«قازاقستان داۋىسى» مەگاجوباسىنىڭ جەڭىمپازى انىقتالدى
بۇگىن 4 تالىمگەر مەن 4 ۇمىتكەر اراسىنان ۇزدىگى انىقتالدى، دەپ حابارلايدى اتالعان تەلەارنانىڭ باسپا ءسوز قىزمەتى.
ساكەن مايعازيەۆتىڭ شاكىرتى قۇرالاي مەيرامبەك «Qazaqstan داۋىسى» مۋزىكالىق جوباسىنىڭ جەڭىمپازى اتانىپ، 5 ميلليون تەڭگە يەلەندى. سونىمەن بىرگە «قازاقستان» تەلەراديوكورپوراتسياسى ءارى قاراي قۇرالايدىڭ ونەرىنە قولداۋ بىلدىرەدى. SMS- داۋىس بەرۋ ناتيجەسى بويىنشا: 1-ورىن - قۇرالاي مەيرامبەك 2-ورىن - ەرىك تولەنوۆ 3-ورىن - ەرنار اماندىق 4-ورىن - ارۋجان ايداربەك يەلەندى بيىل جوباعا قاتىسۋعا www.qazaqstan.tv رەسمي سايتى مەن ايماقتاعى ىرىكتەۋلەر ارقىلى 6000-نان استام ادام ءوتىنىم بەرىپ، بۇرىن- سوڭدى بولماعان رەكورد ورناتتى.
ولاردىڭ اراسىنان العاشقى كەزەڭگە 200-گە جۋىق قاتىسۋشى شاقىرتۋ الدى. ەلىمىزدىڭ تۇكپىر- تۇكپىرىندەگى تالانتتاردىڭ باسىن قوسقان جوباعا ۋكراينا، قىرعىزستان، گرۋزيا، قىتاي ەلدەرىنەن ۇمىتكەرلەر قاتىستى.
بۇعان دەيىن ولار «كورمەي تاڭداۋ»، «جەكپە- جەك»، «جارعا جىعۋ»، تىكەلەي ەفيردەگى سايىستار مەن «جارتىلاي فينال» كەزەڭدەرىندە باق سىناعان بولاتىن. تالىمگەر مايرا مۇحامەد قىزىنىڭ توبىنان فينالعا ەرنار اماندىق، ساكەن مايعازيەۆتىڭ توبىنان قۇرالاي مەيرامبەك، مارجان اراپبايەۆانىڭ توبىنان ارۋجان ايداربەك، ALEM-نىڭ توبىنان ەرىك تولەنوۆ جولداما الدى. قاتىسۋشىلار تەك ۆوكالدىق قابىلەتتەرىنە قاراي تاڭدالاتىن «The Voice» جوباسى الەمنىڭ 140-تان استام ەلىندە كورسەتىلەدى. ايگىلى تەلەشوۋدىڭ قازاقستاندىق نۇسقاسى اپتا سايىن الەمدىك «Best of the Voice» رەيتينگىسىنە ەنىپ، جوعارى كورسەتكىشكە يە بولدى. ال قاتىسۋشىلاردىڭ جوبادا ورىنداعان اندەرى youtube - تاعى رەسمي ارنادا 37 ميلليوننان استام قارالىم جينادى.