قوناقتىڭ قانشا ءتۇرى بار؟

نۇر- سۇلتان. قازاقپارات - سىرىم باتىر ۇيىنە قونىپ وتىرعان قادىرمەندى قوناعى تولەندى بيدەن: - بيەكە، قازاقتىڭ قوناعى نەشە ءتۇرلى بولادى؟، - دەپ سۇراپتى.

- قازاقتىڭ قوناعى ءتورت ءتۇرلى بولادى: ءبىرىنشىسى - ارنايى قوناق، ەكىنشىسى - قۇدايى قوناق، ءۇشىنشىسى - قىدىرما قوناق، ءتورتىنشىسى - قىلقىما قوناق.

- ال ونى قالاي ايىرامىز؟، - دەگەندە:

- ارنايى قوناعىمىز، الىستان ارنايى كەلگەن جاقىن تۋىس، ناعاشى، جيەن، قۇدا، كۇيەۋ، قايىن سياقتى جەكجاتىڭ نەمەسە سۇيىكتى دوستارىڭ، جاقسى جولداس- جوراڭ. مىنە، بۇل - ناعىز سىيلى قوناعىڭ.

قۇدايى قوناعىمىز، ءوزىڭ تانىمايتىن، بىلمەيتىن شالعاي ەلدەن، الىس جەردەن جولاۋشىلاپ ءجۇرىپ، ات باسىن تىرەي قالعان توسىن دا بوگدە قوناق. مىنە، بۇل - ناعىز ساۋاپ قوناعىڭ.

قىدىرما قوناعىمىز، ەرىگىپ تە جەلىگىپ ۇيدەن- ءۇيدى، اۋىلدان- اۋىلدى كەزىپ، ءسوز اڭدىپ، وسەك تەرىپ، قىمىز ءىشىپ، ەت جەپ جۇرگەن ساندالما قوناق. مىنە، بۇل - ناعىز دالباسا قوناعىڭ.

قىلقىما قوناعىڭىز، ءۇي اراسىنداعى، اۋىل ىشىندەگى ءتۇتىنى ءتۇزۋ شىققان ءۇيدى تورىپ، ءوزىنىڭ قۇلقىنى ءۇشىن اۋزىنا تيگەنىن قىلقىتىپ جىبەرىپ، باسى اۋعان جاققا تارتا بەرەتىن كولدەنەڭ قوناق. مىنە، بۇل - ناعىز سۇعاناق قوناعىڭ، - دەپتى، كوپتى كورگەن كونە بي تولەندى قارت.

massaget.kz