ەكى قانداسىمىزعا ەڭ جوعارى مەملەكەتتىك اتاق بەرىلدى - شەتەلدەگى قازاق ءتىلدى ب ا ق-قا شولۋ

نۇر-سۇلتان. قازاقپارات - «قازاقپارات» ح ا ا ادەتتەگىدەي شەتەلدەگى قازاق تىلىندە تارايتىن اقپارات كوزدەرىنە اپتالىق شولۋىن ۇسىنادى.

وزبەك جانە قازاق جاستارى «سايحۋن» فەستيۆالىنە قاتىستى - «ءو ز ا»

سىرداريادا وزبەكستان جانە قازاقستان جاستارىنىڭ قاتىسۋىندا «سايحۋن» فەستيۆالى ءوتىپ جاتىر. فورۋمعا قاتىسۋشىلار تۇركى جۇرتىنىڭ ۇلى اقىنى ءھام شىعىستىڭ ويشىل دانىشپانى الىشەر ناۋاي مۇسىنىنە گۇل شوقتارىن قويدى.

وبلىستىق مۋزىكالىق دراما تەاترىنىڭ فويەسىندە وزبەك- قازاق حالىقتارىنىڭ تاريحى مەن قۇندىلىقتارى تۋرالى تۇساۋكەسەر ءوتىپ، شارا «دوستىق كوپىرى» اتتى كونتسەرتتىك باعدارلاماعا ۇلاستى، دەپ حابارلادى «ءو ز ا» مەملەكەتتىك اقپارات اگەنتتىگى.

اتالعان ب ا ق- تىڭ كەلتىرگەن دەرەگىنە سۇيەنسەك، وسى شارادان سوڭ وبلىس اكىمى، سەناتور گافۋرجون ميرزايەۆ قازاقستاندىق قوناقتارمەن كەزدەسۋ وتكىزدى. وندا ول سىرداريا اۋدانىندا اتقارىلىپ جاتقان اۋقىمدى جۇمىستار، كورشىلەس ەلدەرمەن بارلىق سالادا بايلانىستى نىعايتۋ شارالارى، وزبەكستان مەن قازاقستان اراسىنداعى دوستىق پەن ىنتىماقتاستىق قارىم- قاتىناستارى تۋرالى مالىمەت بەردى.

كەزدەسۋدەن سوڭ جاس ونەرپازدار ەكى حالىقتىڭ شىعارماشىلىعىنان جىر ءمۇشايراسىن ۇيىمداستىرىپ، دوستىق سايىس وتكىزدى. كەزدەسۋ سوڭىندا قازاقستاندىق قوناقتارعا «دوستىق» فورۋمىنىڭ ءمۇسىنى مەن ەستەلىك سىيلىقتارى تابىس ەتىلدى.

قازاقستان تۇركياعا كىتاپ سىيلادى - TRT

قازاقستاننىڭ تۇركياداعى وكىلەتتى جانە توتەنشە ەلشىسى ابزال ساپاربەك ۇلى كىتاپتى سىيلاۋ راسىمىنە قاتىستى. قازاقستان پرەزيدەنتى قاسىم- جومارت توقايەۆتىڭ ەڭبەكتەرىن دە قامتىعان قازاق ادەبيەتىنىڭ 200-دەن استام ەڭبەگى پرەزيدەنتتىك ساراي ۇلتتىق كىتاپحاناسىنا سىيعا تارتىلدى، دەپ حابارلايدى تۇركيا راديو تەلەۆيزيا پورتالى.

قازاقستان تاۋەلسىزدىگىنىڭ 30 جىلدىعى ءىس- شارالارى اياسىندا قازاقستان تۇركيا رەسپۋبليكاسى پرەزيدەنتتىك ساراي ۇلتتىق كىتاپحاناسىنا سىيعا تارتقان قازاق ادەبيەتىنىڭ 200-دەن استام ەڭبەگىن تاپسىرىپ بەرۋ شاراسى باس قالا انكارادا ۇيىمداستىرىلدى.

راسىمگە قازاقستاننىڭ تۇركياداعى وكىلەتتى جانە توتەنشە ەلشىسى ابزال ساپاربەك ۇلى، قازاقستان ۇلتتىق اكادەميالىق كىتاپحاناسىنىڭ ءتورايىمى ءۇمىتحان مۇڭالبايەۆا، پرەزيدەنتتىك ساراي ۇلتتىق كىتاپحاناسى باسقارماسىنىڭ ءتوراعاسى ايحان تۋعلۋ جانە باسقادا قوناقتار قاتىستى.

