبىل جابايەۆ پەن جاس رەپەر جامبونىڭ تاعدىرىنا ارنالعان «جۇرەك جىرى» تەلەسەريالىن كورەرمەنگە ۇسىنىپ وتىر.

شاراعا ق ر مەملەكەتتىك حاتشىسى قىرىمبەك كوشەربايەۆ، ق ر پرەمەر-ءمينيسترىنىڭ ورىنباسارى ەرالى توعجانوۆ، اقپارات جانە قوعامدىق دامۋ ءمينيسترى ايدا بالايەۆا، مەديامەنەدجەرلەر، زيالى قاۋىم وكىلدەرى مەن جۋرناليستەر قاتىستى.

«كينو - ۇرپاق ساناسىن قالىپتاستىراتىن يدەولوگيالىق قۇرال. جاھاندانۋ داۋىرىندە ءومىر ءسۇرىپ، الەمدىك مادەنيەتتىڭ مىڭ سان بوياۋى ءبىر ارنادا ارالاسىپ كەتكەن زاماندا ەسىك-تەرەزەمىزدى قىمتاپ، وركەنيەتتەن بولەكتەنىپ ءومىر سۇرە الماسىمىز انىق. وسى رەتتە ۇلتتىق يدەولوگيامىزدى ناسيحاتتاۋدا، ۇرپاققا ۇلاعاتتى تاربيە بەرۋدە، ۇلتتىق سيپاتىمىزدى تانىتۋدا كينو ونەرىنىڭ الار ورنى ەرەكشە. سوندىقتان مەملەكەت باسشىسى قاسىم-جومارت كەمەل ۇلى توقايەۆ «تاۋەلسىزدىك بارىنەن قىمبات!» اتتى ماقالاسىندا اتالعان سالاعا ايرىقشا باسىمدىق بەردى.

پرەزيدەنت ماقالاسىندا «مەن قۇزىرلى ورگاندار مەن وتاندىق تەلەارنالارعا مەملەكەتتىك تاپسىرىستىڭ بەلگىلى ءبىر بولىگىن مىندەتتى تۇردە تاريحي تاقىرىپتارعا باعىتتاۋدى تاپسىرامىن» دەگەن بولاتىن» - دەدى ق ر مەملەكەتتىك حاتشىسى قىرىمبەك كوشەربايەۆ.

وسى شاراعا وراي ۇيىمداستىرىلعان دوڭگەلەك ۇستەل بارىسىندا قاتىسۋشىلار وتاندىق سەريال نارىعىنىڭ بۇگىنى مەن ەرتەڭى جايلى ءسوز قوزعاپ، وزەكتى مالەسەلەردى تالقىلادى.

ق ر اقپارات جانە قوعامدىق دامۋ ءمينيسترى ايدا بالايەۆا قازاقستاندىق تەلەسەريالداردى ءتۇسىرۋ باعىتىندا انىقتالعان پروبلەمالاردى اتاپ ءوتىپ، ونىڭ شەشۋ جولدارىن ۇسىندى.

«بىرىنشىدەن، وتاندىق تەلەسەريالدار ءتۇسىرۋ جوباسىنا مادەنيەت جانە سپورت مينيسترلىگى جانىنان قۇرىلعان ۇلتتىق كينونى قولداۋ مەملەكەتتىك ورتالىعىنىڭ الەۋەتىن پايدالانۋ. بۇل قارجى جەتىسپەۋشىلىگىنە بايلانىستى ماسەلەنى شەشۋگە بىردەن ءبىر سەپتىگىن تيگىزەر ەدى. ەكىنشىدەن، مەملەكەتتىك اقپارات تاپسىرىسى شەڭبەرىندە بولىنەتىن قارجىنى ءۇش جىلدىق بيۋجەت فورماتىنا اۋىستىرۋ. بۇل تاريحي تۋىندىلاردى تۇسىرۋگە جەتكىلىكتى ۋاقىت بەرىپ، ءتۇسىرىلىم بارىسىندا تۋىنداعان ماسەلەلەردى ساپالى شەشۋگە وڭ ىقپال ەتەر ەدى. تاعى ءبىر اتاپ وتەتىن ماسەلە، تاريحي تۋىندىلار تۇسىرۋگە قاجەتتى رەكۆيزيتتەردىڭ جەتىسپەۋشىلىگى ءجيى ورىن الادى. بۇل رەتتە، «قازاق فيلمنىڭ» بالانسىنداعى كوستيۋمدەر مەن دەكوراتسيالاردى جەڭىلدىكپەن نەمەسە تەگىن پايدالانۋ مۇمكىندىگى قاراستىرىلسا. بۇگىندە ولاردى سەريالدارعا قولدانۋ ءۇشىن قوماقتى تولەماقى تالاپ ەتىلەدى. بۇل دا ءوز كەزەگىندە بولىنگەن قارجىعا ايتارلىقتاي سالماق سالادى»، - دەدى مينيستر ءوز سوزىندە.


:ءبولىسۋ
سونداي-اق... وقىڭىز
پئكئر قالدئرؤ
+7
جئبةرؤ

مۇراعات