ابايعا ەسكەرتكىش قويىلعان الەم ەلدەرىن ۆەلوسيپەدپەن ارالاماقپىن - الماتىلىق ساياحاتشى
35 جاستاعى الماتىلىق ازامات اقىننىڭ قۇرمەتىنە ارنالعان الەمدىك ساپارى تۋرالى جوسپارىمەن قازاقپارات تىلشىسىمەن بولىسكەن ەدى.
«مەنىڭ ۆەلوسيپەدپەن ساياحاتتاۋداعى باستى ماقساتىم - ىشكى تۋريزم مەن سالاۋاتتى ءومىر سالتىن ناسيحاتتاۋ. ءوز ەلىمىزدەن بولەك، شەتەلگە دە ساياحاتتاۋدى باستاپ كەتتىم. مەندەگى نيەت شەتەلدىكتەر قازاقستاندى جاقىن تاني تۇسسە، ءبىزدىڭ ەلگە تۋريست بولىپ كەلسە. سەبەبى ەلىمىزدە تۋريستىك ادەمى جەرلەر جەتكىلىكتى. ءبىزدىڭ ەلدىڭ تابيعاتى ەرەكشە. ءوز ويىم مۇمكىندىك باردا ەل، جەر كورىپ، جان دۇنيەسىن دامىتا تۇسكەن دۇرىس دەپ ويلايمىن. ءبىز العاشقى ساپاردى (باۋىرىممەن بىرگە) اباي اتامىزدىڭ 175 جىلدىق مەرەيتويىنا وراي الماتىدان سەمەيگە جاياۋ بارۋدان باستادىق. «اباي» قورى بىزگە ارنايى توسبەلگى تاعىپ، قۇرمەت كورسەتتى. وسى ورايدا «ابايعا اپارار جول» جوباسى اياسىندا الداعى ۋاقىتتا ۇلى اقىننىڭ قۇرمەتىنە ارنالعان ساپارىم جالعاسىن تابادى»، - دەدى دامير كۋشەيەۆ.
سونداي- اق، ۆەلوساياحاتشى بيىل جازدا تۇركياعا بارىپ، ونداعى اباي ەسكەرتكىشتەرىنە قۇرمەت كورسەتكەن. «تۇركياعا ساپار بارىسىندا اباي اتامىزدىڭ ەسكەرتكىشتەرىنە بارىپ تاعزىم ەتتىم. ۇلى اقىنعا ىستانبۇل، انكارا جانە انتاليا قالاسىندا ەسكىرتكىش قويىلعان. ايتپاقشى، انكارادا اقىننىڭ قۇرمەتىنە 2 بىردەي ەسكەرتكىش ورناتىلعان»، - دەيدى ول.
جەرلەسىمىزدىڭ ەندىگى جوسپارى اباي ەسكەرتكىشى ورنالاسقان الەمدەگى بارلىق ەلدەر مەن قالالاردى ۆەلوسيپەدپەن ارالاپ شىعۋ.
«الەمنىڭ ءبىراز ەلىندە ابايعا ەسكەرتكىش قويىلعان. ونىڭ قاتارىندا يتاليا، فرانتسيا، رەسەي، قىتاي، ماجارستان، مىسىر جانە تاعى باسقا ەلدەر بار. وسى تۇرعىدا ۇلى اقىنعا ەسكەرتكىش قويىلعان الەم قالالارىن ۆەلوسيپەدپەن ارالاپ وتپەكپىن. وزىمە وسىنداي تاپسىرما قويىپ وتىرمىن»، - دەدى الماتىلىق ساياحاتشى.
بۇعان دەيىن حابارلاعانىمىزداي دامير كۋشەيەۆ وڭتۇستىك كورەيا استاناسى سەۋلدەن پۋسان قالاسىنا ۆەلوسيپەدپەن بارماق. قازىر ول سەۋلگە جەتتى جانە ونى 700 شاقىرىمدىق جول كۇتىپ تۇر.
ايتا كەتەيىك، وڭتۇستىك كورەيا استاناسى سەۋل قالاسىندا دا اباي ەسكەرتكىشى بار.
اۆتور: ءالي يبرايەۆ