ەلشى ابزال ساپاربەك ۇلى پرەزيدەنتتىك ساراي ۇلتتىق كىتاپحاناسىنا تاپسىرىلاتىن كىتاپتاردىڭ قازاقستان مەن تۇركيا اراسىنداعى ادەبي جانە گۋمانيتارلىق بايلانىستاردى كۇشەيتۋگە، قازاق جانە تۇرىك حالىقتارى اراسىنداعى باۋىرلاستىقتى بەكەمدەۋگە ەسە قوساتىنىن ايتقان. قازاقستان ۇلتتىق اكادەميالىق كىتاپحاناسىنىڭ ءتورايىمى ءۇمىتحان مۇڭالبايەۆا اتالمىش كىتاپتاردى تۇركياعا ۇسىنۋ وزدەرى ءۇشىن ماڭىزدى ءبىر مىندەت سانالاتىنىن، سونداي-اق، تۇركى تىلدەس ەلدەردىڭ بەرەكەسىن بۇزباي، باۋىرلاس تۇرىك حالىقتارىنىڭ ادەبيەتى مەن مادەنيەتىن جالعاستىرۋ ماقساتىندا ەكەنىن تىلگە تيەك ەتكەن. باياندامالاردان كەيىن كىتاپتار تاپسىرىلعان.

ەجەلگى جىبەك جولىنىڭ بويىنداعى الەمدەگى ەڭ ۇلكەن كىرپىش عيمارات - Parstoday

بام قامالى - الەمدەگى ەڭ ۇلكەن كىرپىش عيمارات جانە يراننىڭ ەڭ ماڭىزدى تاريحي جادىگەرلەرىنىڭ ءبىرى، دەپ حابارلايدى يراندىق Parstoday اقپارات اگەنتتىگى.

بۇل ۇلكەن تاريحي كەشەن كەرمان وبلىسىنداعى بام قالاسىنىڭ ماڭىنداعى ۇلكەن جارتاستىڭ ۇستىنە سالىنعان. قالا احەمەنيدتەر داۋىرىنەن باستاۋ الادى جانە ونىڭ ماڭىزدىلىعى ەجەلگى جىبەك جولىنىڭ بويىندا ورنالاسۋىنا بايلانىستى ەكەن.

ريزابەك جازيدولدا ۇلى حالىقارالىق «تۇران» سىيلىعىنىڭ لاۋرەاتى اتاندى- Kaznews

ريزابەك جازيدولدا ۇلى 2021 -جىلعى بەينەلەۋ ونەرى سالاسى بويىنشا حالىقارالىق «تۇران» سىيلىعىنىڭ لاۋرەاتى اتاندى، دەپ مالىمدەيدى kaznews . اتالعان ب ا ق-تىڭ دەرەگىنشە، حالىقارالىق «تۇران» سىيلىعىنا موڭعوليا، قازاقستان، وزبەكستان، ازەربايجان، مولداۆا، رەسەي، قىرعىزستان، تۇرىكمەنستان قاتارلى ەلدەردىڭ سۋرەتشىلەرى قاتىسقان.

«ريزابەك جازيدولدا ۇلى تاقىرىپتىق كومپوزيتسيالارىن كوركەمدىك راسىممەن جانداندىرىپ، رومانتيكالىق تۋىندىلارىندا ەموتسيالىق سەزىمدەر بەرە بىلەدى. تاريحتىڭ ءبىر تۇيىنىنەن پوەتيكالىق وي تولعاپ، دەرەگىنە ۇلكەن فيلوسوفيالىق، سيمۆوليكالىق وي جۇگىرتەدى. وبرازدى ويلاۋدا تيپتىك قاسيەت دارىتۋعا شەبەر» ، دەپ جازادى kaznews.mn.

ايتا كەتەيىك، ريزابەك جازيدولدا ۇلى باي-ولكە ايماعىندا تۋعان موڭعوليا ازاماتى. ول بۇعان دەيىن تەمىردەن ءتۇيىن ءتۇيىپ، التىنمەن اپتاپ، كۇمىسپەن كۇپتەپ كىسە- بەلدىك، اشەكەيلى سىرعا- جۇزىك، بولاتتى بالقىتىپ قانجار- پىشاق جاسايتىن ونەرىمەن ايگىلى بولعان.

ريزابەك 1979 -جىلى دۇنيەگە كەلگەن. 1997 -جىلى ورتا مەكتەپتى بىتىرگەن ول ەل استاناسى ۇلانباتىر قالاسىنا بارىپ، پەداگوگيكالىق ۋنيۆەرسيتەتتىڭ كوركەم سۋرەت فاكۋلتەتىندە ءبىلىم العان.

