USD 429.57 EUR 447.35
RUB 6.94 CNY 63.23
جاڭالىقتار

قازاق ءتىلى مەن قازاق ادەبيەتى مۇعالىمدەرىنىڭ قاۋىمداستىعى قۇرىلدى

21 جەلتوقسان 21:30
:ءبولىسۋ
قازاق ءتىلى مەن قازاق ادەبيەتى مۇعالىمدەرىنىڭ قاۋىمداستىعى قۇرىلدى

نۇر-سۇلتان. قازاقپارات - ەلىمىزدە نەگىزگى پاندەر بويىنشا رەسپۋبليكالىق پەداگوگتەر قاۋىمداستىعى قۇرىلادى.

بۇل تۋرالى قازاق ءتىلى مەن قازاق ادەبيەتى پاندەرى مۇعالىمدەرىنىڭ سەزىندە جاريا ەتىلدى، دەپ حابارلايدى قازاقپارات ءبىلىم جانە عىلىم مينيسترلىگىنىڭ باسپا ءسوز قىزمەتىنە سىلتەمە جاساپ.

ءىس-شاراعا ءبىلىم جانە عىلىم ءمينيسترى اسحات ايماعامبەتوۆ، ەلىمىزدىڭ بارلىق وڭىرىنەن كەلگەن پەداگوگتەر، لينگۆيست-عالىمدار، سونداي-اق جوعارى وقۋ ورىندارىنىڭ وقىتۋشىلارى مەن رەكتورلارى قاتىستى.

مۇعالىمدەر تاجىريبەلەرىمەن ءبولىسىپ، قازاق ءتىلى مەن ادەبيەتىن وقىتۋ ساپاسىن ارتتىرۋ، قاشىقتان وقىتۋعا بايلانىستى بىلىمدەگى ولقىلىقتاردىڭ ورنىن تولتىرۋ ماسەلەلەرىن تالقىلادى.

پەداگوگتەر قازاق ءتىلىن وقىتۋ ساپاسىن ارتتىرۋ جانە ءپان بويىنشا ۇلگىلىك وقۋ باعدارلاماسىن جەتىلدىرۋ تۋرالى ويلارىمەن ءبولىستى. ولار سونداي-اق قازاق ءتىلى مەن قازاق ادەبيەتىن وقىتۋداعى جاڭا تاسىلدەردى قاراستىرۋدىڭ ماڭىزدىلىعىن اتاپ ءوتتى. سونىمەن قاتار سەزدە ەلىمىزدە نەگىزگى پاندەر بويىنشا رەسپۋبليكالىق پەداگوگتەر قاۋىمداستىعى قۇرىلاتىنى تۋرالى حابارلاندى. مۇعالىمدەر قاۋىمداستىعى وزەكتى ماسەلەلەردى تالقىلاۋ الاڭىنا اينالادى. وسىلايشا، العاشقىلاردىڭ ءبىرى بولىپ قازاق ءتىلى مەن قازاق ادەبيەتى مۇعالىمدەرىنىڭ قاۋىمداستىعى قۇرىلدى. قاۋىمداستىقتىڭ بولىمشەلەرى ەلىمىزدىڭ ءاربىر اۋدانىندا، قالا مەن بارلىق وڭىردە جۇمىس ىستەيتىن بولادى.

«بۇگىن ءبىز ماڭىزدى ماسەلەنى كوتەرىپ، قازاق ءتىلى مەن قازاق ادەبيەتىن وقىتۋ ساپاسىن اشىق تالقىلاپ وتىرمىز. ەگەر بۇل ماسەلەلەردى شەشۋ جولدارىن ىزدەمەسەك، ءبىز ودان ءارى دامىمايمىز. بۇل قازاق ءتىلى مەن ادەبيەتى پاندەرى بويىنشا وقۋلىقتاردىڭ مازمۇنى، وقۋ باعدارلامالارى جانە جوعارى وقۋ ورىندارىندا ماماندار دايارلاۋ ماسەلەلەرى. وزەكتى سۇراقتاردى تالقىلاۋ جانە شەشۋ، سونىمەن بىرگە پاندەردى وقىتۋ ساپاسىن ارتتىرۋ وتە ماڭىزدى. ءاربىر ءپاننىڭ ورنى ەرەكشە: ماتەماتيكا، فيزيكا، حيميا، اعىلشىن ءتىلى، دەنە شىنىقتىرۋ جانە باسقا دا پاندەر ماڭىزدى بولىپ تابىلادى. سوندىقتان مۇنداي سەزدەر ءداستۇرلى تۇردە ۇيىمداستىرىلىپ، اتالعان فورۋمدار مەكتەپ قابىرعاسىندا وقىتىلاتىن باسقا دا پاندەر بويىنشا وتكىزىلەدى»، - دەدى ءبىلىم جانە عىلىم ءمينيسترى اسحات ايماعامبەتوۆ.

ورىس ءتىلى مەن ادەبيەتى پاندەرى مۇعالىمدەرىنىڭ سەزى كەلەسى اپتاعا جوسپارلانعان.

ەستەرىڭىزگە سالا كەتەيىك، بۇعان دەيىن مەملەكەت باسشىسى «ۇلتتىق رۋحاني جاڭعىرۋ» جوباسى اياسىندا مەملەكەتتىك ءتىلدى ودان ءارى دامىتۋ مىندەتىن قويعان بولاتىن. اتاپ ايتقاندا، وقۋ باعدارلامالارىن جاڭارتۋ، وقۋ جانە كوركەم ادەبيەتكە قولجەتىمدىلىكتى قامتاماسىز ەتۋ.


:ءبولىسۋ
سونداي-اق... وقىڭىز
پئكئر قالدئرؤ
+7
جئبةرؤ

مۇراعات