تاۋەلسىزدىك كۇنىنە وراي ق ر پرەزيدەنتىن كوپتەگەن مەملەكەت باسشىلارى قۇتتىقتادى
تۇركيا پرەزيدەنتى رەجەپ تايىپ ەردوعان جەكە ءوزىنىڭ جانە تۇرىك حالقىنىڭ اتىنان شىنايى قۇتتىقتاۋىن جولدادى.
«تاريحي، مادەني جانە باۋىرلاستىق بايلانىستارىمىز ورتاق قازاقستانمەن اراداعى ستراتەگيالىق سەرىكتەستىگىمىزدىڭ ەكىجاقتى، ايماقتىق جانە حالىقارالىق دەڭگەيدە تەرەڭدەپ، نىعايىپ كەلە جاتقانىنا قۋانىشتىمىن»، - دەلىنگەن جەدەلحاتتا.
ۋكراينا پرەزيدەنتى ۆلاديمير زەلەنسكي قۇتتىقتاۋ حاتىندا قازاقستان تاۋەلسىزدىك جىلدارىندا ءوز پوزيتسياسىن نىعايتىپ، حالىقارالىق ارەنادا لايىقتى ورىن العانىن جازعان.
«ەلدەرىمىزدىڭ كوپقىرلى جانە ەكىجاقتى ىنتىماقتاستىقتى ودان ءارى دامىتىپ، مەملەكەتتىك ەگەمەندىك پەن اۋماقتىق تۇتاستىقتى ءوزارا قولدايتىنىنا، قازاقستان ۋكراينانىڭ ورتالىق ازياداعى سەنىمدى سەرىكتەسى بولىپ قالا بەرەتىنىنە سەنىمدىمىن»، - دەلىنگەن ۋكراينا باسشىسىنىڭ جەدەلحاتىندا.
شۆەيتساريا پرەزيدەنتى گي پارمەلان ءوزىنىڭ قۇتتىقتاۋىندا قاسىم-جومارت توقايەۆپەن جەنيەۆادا جۋىردا وتكەن ەكىجاقتى كەلىسسوزدەردى جوعارى باعالاعان.
«ءبىزدىڭ كەزدەسۋىمىز بەن قول قويىلعان كەلىسىمدەردىڭ ەكىجاقتى ىنتىماقتاستىعىمىزعا ايتارلىقتاي پايداسى تيەتىنىنە سەنىمدىمىن. وسى مۇمكىندىكتى پايدالانا وتىرىپ، قارىم-قاتىناستارىمىزدى ودان ءارى دامىتۋعا شۆەيتساريانىڭ بەيىلدى ەكەنىن ناقتىلايمىن»، - دەلىنگەن جەدەلحاتتا.
يتاليا پرەزيدەنتى سەردجو ماتتارەللا نۇر-سۇلتان مەن ريمدى ساياسي، ەكونوميكالىق، مادەني بايلانىستار بىرىكتىرەتىنىن جانە بۇل قاتىناستاردىڭ بولاشاققا بىرگە قادام باسۋعا، ەكىجاقتى ءوزارا ءىس-قيمىلدى دامىتۋعا جول اشاتىنىن اتاپ وتكەن.
«ەلدەرىمىز اراسىنداعى، سونىڭ ىشىندە قازاقستان مەن ەۋروپالىق وداق اراسىنداعى ديالوگ اياسىندا قارقىندى ىنتىماقتاستىعىمىز ورتالىق ازياداعى تۇراقتىلىق پەن ورنىقتى دامۋعا سەپتىگىن تيگىزە بەرەتىنىنە سەنىمدىمىن»، - دەلىنگەن يتاليا پرەزيدەنتىنىڭ قۇتتىقتاۋىندا.
ماجارستان پرەزيدەنتى يانوش ادەر قازاقستاننىڭ وتىز جىل ىشىندە كوپتەگەن سالا بويىنشا ايتارلىقتاي جەتىستىكتەرگە قول جەتكىزگەنىن جانە بۇگىندە ورتالىق ازيا ايماعىندا ماڭىزدى ءرول اتقارىپ وتىرعانىن اتاپ وتكەن.
«ماجارستان ەكى ەل اراسىنداعى دوستىق قاتىناستاردى نىعايتۋعا بەيىلدى. ستراتەگيالىق سەرىكتەستىگىمىز بۇعان نەگىز بولادى. سونىمەن قاتار تۇركى مەملەكەتتەرى ۇيىمى اياسىنداعى ىنتىماقتاستىعىمىز ءوزارا تىعىز بايلانىستارىمىزدى ودان ءارى نىعايتۋعا جول اشادى»، - دەلىنگەن يانوش ادەردىڭ جەدەلحاتىندا.
الجير پرەزيدەنتى ابدەلمادجيد تەببۋن ءوزىنىڭ قۇتتىقتاۋ حاتىندا ەلىمىزدە ديپلوماتيالىق وكىلدىك اشۋ جانە قازاقستان استاناسىندا العاشقى الجير ەلشىسىن تاعايىنداۋ جونىندە باستاما كوتەرگەن.
كانادانىڭ گەنەرال گۋبەرناتورى مەري سايمون قاسىم-جومارت توقايەۆتى جانە قازاقستان حالقىن ەل تاۋەلسىزدىگىنىڭ 30 جىلدىعىمەن قۇتتىقتاپ، قازاقستاننىڭ الەۋمەتتىك-ەكونوميكالىق ءال-اۋقاتىن جاقسارتۋعا، مەملەكەتتىك باسقارۋ ءىسى مەن زاڭ ۇستەمدىگىن نىعايتۋعا باعىتتالعان پرەزيدەنتتىڭ اۋقىمدى رەفورمالارىن جوعارى باعالاعان.
سونىمەن قاتار يگى تىلەككە تولى قۇتتىقتاۋ جەدەلحاتتارىن ريم پاپاسى فرانسيسك، ۇلى بريتانيا حانشايىمى II ەليزاۆەتا، جاپونيا يمپەراتورى نارۋحيتو، بەلگيا كورولى فيليپپ، نيدەرلاند كورولى ۆيللەم-الەكساندر، شۆەتسيا كورولى كارل XVI گۋستاۆ، سەربيا پرەزيدەنتى الەكساندر ۆۋچيچ، گرەكيا پرەزيدەنتى كاتەرينا ساكەللاروپۋلۋ، ليتۆا پرەزيدەنتى گيتاناس ناۋسەدا، بولگاريا پرەزيدەنتى رۋمەن راديەۆ، حورۆاتيا پرەزيدەنتى زوران ميلانوۆيچ، سولتۇستىك ماكەدونيا پرەزيدەنتى ستيەۆو پەنداروۆسكي، ەفيوپيا پرەزيدەنتى ساحلە-ۆورك زيەۆدە، تۇركى مەملەكەتتەرى ۇيىمىنىڭ باس حاتشىسى باعدات امىرەيەۆ، يۋنەسكونىڭ باس ديرەكتورى ودرە ازۋلە جانە باسقالار جولداعان.
قۇتتىقتاۋ جەدەلحاتتارى ءالى دە كەلىپ جاتىر.