ەر جاساۋدى كاسىپ ەتكەن قازاق - «حالىق گازەتى»

نۇرەك ءجۇمادىل ۇلى ەر جاساۋ كاسىبىمەن اينالىسادى، ول تەك وسى كاسىبىمەن جاقسى كىرىس كىرگىزىپ، ءوز وتباسىن اسىراپ وتىر، دەپ جازادى قىتايدىڭ people.cn اقپاراتتىق پورتالى.

قازاق ۇلتى اتقۇمار حالىق، سوعان سايكەس ات ابزەلدەرىن جاساۋ كاسىبى دە قازاق اراسىندا جاقسى دامىعان. نۇرەك ءجۇمادىل ۇلى ون شاقتى جىلدان بەرى ەر جاساۋ كاسىبىمەن اينالىسادى.

قىتايلىق ب ا ق-تىڭ دەرەگىنشە، ەر جاساۋ ونەرى نۇرەكتىڭ اكەسىنەن ۇيرەنگەن ونەرى ەكەن. ول كۇنىنە ءبىر ەر جاساي الادى، تابىسى دا ايتارلىقتاي جاقسى. ن. ءجۇمادىل ۇلى ءبىر ەردى 1300 يۋانعا (88400 تەڭگە كولەمىندە) ساتادى.

«كەيدە ءبىر ايدا 20 ەرگە تاپسىرىس قابىلدايدى. ونىڭ ەرلەرى اسا ءوتىمدى، جاساپ بولىسىمەن كوپشىلىك كەزەكتە تۇرىپ، الىپ كەتەدى. بۇل اتا كاسىبى وعان تابىس كوزىن عانا ەمەس، باقىت پەن قۋانىش تا الا كەلدى» ، دەپ جازادى «حالىق گازەتى».

موڭعوليالىق ەكى قانداسىمىزعا مەملەكەتتىك اتاق بەرىلدى - Kaznews

عۇن يمپەرياسىنا 2230 جىل، ۇلى موڭعول مەملەكەتىنە 815 جىل، ۇلت ازاتتىق قوزعالىسىنا 110 جىل، موڭعول حالىق ريەۆوليۋتسياسىنىڭ توڭكەرىسىنە 100 جىل تولۋىنا وراي موڭعوليا پرەزيدەنتى ۋ. ءحۇرەلسۇح جارلىق شىعارىپ ءبىرقاتار ازاماتتارعا مەملەكەتتىك جوعارعى اتاق، وردەن، مەدال تابىستادى، دەپ حابارلايدى « Kaznews».

اتالعان ب ا ق- تىڭ دەرەگىنشە، موڭعوليا پرەزيدەنتى ۋ. حۇرەلسۇحتىڭ جارلىعى بويىنشا موڭعوليانىڭ ۇلتتىق ونكولوگيالىق ورتالىعىنىڭ كەڭەسشى دارىگەرى، ەڭبەك سىڭىرگەن دارىگەر، دوكتور، پروفەسسور اساي ءرامىش ۇلىنا «حالىق دارىگەرى» اتاعى بەرىلدى.

سونداي-اق، انۋار ۇلى نوتاعا موڭعوليانىڭ «ەڭبەك ەرى» اتاعى بەرىلدى. موڭعوليا پرەزيدەنتىنىڭ جارلىعى بويىنشا نەيروحيرۋرگيا سالاسىندا مي قان تامىرلارى اۋرۋلارىنىڭ دياگنوستيكاسىن، حيرۋرگياسىن جانە ەمدەۋىن تەوريالىق تۇرعىدا دامىتىپ، ونى تاجىريبەگە تولىعىمەن ەنگىزۋمەن قاتار ناتيجەلەرىن الەمدىك دەڭگەيگە جەتكىزگەنى ءۇشىن مەملەكەتتىك سىيلىقتىڭ يەگەرى، ەڭبەك سىڭىرگەن دارىگەر، دوكتور، پروفەسسور، داڭقتى نەيروحيرۋرگ انۋار ۇلى نوتاعا موڭعوليانىڭ «ەڭبەك ەرى» اتاعى بەرىلدى.

ءۇشقۇدىقتان 3 قانداسىمىز حالىقارالىق بايقاۋدا جەڭىسكە جەتتى - «ءۇشقۇدىق» گازەتى

تاۋەلسىز مەملەكەتتەر دوستاستىعى ەلدەرىنىڭ 30 جىلدىعىنا وراي حالىقارالىق جاس عالىمدار قاۋىمداستىعى مەن «بوبەك» ۇلتارالىق قوزعالىسىنىڭ ۇيىمداستىرۋمەن «ءبىلىم سالاسىنداعى ۇزدىكتەر-2021»، III حالىقارالىق كىتاپ باسىلىمى، ت م د جاس عالىمدارىنىڭ عىلىمى مەن جەكە جەتىستىكتەرىن تانىمال ەتۋگە باعىتتالعان بىرەگەي جوبا قورىتىندىلاندى، دەپ جازادى وزبەكستاندىق «ءۇشقۇدىق» گازەتى.

بۇل جوباعا حالىقارالىق ىنتىماقتاستىق جانە عىلىمدى ودان ءارى ينتەگراتسيالاۋ اياسىندا بەلارۋس، رەسەي، قازاقستان، وزبەكستان، تاجىكستان، قىرعىزستان ەلدەرىنەن ءار ءتۇرلى سالاداعى جاس عالىمدار مەن تالاپتى جاستار قاتىستى. اتالعان بايقاۋعا وزبەكستان رەسپۋبليكاسى، ناۋايى وبلىسى ءۇشقۇدىق اۋدانى №9 -مەكتەبىنىڭ قازاق ءتىلى جانە ادەبيەتى ءپانى وقىتۋشىسى بالجان رزاحمەتوۆا مەن №2 -مەكتەپتىڭ ينفورماتيكا ءپانى وقىتۋشىسى سارۆار قوسيموۆ ءوز جۇمىستارىن ۇسىندى. بالجان رزاحمەتوۆا I دارەجەلى ديپلوم، «ۇزدىك پەداگوگ - 2021» اتاعىمەن جانە سارۆار قوسيموۆ II دارەجەلى ديپلوم، «ۇزدىك پەداگوگ - 2021» ناگرادالىق توسبەلگىسىمەن ماراپاتتالدى.

سونىمەن قاتار №9-مەكتەپ ديرەكتورى روزا جۇسىپبەكوۆا مەن №2 -مەكتەپ ديرەكتورى مەرگەن تورەشوۆكە «العىس حات» بەرىلدى.

سونىمەن قاتار، جۋىردا قازاقستان رەسپۋبليكاسى تاۋەلسىزدىگىنىڭ 30 جىلدىعىنا، اكادەميك، تاريحشى، عالىم ماناش قوزىبايەۆتىڭ تۋعانىنا 90 جىل مەرەيتويىنا وراي «م. قوزىبايەۆ اتىنداعى سولتۇستىك قازاقستان ۋنيۆەرسيتەتى ك ە ا ق «Foundation» فاكۋلتەتى «تاۋەلسىزدىك - اماناتى بابامنىڭ» اتتى حالىقارالىق پوەزيا وقۋ بەينە سايىسىن وتكىزدى. سايىستا قىتاي، يران، قازاقستان، وزبەكستان، موڭعوليا ەلدەرىنەن 40-تان اسا قاتىسۋشى باقتارىن سىناعان.

ءىس-شارانىڭ قورىتىندىسى بويىنشا ءۇشقۇدىق اۋدانىنىڭ ماقتانىشى، №9 -جالپى ورتا مەكتەبىنىڭ 11-سىنىپ وقۋشىسى فەرۋزابانۋ يبودوۆا I ورىندى يەلەگەن. فەرۋزاعا ماناش قوزىبايەۆ ەنتسيكلوپەدياسى مەن بىرگە قارجىلاي سىيلىق تابىستالدى، دەپ حابارلايدى وزبەكستاندىق باسىلىم.

قىتايدىڭ العاشقى كوروناۆيرۋسقا قارسى ارنايى ءدارىسى ماقۇلدانىپ، نارىققا شىقتى - «حالىق گازەتى»

ءدارى ۇلگىلەرى امباۆيرۋماب جانە روميسپيرۋماب سۇيىقتىعى دەپ اتالادى.

بەيجىڭدەگى شينحۋا ۋنيۆەرسيتەتىندە وتكەن باسپا ءسوز ماجىلىسىندە شينحۋا ۋنيۆەرسيتەتىنىڭ پروفەسسورى جان لينشي جەتەكشىلىك ەتىپ زەرتتەپ، ازىرلەگەن قىتايداعى كوروناۆيرۋسقا قارسى العاشقى ءدارى ماقۇلداۋعا يە بولىپ، نارىققا شىققانىن جاريالادى، دەپ حابارلايدى «حالىق گازەتى».

«بۇل قىتايدىڭ وزىندە العاشقى رەت ءوزى زەرتتەپ، دايىنداعان ءارى قاتاڭ، قۇپيا (double blind) جانە پلاتسەبو- باقىلاۋ سىناعىنان وتكەن، كوروناۆيرۋسقا قارسى قولدانۋعا بولاتىن ارنايى ءدارىسى بار بولعانىن بىلدىرەدى»، دەپ جازادى قىتايلىق ب ا ق.

اۆتور: بەيسەن سۇلتان ۇلى